InfoHub Logo

2018 jylǵa arnalǵan Ulttyq biryńǵaı testi suraqtary 50 paıyzǵa jańardy. Bul týraly búgin Úkimet úıinde ótken baspasóz máslıhatynda Ulttyq testileý ortalyǵynyń dırektory Ramazan Álimqulov aıtty.

«Aǵymdaǵy jyly UBT 15-shi ret óteıin dep otyr. Osy ýaqyt aralyǵynda shamamen 1,5 mln túlek Ulttyq biryńǵaı testileýge qatysty. Qazirgi ýaqytta 2018 jyldyń UBT-syna daıyndyq shtattyq rejimde júrgizilip jatyr. Barlyq aýdıtorıa daıyn. Ózderińiz de biletindeı, bıyl onyń formaty ózgermeıdi. Úsh mindetti pán bolady: Qazaqstan tarıhynan 20, saýatty oqýdan 20, matematıkalyq saýattylyqtan 20 jáne tańdap alynǵan 2 pánnen 30 suraqtan»,-  dedi ol.

Ortalyq basshysynyń aıtýynsha, búginde respýblıkalyq apelásıalyq komısıanyń músheleri iriktep alynǵan. Oǵan 54 adam kirip otyr.

«Apelásıa tetigi de saqtalady, eshqandaı ózgeris joq. Iaǵnı, UBT tapsyrǵan túlek kelesi kúni saǵat 13:00-ge deıin daý týdyrǵan saýalǵa baılanysty jergilikti apelásıalyq komısıaǵa ótinim bere alady. Odan keıin eger jergilikti komısıa daýlasýǵa sebep bar dep sheshetin bolsa, onda materıaldardy respýblıkalyq komısıaǵa beredi», - dedi ortalyq basshysy.

Onyń dereginshe, ótken jyly 198 apelásıalyq shaǵym tússe, onyń 50 paıyzy tehnıkalyq máselelerge qatysty bolǵan. Mazmunyna qatysty 98 másele kóterilip, qanaǵattandyrylǵan.

«Ótken jyly UBT-nyń test tapsyrmalary 40 myń bolsa, sonyń 98 suraǵy, ıaǵnı 0,02 paıyzy ǵana daý týdyrdy. Álemdik tájirıbede 1 paıyzǵa deıin qalypty bolyp esepteledi. Biz bul durys kórsetkish dep sanaımyz. Aǵymdaǵy jyly test suraqtarynyń bazasy 50 paıyzǵa jańardy jáne bıylǵy UBT-da 80 myń suraq bolady», - dedi ol.

QazAqparat

---