InfoHub Logo

Qazirgi tańda 9 myńnan asa elordalyq turǵyn sıfrlyq saýattylyq kýrsynan ótti. Atalǵankýrsqa kelip jatqan adamdardyń sany kóp. Onyń ishinde egde tartqan adamdar, stýdentter men oqýshylar da bar.

Astanadaǵy №76 mektep-lıseıdiń ınformatıka pániniń muǵalimi Ǵalıa Qulshymanovanyń aıtýynsha, dáriske kelýshilerdiń basym bóligi úlken jastaǵy turǵyndar.

«Qyryq jastan bastap alpys, jetpis bes jas aralyǵyndaǵy kisiler kóp keldi. Olar sabaqqa shamamen bir aı kóleminde kelip júrdi. Óıtkeni olardyń kúndelikti aqpartty qabyldaýy baıaý bolǵasyn, ol kisiler kúnde  bir-bir baǵdarlamadan úırenip otyrdy. Kúndelikti qaıtalaıdy, úıge barǵannan keıin ózderi qaıta esine túsirip, kompúterde jasap kórip, jattyǵyp júrdi. Túsinbegen jerlerin kúnde kelip, jazyp-syzyp, surap alady», — dedi kýrs júrgizýshisi Ǵ. Qulshymanova.

Sondaı-aq, ol kýrsqa qatysýshylardyń sertıfıkat alatynyn aıtyp, oǵan bir nemese birneshe kún ketetinin atap ótti. Bári de úırenýshiniń qarym-qabiletine baılanysty eken.

«40-50 jas aralyǵyndaǵy kisiler baǵdarlamany 1 kúnde tolyǵymen úırenip bilip, sertıfıkat alyp ketti. Al úlken kisiler qabyldaýy men materıaldy alymyna baılanysty bir apta shamasynda oqyp, úırengeni týraly sertıfıkat aldy. Kýrsqa kelýshiler qatarynda qoly bos zeınetkerler ishinde tipti, úzdiksiz 1 aı boıy kelip júrgenderi de boldy», — deıdi ınformatıka pániniń muǵalimi.

Sıfrlyq saýattylyq kýrsynda memlekettik qyzmetti elektrondyq formatta paıdalaný, onlaın-saýdany meńgerý, sıfrlyq mashyq, ashyq úkimet syndy baǵyttardy qamtıdy.

«Birinshi — elektrondyq qyzmetter. Ol boıynsha kompúterdi qalaı qosý kerek, qalaı qoldaný kerek. Onyń ishindegi ártúrli baǵdarlamalar bar. Sol boıynsha qalaı jumys jasaý joldaryn tanystyryp, úırettik. Mysaly, Microsoft pen Excel baǵdarlamalarynyń bir-birinen aıyrmashylyǵy qandaı ekenin túsindirdik. Ekinshi baǵyt–«Ashyq úkimet». Ol boıynsha sıfrlyq qoltańbanyń kómegimen jergilikti jáne de ortalyq memlekettik organdarmen, ákimshilikpen baılanys jasaý joldaryn úırettik. Portalda ótinish pen aryz jazýdy oqyp bildi. Úıden shyqpaı-aq, osy qyzmetterdi paıdalaný úlken kisiler úshin taptyrmas kómek dep oılaımyn. Óıtkeni egde adamdarǵa keıde júrip-turýdyń ózi qıyndyq týǵyzyp jatady ǵoı. Zeınetkerler osy elektrondyq qyzmetterdiń múmkinshiligi men artyqshylyǵyn kórip, qanshama ýaqytty únemýdeýge bolatynyna tań qalyp jatty. Bir zeınetker apaıymyz tipti óziniń ákimshilikke degen ótinishin de jazyp úlgerdi», – deıdi Ǵalıa Qulshymanova.

Eske sala keteıik, sıfrlyq saýattylyq kýrstary elimizdiń túkpir-túkpirinde oqytylyp jatyr. Ol sıfrlyq HQO-lar men ártúrli memlekettik mekelerde, sondaı-aq bilim oshaqtarynda úıretilýde. «Sıfrlyq Qazaqstan» memlekettik baǵdarlamasynyń arqasynda halyqtyń sıfrlyq saýattylyǵy 85%-ǵa artatyndyǵyn Memleket basshysy N. Nazarbaev aıtqan bolatyn.

---