InfoHub Logo

O basta túlkiniń quıryǵy joq eken. Qasqyr men túlki araz bolypty. Qasqyr qaıda barsa da túlkiniń izin ańdyp, sońynan qalmaıdy, ustap alyp talap, jeı beripti. İzin jasyra almaǵan túlki aýyr azap shegipti.

Bir qasqyr taǵy da ańdyp, túlkiniń izine túsipti. Túlki qashyp baryp, inine tyǵylady. Sol kezde qasqyr da jetip, túlki ininiń aýzyn tyrmalap, qaza bastapty. Osyndaı qaýipti aldyn ala oılaǵan túlki inine eki aýyz jasaǵan eken. Álgi qasqyr inniń bir aýzyn qazyp jatqanda, túlki ekinshi aýzynan baıqatpaı syrtqa shyǵyp ketipti.

Sodan qalyń toǵaıǵa kelip sińedi. Sol jerde jaıylyp júrgen qoıanǵa kezdesip qalypty. Ol zamanda qoıannyń quıryǵy shubalǵan uzyn bolypty. Zymyraı júgirýine, jaýynnan qashyp qutylýyna kedergi jasap, adymyn ashtyrmaıdy eken.

Toǵaıda bulańdap júrgen uzyn quıryqty qoıandy álgi ózi qasqyrdan qashyp kelgen túlki ustap alypty. Aýyz sala bergende, qoıan zar eńirepti:

– Túlkijan, sen meni óltirme, mynaý ádemi quıryǵymdy saǵan bereıin. Kórdiń be, qandaı sulý. Saǵan jarasa ketedi, – dep, aryzyn aıtypty.

Bulańdaǵan quıryqqa túlki de qyzyǵypty. «Sypyrtqy qusaǵan myna quıryqpen artymda qalǵan izimdi sypyryp, óshirip, kete berýime de bolatyn túri bar. Sonda qasqyr da, basqa qýǵynshylar da izimnen adasyp qalmaı ma?» – dep oılapty. Osy maqsatpen:

– Endeshe, ákel quıryǵyńdy! – dep, qoıannyń shartyna kónipti. Qoıan bulańdaǵan uzyn quıryǵyn túlkige beripti. Túlki óziniń oımaqtaı quıryǵyn julyp tastap, qoıannyń quıryǵyn qadap alypty. Sóıtip, bulańdap kete barady. Qoıan álgi túlkiniń tastap ketken alaqandaı quıryǵyn ıemdenedi. Qoıan men túlki quıryqtaryn osylaı aıyrbastaǵan eken.

---