InfoHub Logo

Esiktiń aldynda oınap júrgen Álı qolyndaǵy oıynshyq zymyranyn laqtyryp jiberip edi, onysy tasqa soǵylyp, bir bólshegi synyp tústi. Oǵan mán bermesten qolyna robotynalyp, ony qumǵa kómip oınady. Robottyń ishine qum kirip, qýaty taýsylǵanda ony da jaıyna qaldyryp, poıyzdyń vagondarymen oınaýdy bastady. Odan da tez jalyqty. Qolyndaǵysyn tastaı salyp kórshi Maǵjannyń ushaǵyna jarmasty. Álı ushaqpen oınap ta jetistirmedi, laqtyra salyp, endi átkenshekke qaraı umtyldy. Átkenshekte otyrǵan kishkene Aqbotany túsirip jiberip, ornyna ózi otyryp aldy.

Endi az ýaqyttan soń fýtbol oınap júrgen balalarǵa qosylyp ketti. Álıge salsa barlyq goldy ózi salyp, jalǵyz ózi chempıon bolǵysy keledi. Bireýdiń aıaǵyn basty, bireýdi shalyp qulatty. Ádiletsizdigine qarsy bolǵan balalar ony oıynnan qýyp jiberdi. Álı ne isterin bilmeı endi ákesi qysta tebesiń degen shanasymen shańǵysyn alyp shyqty. Shanasyn asfáltqa súıredi, shańǵysyn topyraqpen, taspen ysty. Bir ýaqta bárin dalada qaldyryp, úıge kirip, qolyn jýmastan kompúterge otyryp, pernetaqtany saýsaqtarymen qatty basyp oıyn oınady. Birneshe mınýttan soń ornynan turyp, qaıta dalaǵa shyǵyp bara jatqan Álıdi anasy toqtatty.

— Balam, altynym, baǵanadan beri baıqap júrmin, árnárseniń basyn shalyp, myna oıynshyǵyńdy syndyryp, ana oıynshyǵyńdy laqtyryp, basqa balalarmen oınaǵanda da óktemdik kórsetip, janyńdy qoıarǵa jer tappaı júrsiń. Sen óskende batyr, azamat, jigit bolasyń. Ákeńdi qarashy, qandaı salmaqty, sabyrly. Ákeńdeı er azamat bolý úshin ózińdi qazirden bastap tárbıeleýiń kerek. Oıynshyqtaryńdy kútip ustap, tártipti bolsań, bolashaqta sen de úlken jigit, elge paıdaly tulǵa bolasyń, Álıim, — dedi ulyna.

Álı bolsa óz isine uıalyp, anasynan keshirim surady.

---