InfoHub Logo

Qaratorǵaı bir kishkene qaıyńǵa uıa salyp, balapan shyǵarady. Bir ýaqytta balapandary úlkeıe bastaıdy. Birde qaıyńnyń qasynan ótip bara jatqan túlki bıiktegi uıany kóredi. Biraq boıy jetpeıtin bolǵan soń, qaratorǵaıdy aldap soǵýdy oılaıdy.

          — Jurttyń bári eginin egip bitirdi, – deıdi túlki. — Meniń soqam synyp qalyp edi, sony jóndeýime kerek, – myna qaıyńdy kesemin.

          — Kespe, – dep, jalbarynady qaratorǵaı, — balapandarym áli usha almaıdy, qaıda qoıamyn olardy?

          — Olaı bolsa, balapandaryńnyń bireýin ber! Qaratorǵaı oıǵa shomady. Ne isteý kerek? Berse, qaısysyn beredi? Qaı saýsaǵyńdy kesseń de báribir – janyńa birdeı batady.

          Sol araǵa qarǵa kelip qalady da:

          — Qoryqpa, – deıdi qaratorǵaı, – túlki qaıyńdy kese almaıdy. Kesetin balta-shoty da joq.

          — Meniń baltam - mynaý, – dep, túlki quıryǵyn bulǵańdatady.

          Onymen túk te isteı almaıtynyn qarǵa biledi.

          — Qane, kese ǵoı, endeshe...

          Qýlyǵyn ótkize almaǵan túlki endi qarǵaǵa óshigedi. Bir kúni túlki kishkene tómpeshikke shyǵady da tórt aıaǵyn kókke sereıtip, jata ketedi. Qarǵa ólgen túlki eken dep, qasyna kelip, shoqı bastaıdy.

          — Aqylgóıim, tústiń be qolǵa? – dep, túlki shap berip ustap alady. – Qazir sazaıyńdy tartqyzamyn.

          — Bir ótinishim bar: aǵaıyma istegendi isteı kórme, – dep jalynady qarǵa.

          — Aǵaıyńa ne istep edi?

          — Ony dóńgelektiń qýysyna tyǵyp, jardan domalatyp jibergen.

          — Endeshe, týra sony isteımin!

          Túlki sol jazany qoldanbaq bolady da dóńgelektiń kúpshegine tyqqan kezde, qarǵa ekinshi jaǵynan zyp berip, shyǵyp, ketedi.

          Sóıtip, túlki taǵy da aldanyp qalady.

---