ەل نىشانى — رامىزدەر (رەسپۋبليكا كۇنىنە ارنالعان ادەبي-مۋزىكالىق مونتاج)
ساحنا ءتورىنىڭ ءدال ورتاسىنا قازاقستان رەسپۋبليكاسىنىڭ ەلتاڭباسى ءىلىنىپ، تۇعىرعا مەمەلكەتتىك تۋى قويىلادى. ولاردىڭ وڭ جاعىنا قازاقستان رەسپۋبليكاسىنىڭ مەملەكەتتىك ءانۇرانىنىڭ نوتاسى، سول جاعىنا ءانۇران ءماتىنى (اشەكەيلى ۇلەن بيلبوردتا) ىلىنەدى.
ساحناعا جۇرگىزۋشى ۇل مەن قىز شىعادى. قازاقستان رەسپبۋليكاسىنىڭ مەملەكەتتىك ءانۇرانىنىڭ فونوگرامماسى قويىلىپ، زالداعى كورەرمەندەر ورىندارىنان تۇرىپ، وڭ قولدارىن كەۋدەلەرىنە ۇستاپ، بىرگە ورىندايدى.
1-وقۋشى: باقىتتى بوپ جۇرگەنىم
سەنىڭ ارقاڭ، ۇلى وتان.
ەلىم — مەنىڭ تىرەگىم،
قۇشاعىڭدا گۇل اتام.
2-وقۋشى: شىعىسىڭنان ارايلى،
كۇلىپ اتقان قۇبا تاڭ.
سەنەن باقىت تارايدى.
بارشامىزعا ۇلى وتان.
1-وقۋشى: سارقىلمايتىن قۋاتىم،
تىرەگىمسىڭ سەن، وتان.
ماڭگى سوعىپ تۇراتىن
جۇرەگىمسىڭ سەن، وتان!
2-وقۋشى: پەيىلىندەي كەڭ دالاسى،
جەرى شۇيگىن، سۋى بال.
ەگەمەن ەلمىز، قاراشى،
ەلتاڭباسى، تۋى بار.
(مۋزىكا).
العاشقى ەكى وقۋشى ساحنادان كەتىپ، ولاردى تاعى دا بىرنەشە وقۋشى الماستىرادى.
1-وقۋشى: كەز-كەلگەن جاس مەملەكەتتىڭ ەڭ العاشقى رەسمي قادامى — ەلدىڭ تۋىن، ەلتاڭباسىن جانە ءانۇرانىن سايلاپ الۋ.
2-وقۋشى: تۋى، ەلتاڭباسى جانە ءانۇرانى بار — ساياسي بوستاندىققا قول جەتكىزگەن مەملەكەتتى — تاۋەلسىز ەل دەيمىز.
3-وقۋشى: قازاقتىڭ بۇگىنگى ەلى — بوستان ەلى،
تاۋەلسىزدىك جىر جىرلاپ قوشتادى ەلى.
ءتورت قۇبىلا تۇگەلدەي اق تاڭ قۇشقان،
باۋىرمال ەل — بىرلىكشىل، دوستار ەلى.
4-وقۋشى: تاۋەلسىزدىك دەگەن قاسيەتتى ۇعىم مادەني نىشاندار تىلىندە دە سويلەيدى.
1-وقۋشى: قابىلدانعان قىران بەينەلى كوكشۋلان تۋىمىزدىڭ اۆتورى — شاكەن نيازبەكوۆ.
(ءبىر وقۋشى ش. نيازبەكوۆتىڭ پورترەتىن جوعارى كوتەرىپ، ساحناعا الىپ شىعادى).
2-وقۋشى: ەشبىر ەلدىكىنە ۇقسامايتىن شاڭىراق شىرايلى، شىن دارا ەلتاڭبامىزدىڭ اۆتورلارى — جانداربەك مالىبەكوۆ پەن شوت-امان ءۋاليحان.
(ج. مالىبەكوۆ پەن ش. ءۋاليحان پورترەتتەرىن كوتەرگەن وقۋشىلار شىعادى).
