InfoHub Logo

Buǵan deıin QR Tuńǵysh Prezıdenti – Elbasy N.Á.Nazarbaevtyń bastamasy boıynsha «Pedagog mártebesi týraly» Zań jobasy ázirlengeni belgili. Ótken 2019 jyldyń 27 jeltoqsan kúni táýelsiz elimizdiń 28 jyldyq tarıhynda Memleket basshysy Qasym-Jomart Toqaevtyń jarlyǵymen tuńǵysh ret muǵalim mártebesi týraly zańnyń qabyldanýy ustazdar qaýymyn bir serpiltip tastady. Elimizde jarty mıllıonnan asa ustaz bar bolǵandyqtan, atalǵan zań jobasy óte qyzý talqylanyp, túrli usynystardyń nátıjesinde kem-ketigi de tolyqtyryldy.

 

Alash ardaqtysy Maǵjan Jumabaev: «Alty Alashtyń basy qosylsa, tórdegi oryn muǵalimdiki» dep asa qurmet tutqan muraty bıik muǵalim mártebesiniń zańmen bekitilgeni elimizdi, ásirese, ustazdar qaýymyn aıryqsha qýantty.

Atalmysh Zań jobasy aıasynda Almaty qalasy Naýryzbaı aýdany «№187 jalpy bilim beretin mektep» komýnaldyq memlekettik mekememizde osyǵan oraı arnaıy dóńgelek ústel ótkizdik. Tanysý, taldaý jumystaryn júrgizip, 6 bólim, 21 baptan turatyn qujatty memleketimizdiń ustazdar qaýymyn qadirlegen aıryqsha qamqorlyǵy dep qabyldadyq. Jıyn barysynda «Pedagog mártebesi týraly» zańǵa arnaıy baptar engizilgeni, ıaǵnı, «Jalpy erejelerden» bastap, «Pedagogtyń mártebesi jáne onyń pedagogıkalyq qyzmeti», «Pedagogıkalyq quqyqtary», «Pedagogtyń mindetteri men jaýapkershiligi» sıaqty negizgi bólimder pedagogtyń basty qujaty ekendigi basa aıtyldy.

Uly ustaz Y.Altynsarın: «Bizge jaqsy muǵalim bárinen qymbat, óıtkeni, muǵalim – mekteptiń júregi» degenindeı, muǵalimderdiń áleýmettik jaǵdaılary týraly da zańda taıǵa tańba basqandaı anyq kórsetilgendigi, muǵalimniń mártebesin kóterýdi olardyń aılyq jalaqylaryn ósirýden bastaǵandyǵy ustazdar mereıin ósirip, nur ústine nurlandyrdy. Ujymnyń aıryqsha qanattanyp, eńbekke degen qulshynystarynyń artqandyǵy baıqaldy. Endi ustazdyq qyzmet qylar oqý bitirgen ozyq jastardyń da bilim ordasyna qadam basýy ásirese, er azamattardyń kelýi mektepke tártip ornatyp, uldardyń er adam tárbıesin kórip ósetindigi kóńil qýantady.

Muǵalim mártebesi kóterilýi úshin Zańnyń­ jaı quqyqtyq qujat, ıaǵnı deklarasıa kúıinde qalmaı, eń aldymen – fýnksıanaldy túrde tolyq oryndalyp, naqty iske asyp jatqandyǵyn kózimiz kórip, kóńilimizge qýanysh uıalady. Qabyldanǵan jańa zań elimizdiń barsha ustazdaryna úlken senimmen qatar zor jaýapkershilikti de júktedi. Osy údeden shyǵyp, mártebe bıiginen kóriný – árbir ustazymyzdyń mindeti. Tapsyrylyp otyrǵan taýdaı senim – biz úshin úlken mártebe!

Ustazdardyń quqyqtaryn keńeıtý jáne ózine tán emes jumystan bosatý, júktemesin azaıtýy muǵalimderge oqýshylardyń tanym-tárbıesine, bilim sapasyna asa mán berýine jaǵdaı jasalǵanyna erekshe mán berildi. Eń bastysy, muǵalim mártebesiniń zańmen bekitilgendigin mektep ujymy zor qýanyshpen qabyldady.

«Bir árip úıretkenge qyryq jyl sálem ber» degen qazaqtyń sózi ustazǵa degen uly syılastyq, qurmet tutqan qaǵıda ekeni anyq. Qoǵamdaǵy eń joǵarǵy mártebe ustaz qaýymyna tıesili ekendigi – qoǵamnyń ǵylym-bilimge degen sanaly kózqarasy. Al ǵylymǵa degen nemquraıly kózqaras qoǵamnyń damýyn artqa tartyp, kóshimizdi kenjeletetini sózsiz. «Ustazǵa qurmetsizdik – ǵylymǵa qurmetsizdik» demekshi, álemdik IýNESKO uıymynyń 1966 jylǵy muǵalim már­te­besi jóninde: «Mem­le­ket­terge mynadaı norma­ny qarastyrý qajet: Eger pe­da­­gogtiń basy daýǵa qalatyn bolsa, oǵan baılanysty daý, tergeýdiń barysy jáne ol jó­nindegi qabyldanǵan sheshimdi ja­rıalaýǵa ruqsatty tek pe­da­gogtiń ózi berýi kerek» dep aıtylǵan usynysy muǵalimderdi quqyqtyq jaǵynan erekshe qorǵaıtyn norma bolyp tabylady.

Muǵalim mártebesi – mem­lekettiń mártebesi. Ol bolashaq prezı­denttiń, ǵaryshkerdiń, ınjenerdiń, ǵalymnyń, memle­ketimizdiń kez kelgen azamatynyń ómir jolyna joldama beretin tulǵa. Qabyldanǵan zańdy qaı jaǵynan alsańyz da, saıası jáne áleýmettik máni tereń, aýqymy úlken. Iá, qazir básekelestiktiń, damyǵan tehnologıalar zamany. Álemdegi barlyq jańashyldyqtyń bári osy bilim-ǵylym arqyly júzege asatyny belgili. Mine, eń bastysy bilimniń qaınar kózi ǵylymnyń ósýine edáýir septigin tıgi­ze­tini sózsiz. Ǵylym damysa, qoǵam da damıtyny aqıqat.

Biz, «№187 jalpy bilim beretin mektep» ujymy «Pedagog mártebesi» Zańyn tolyq qoldap qýattaımyz jáne mańdaı terimizdi salyp, aıanbaı jumys isteımiz. «Bul – bolashaǵymyzǵa quıylǵan ınvestısıa!» dep bilemiz. Oqýshylarymyzǵa sapaly bilim berip qana qoımaı, ózimiz de úzdiksiz tal besikten jer besikke deıin bilimimizdi jalǵastyryp, ustaz degen ardaqty atymyzdy abyroımen arqalaımyz degen bek senimdemiz.

Indıra ERJİGİTOVA
Naýryzbaı aýdanyndaǵy №187 jalpy bilim beretin mektep dırektorynyń mindetin atqarýshy
Nursultan ÁMİRBEK Dırektordyń oqý isi jónindegi orynbasary

---