InfoHub Logo

Budan bylaı Ulttyq biryńǵaı testileý (UBT) tapsyrýshylarǵa qorytyndy balmen birge taqyryptyq taldaý qorytyndysy beriledi. Bul týraly QR Bilim jáne ǵylym mınıstri Asqat Aımaǵambetov Facebook-tegi paraqshasynda jazdy.

«Endi UBT qorytyndysy boıynsha ár mektep, oblys, tipti pán boıynsha taldaý jasap, ony mektepterdiń jumysyn baǵalaý úshin paıdalanýǵa sheshim shyǵardyq.

Elektrondy formatqa kóshý endi testileýge taqyryptyq taldaý jasaýǵa múmkindik beredi. Mundaı jańalyqty biz naýryz aıyndaǵy UBT kezinde pılottyq rejımde engizdik», - dep jazdy mınıstr.

Aıtýynsha, endi túlek testileýdi aıaqtaǵannan keıin jınaǵan upaılarynyń nátıjesin ǵana emes, sonymen qatar qandaı taqyryptardy biletini jáne qaısysyna kóńil bólý qajet ekeni týraly qosymsha taldaý alady.

«Dál osyndaı taldaýdy mektepke de, naqty pánge qatysty da, aýdan, oblys jáne jalpy respýblıka kóleminde de jasaımyz. Bul ne beredi? Bul sheshim testileýshilerge qandaı taqyryptarǵa nazar aýdarý, qandaı taqyryptardy kúsheıtý keregin kórýge múmkindik beredi. Iaǵnı synaqqa qatysýshylar qazirdiń ózinde ózderiniń álsiz tustaryn anyqtap, jeke taqyryptarǵa kóbirek ýaqyt bólip, qatelermen jumys isteı alady», - deıdi vedomstvo basshysy.

Asqat Aımaǵambetov bul tásil muǵalimderge oqýshylardyń qandaı taqyryptarda qınalǵanyn kórýine múmkindik beretinin aıtady.

«Mektepti alatyn bolsaq, mysaly, matematıka páni muǵaliminiń oqýshylarynyń bir bóligi keıbir esepterdi nashar shyǵaratynyn baıqaýǵa bolady. Taldaý sebepterdi anyqtaýǵa septigin tıgizedi. Dálirek aıtqanda, muǵalimniń ózi túsindirýde qınalatyny ne baǵdarlamada ýaqyt jetkiliksizdigi, oqýlyqtaǵy suraqtar máselesi jáne taǵy basqasy.

Tıisinshe, taldaýǵa baılanysty oqý baǵdarlamalaryn pysyqtaý, muǵalimderdiń maqsatty túrde biliktiligin arttyrý, biliktilikti arttyrý baǵdarlamalaryn ózgertý jáne t.b. boıynsha sheshimder qabyldaı alamyz. Jazǵy UBT qorytyndysy boıynsha árbir mektep, oblys, muǵalim jáne túlek osyndaı taldaý alady», - dep jazady mınıstr.

Sondaı-aq, ol birneshe jyl buryn UBT qorytyndysy boıynsha mektepter reıtıńin ótkizýge tyıym salynǵan eske saldy. Al bul jolǵy baǵalaý mektepterdiń, muǵalimderdiń, bilim basqarmalarynyń oqytý prosesinde ketken qateliktermen jumys isteýine jol ashpaq.

«Qazir qabyldanǵan sheshim óz rólin atqarǵanyn, pedagogter men mektepterge túsetin júktemeni azaıtqanyn kórip otyrmyz. Iaǵnı oqýshylar UBT-ǵa elektrondy formatta óz betinshe ótinish berdi jáne olardy UBT-dan shettetý, sondaı-aq tek test arqyly ǵana daıyndaý jáne ákimdikterdiń oblys reıtıńine yqpal etý áreketteri toqtatyldy», - dep jazdy Asqat Aımaǵabetov.

---