3-وقۋشى: العاشقى ءانۇرانىمىزدىڭ اسەم اۋەنىن ايگىلى سازگەرلەر — مۇقان تولەبايەۆ، ەۆگەنيي برۋسيلوۆسكيي، لاتيف حاميدي دۇنيەگە اكەلگەن.
(م. تولەبايەۆ، ە. برۋسيلوۆسكيي، ل. حاميدي پورترەتتەرىن ۇستاعان بالالار كەلەدى).
4-وقۋشى: ال وسى ءانۇراننىڭ ءماتىنىن جازعان اقىندار — مۇزافار الىمبايەۆ، قادىر مىرزا ءالى، تۇمانباي مولداعالييەۆ جانە جادىرا دارىبايەۆا.
(اتالعان اقىنداردىڭ پورترەتتەرى ساحناعا كەلتىرىلەدى).
1-وقۋشى: كەيىن، جاڭادان قابىلدانعان — “مەنىڭ — قازاقستانىم” دەپ اتالاتىن ءانۇراننىڭ كومپوزيتورى — ءشامشى قالداياقوۆ.
2-وقۋشى: جاڭا ءانۇران ءماتىنىنىڭ اۆتورلارى — اقىن جۇمەكەن ناجىمەدەنوۆ پەن تاۋەلسىز قازاقستاننىڭ تۇڭعىش پرەزيدەنتى، ەلباسىمىز نۇرسۇلتان ءابىش ۇلى نازاربايەۆ.
(مۋزىكا).
رامىزدەر اۆتورلارىنىڭ پورترەتتەرىن ۇستاعان وقۋشىلار ساحنا سىرتىنا كەتەدى.
1-وقۋشى: ءبارى دە تۇر جازىلىپ سەندە، بايراق،
ءدال ءقازىر جەلبىرەگەن جەلمەن ويناپ.
ۇستىندە اق وردانىڭ جالعىز جالاۋ —
اسپاننىڭ ەلشىسىندەي كەلگەن جايناپ.
2-وقۋشى: رەسمي بەلگىلەنگەن انىقتاماعا سايكەس: “قازاقستان رەسپۋبليكاسىنىڭ مەمەلكەتتىك تۋى — ورتاسىندا شۇعىلالى كۇن، ونىڭ استىندا قالىقتاپ ۇشقان قىران بەينەلەنگەن تىك بۇرىشتى كوگىلدىر ءتۇستى ماتا”.
3-وقۋشى: تۋدى سابىنىڭ تۇسىندا ۇلتتىق ورنەك ناقىشتالعان تىك جولاق كوكتەپ وتەدى.
4-وقۋشى: كۇن، شۇعىلا، قىران جانە ورنەك بەينەلەرى التىن تۇستەس.
5-وقۋشى: مەملەكەتتىك تۋىمىزدىڭ اسپان تەكتى زەڭگىر كوك ءتۇستى بولۋى كەزدەيسوق ەمەس.
6-وقۋشى: ايگىلى انسەلم كەستەسى بويىنشا ول ادالدىقتىڭ، كىرشىكسىز تازالىق پەن پاكتىكتىڭ نىشانى.
7-وقۋشى: كوك ءتۇس — ىنتىماق پەن بىرلىك يدەياسىن اڭعارتادى.
8-وقۋشى: بەيبىتشىلىك، تۇراقتىلىق پەن بەرەكە-بايلىق بەلگىسى بولىپ سانالاتىن اشىق اسپانعا مەڭزەيدى.
9-وقۋشى: اسپانكوك ءتۇس — قازاقتىڭ ۇلتتىق بوياۋىنىڭ رەڭى.
10-وقۋشى: ۇلتتىق تانىمى، مادەنيەتى مەن بۇل تۇسكە دەگەن ايىرىقشا ءىلتيپاتى — وسى ويعا جەتەلەيدى.
(ساحناعا ش. نيازبەكوۆتىڭ پورترەتىن كوتەرگەن وقۋشى شىعادى).
