InfoHub Logo

         Baıaǵy zamanda bir túlki, bir tasbaqa jáne bir kene – úsheýi joldas bolyp kele jatsa, bir jerde bir ýys tary jatyr eken.

         Úsheýi oılasyp:

         — Muny tuqym qylyp, jerge egip, kóbeıtip, bólip alaıyq ,– deıdi.

         Túlki bir jardy kórip:

         — Men osy jardy súıep turaıyn, bolmasa qulap keter, – dep, kóleńkeni saıalap, jatyp alady.

         Tasbaqa baıǵus jer tyrnalap, kene sorly taryny jıyp, egip, álekke túsedi. Sóıtip, kóp beınet shegip, pisken soń, ol taryny oryp alady. Bastyrǵanda, bir aıaq tary bolady. Bireýi baryp, túlkini shaqyryp keledi. Túlki kele sala:

         — Bul taryny úsheýimizge bólýge bolmaıdy. Úshke bólgesin, bul árqaısymyzǵa qanshadan tıedi deısiń. Onan da úsheýimiz jarysyp, qaı ozǵanymyz alaıyq, – deıdi.

         — Maqul! – dep, úsheýi bir jerge kelip, qatarlasyp turady.

         Túlki:

         — Al, kettik! – dep, jóneı bergende, kene túlkiniń bashpaıyna jabysyp, birge ketedi. Túlki ólip-óship, barynsha júgirip kelip, qyrmanǵa otyra bergende, kene:

         — Aı, sorly, meni basyp óltiresiń be? – deıdi.

         — Oı, sen qashan keldiń? – deıdi túlki.

         — Sen baǵana «Al, kettik!» degende-aq men kelip qalǵamyn! – deıdi kene.

         Ekeýi daýlasyp jatqanda, aýzy-murny qan-qan bolyp, tasbaqa keledi. Kele sala:

         — Oıbaı, túlki, men bir bále kórip keldim! Jańa senderdiń artyńnan eki qarager aty bar, qara búrkiti bar jáne eki tazysy bar eki adam kelip, jańaǵy qasyńdaǵy túlki joldasyńdy taýyp ber dep, meniń aýzy-murnymdy qan qyldy. Sonda da aıtqanym joq, osy jaqqa qaraı kele jatyr, – deıdi.

         Túlki:

         — Aınalaıyndar-aı, meni aıta kórmeńder! Myna taryny ekeýiń teń bólip al, men senderge rıza bolaıyn. Olar kelse: «Bilmeımiz, qaıda ketkenin» deńder, – dep, tura jónelipti.

         Sóıtip, taryny tasbaqa men kene bólip alypty.

---