InfoHub Logo

Bir baýkespe ury bar eken, Serikbaıdyń jalǵyz qara sholaq sıyry da osy urynyń keńirdegine túsip ketipti.

Sıyrynyń izine túsip barsa, «sıyryńdy kórgenim joq» dep bet baqtyrmaı qoıypty. Óziniń boı bermesin bilgen soń Serikbaı amalyn taýyp ese qaıtaratyn oraı kútipti. Ury urlyqqa ketti degen habardy estip, endi qaıtady-aý degen kezde, jol boıyndaǵy zıratqa kelip jatyp uryny tosypty. Uzaq júristen qaljyrap at ústinde qalǵyp kele jatqan ury osy jerden óte bergende, baıqatbaı jetek atqa minip alyp basyn tartyp tura qalypty.

İrke tartqan atqa jalt qaraǵan ury ústindegi appaq kebin kıgen «árýaqty» kóripti. Sasqan ury jetek atty tastaı salyp, atyna ústi-ústine qamshy basyp joǵalypty. Serikbaı atty ıesine tabys etip qaıta beripti. Shoshynǵan ury úıine bara aýyryp jatyp qalypty. Ol kezde Serikbaı el ishindegi ataqty emkústerdiń biri eken. Saýyǵa almaǵan ury kisi jiberip Serikbaıdy shaqyrtady. «İshi merezdiń ishinde ıt ulyp jatady» degendeı aýrýy ózine málim ekenin biletin Serikbaı onyń tamyryn ustap kórip:

— Júregiń qozǵalǵan eken, aýrýyń edáýir salmaqty, ne nárseden shoshydyń, shynyńdy aıt, soǵan qaraı otyryp em jasaımyn, áldeqalaı bolar ekensiń, — dep shoshyta túsedi.

Bultarar amaly qalmaǵan ury kórgen-bilgenin aıtyp beredi. Serikbaı sonda:

— Báse, qatty ushynǵan ekensiń, men emdep kóreıin, jazylyp qalarsyń. Ol kóringen jan alatyn perishte, Qudaı jolymen júrmegen, basqalardyń qaqysyn jegen, kúnáǵa batqan adamdardyń janyn alýǵa kelgen. Táýbe qylyp, adal kásippen shuǵyldansań, jazylyp ketesiń, — depti. Janynan qoryqqan ury ekinshi urlyq qylmaýǵa táýbe qylypty.

---