1-وقۋشى: قازاقستان رەسپۋبليكاسى مەملەكەتتىك تۋىنىڭ اۆتورى — شاكەن وڭلاسىن ۇلى نيازبەكوۆ.
2-وقۋشى: شاكەن وڭالسىن ۇلى — قازاقستانعا ەڭبەگى سىڭگەن ونەر قايراتكەرى. قازاقستان ديزاين ونەرىنىڭ نەگىزىن قالاۋشىلاردىڭ ءبىرى.
3-وقۋشى: ول كىسى 1938 جىلى 12 قاراشادا تاراز قالاسىندا دۇنيەگە كەلگەن.
4-وقۋشى: مۋحين اتىنداعى سانكت-پەتەربۋرگ جوعارى كوركەمونەر ونەركاسىپ ۋچيليششەسىن بىتىرگەن.
5-وقۋشى: الماتى قالاسىنىڭ باس سۋرەتشىسى.
6-وقۋشى: قازاقستان رەسپۋبليكاسىنىڭ مەملەكەتتىك تۋىنىڭ ءبىر ءتۇستى بولۋى ەلىمىزدىڭ مەملەكەتتىك ءبىر تۇتاستىعىنىڭ كورىنىسى.
7-وقۋشى: كۇن وبرازى — بايلىق پەن بەرەكەنىڭ بەلگىسى. ونىڭ بەينەلەنۋى ماڭگىلىك نىشانى دەپ سانالادى.
8-وقۋشى: قىران بۇركىت بەينەسىنىڭ ءمانى — ادەتتە بيلىك، كورەگەندىك پەن كەڭدىك، كۇش-قايرات ۇعىمادارىن بىلدىرەدى.
9-وقۋشى: ۇلتتىق ويۋ-ورنەك — حالىق قولونەرىنىڭ ەڭ ۇلى جەتىستىكتەرىنىڭ ءبىرى. ول — قازاق مادەنيەتىنىڭ ۇلتتىق نىشانى.
10-وقۋشى: التىنمەن ايشىقتالىپ، كوز جاۋىن الارداي ادەمى زەرلەنگەن رامىزدىك جەكە بەلگىلەردىڭ بوياۋى تۋدىڭ كوك رەڭىمەن ادەمى ۇيلەسەدى.
(مۋزىكا. ساحاناداعى بالالاردى تاعى دا ءبىر توپ وقۋشى الماستىرادى).
1-وقۋشى: قازاقستان — وتانىم،
تۋعان جەرىم، كيەلىم.
ارتتىرىپ داڭقىن، اتاعىن،
ەلتاڭباعا باس يەمىن.
2-وقۋشى: رەسمي انىقتاماعا سايكەس “قازاقستان رەسپۋبليكاسىنىڭ مەملەكەتتىك ەلتاڭباسىندا كوگىلدىر ءتۇس اياسىندا شاڭىراق بەينەلەنگەن”.
3-وقۋشى: شاڭىراقتى اينالا كۇن ساۋلەسىندەي تاراپ، ۋىقتار شانشىلعان.
4-وقۋشى: ونى اڭىزدارداعى پىراقتار قاناتى كومكەرىپ تۇر.
5-وقۋشى: ەلتاڭبانىڭ تومەنگى جاعىندا “قازاقستان” دەگەن جازۋ بار.
6-وقۋشى: ەلتاڭبانىڭ باستى بەلگى-نىشانى — شاڭىراق.
7-وقۋشى: تۇندىك — اسپان كۇمبەزىندەگى كۇن بەينەسىن كوز الدىمىزعا اكەلسە، ۋىقتار — ودان تاراپ جاتقان التىن ساۋلەلەردەي اسەر بەرەدى.
8-وقۋشى: قيسىنى تابىلىپ، كەرەگەلەردىڭ دە كورىنىسى بەرىلگەن.
9-وقۋشى: شاڭىراق — وتباسىنىڭ، ودان دا اسىرا العاندا بۇكىل ادامزات ۇياسىنىڭ نىشانى.
