Vıktor Lústıg — Eıfel munarasyn satyp jibergen alaıaq...
Vıktor Lústıg ómirden ótken eń daryndy alaıaqtardyń biri sanalady. Nebir qýlyq-sumdyqtardy oılastyryp júretin alaıaq 45 laqap atqa ıe bolǵan jáne bes tildi jetik meńgergen. AQSH-tyń ózinde ony 50 ret tutqynǵa alǵan, alaıda dáleldenbegendikten árdaıym jiberip otyrǵan. Birinshi dúnıejúzilik soǵysqa deıin Lústıg transatlantıkalyq krýızdarda aılakerlik lotereıalar uıymdastyrýmen aınalysqan. 1920 jyldary AQSH-qa kóship ketedi de, eki jyl ishinde bankter men jeke adamdardy on myńdaǵan dollarǵa aldap ketken.
Lústıgtiń eń úlken alaıaqtyǵy Eıfel munarasyn satýy bolǵan. 1925 jyly mamyrda shytyrman qýalap Lústıg Parıjge keledi. Fransýz gazetteriniń birinen Lústıg Eıfel munarasynyń birshama eskirip qalǵanyn jáne jóndeý jumystaryn qajet etetinin oqyp qalady. Lústıg osyny paıdalanyp qalýdy kózdeıdi. Alaıaq ózin poshta men telegraf Mınıstirligi basshysynyń orynbasary ekenin kórsetetin ótirik senim qaǵazdaryn jasaıdy. Osydan keıin vtorchermettiń alty dılerine resmı hattar joldaıdy.
Lústıg ózi ornalasqan qymbat qonaq úıge bıznesmenderdi shaqyryp, munarany jóndeý jumystaryna qyrýar qarjy ketetindikten bılik ony qulatyp, metaldaryn jabyq aýksıonda satyp jibermek ekenin aıtady. Munarany unatyp úlgergen qoǵamdy dúrliktirmeý úshin Lústıg kásipkerlerge bul málimetti qupıa ustaýdy ótinedi. Biraz ýaqyttan keıin munarany paıdalaný quqyǵyn Andre Pýassonǵa satyp, bir shabadan aqshamen Venaǵa qashyp ketedi. Pýasson kásibı ortada ózin aqymaq kórsetpeý úshin aldanyp qalǵanyn jasyryp qalady.
Osynyń arqasynda biraz ýaqyttan keıin Lústıg Parıjge qaıta oralyp, burynǵy tásilmen munarany taǵy satyp jiberedi. Alaıda bul joly onyń joly bolmaıdy, sebebi aldanǵan bıznesmen polısıaǵa shaǵym túsiredi. Lústıg shuǵyl AQSH-qa qashyp ketedi. 1935 jyly jeltoqsanda Lústıg tutqynǵa alynyp, sottalady. Dollarlardy qoldan jasaǵany úshin ol 15 jylǵa, sonymen qatar úkim shyqqanǵa bir aı qalǵanda basqa túrmeden qashyp ketkendigi úshin 5 jylǵa sottalady. Ol San-Fransıskonyń mańyndaǵy tanymal Alkatras túrmesinde pnevmonıadan 1947 jyly qaıtys bolady.
You Might Also Like