10-وقۋشى: ەلتاڭباداعى كەلەسى دەتال — اي ءمۇيىزدى، التىن قاناتتى قوس پىراق بەينەسى.
1-وقۋشى: جىلقى جانۋارى — باتىلدىق، كورەگەندىك پەن ايىرىقشا ەرىك-جىگەر نىشانى دەپ ەسەپتەلەدى.
2-وقۋشى: قانات — اسقاق ارمان نىشانى. بۇل جەردە ول ەڭسەسى بيىك، داۋلەتى تاسىعان تاۋەلسىز مەملەكەت قۇرۋ جونىندەگى ەل مۇراتىن ەسكە سالادى.
3-وقۋشى: ءمۇيىزدىڭ دە نىشاندىق ءمانى بار. ول — ايبىن، ايبات، اقجولتايلىق بەلگىسى.
4-وقۋشى: قوس بىردەي اي ءمۇيىزدى ارعىماقتار كيەلى شاڭىراقتى قوس قاپتالىنان وراپ، پالە-جالادان، قاۋىپ-قاتەردەن قىزعىشتاي قورىپ تۇراتىنداي.
5-وقۋشى: ەلتاڭبادا — بەس بۇرىشتى جۇلدىز بار.
6-وقۋشى: ول — تاۋەلسىز مەملەكەتىمىزدىڭ قۇشاعى بەس قۇرلىققا بىردەي ايقارا اشىق…
7-وقۋشى: الەمدىك وركەنيەتكە ءوز بيىگىمىزدە ىلەسەمىز دەگەن ويعا مەگزەيدى.
8-وقۋشى: ەل اتى مەملەكەتتىڭ تىلدىك جانە تاريحي-مادەني ءرامىزى بولىپ سانالادى.
9-وقۋشى: ولاي بولسا، ەلتاڭبانىڭ تومەنگى جاعىنداعى “قازاقستان” دەگەن جازۋ مەملەكەت اتاۋى رەتىندە ەجەلدەن قولدانىلىپ كەلە جاتقان اتاۋ.
10-وقۋشى: قازاقستان — ءبىزدىڭ تاۋەلسىز مەملەكەتىمىزدىڭ ابىرويلى اتى.
(ساحناعا ج. مالىبەكوۆ پەن ش. ءۋاليحان پورترەتتەرىن كوتەرگەن بالالار شىعادى).
1-وقۋشى: قازاقستان رەسپۋبليكاسى مەملەكەتتىك ەلتاڭباسىنىڭ اۆتورلارى — جانداربەك مالىبەك ۇلى مالىبەكوۆ.
2-وقۋشى: جانە شوت-امان ىدىرىس ۇلى ءۋاليحان.
3-وقۋشى: جانداربەك مالىبەك ۇلى مالىبەكوۆ — وزبەكستانعا ەڭبەگى سىڭگەن ساۋلەتشى.
4-وقۋشى: ول كىسى 1942 جىلى قىزىلوردا وبلىسىنداعى جاڭاقورعان اۋدانىنىڭ ەكپىندى اۋىلىندا دۇنيەگە كەلگەن.
5-وقۋشى: تاشكەنت پوليتەحنيكالىق ينستيتۋتىنىڭ ساۋلەت ونەرى فاكۋلتەتىن بىتىرگەن.
6-وقۋشى: تاشكەنت قالاسىنداعى عىلىمي-زەرتتەۋ ينستيتۋتىنىڭ قالا قۇرىلىسى شەبەرحاناسىنىڭ جەتەكشىسى، جوبالار جونىندەگى باس ساۋلەتشى.
7-وقۋشى: ءقازىر استانا قالاسىندا تۇرادى. گۋميليەۆ اتىنداعى ەۆرازيا ۋنيۆەرسيتەتىندە ءدارىس بەرەدى.
8-وقۋشى: ەلتاڭبا اۆتورلارىنىڭ ءبىرى — شوت-امان ىدىرىس ۇلى ءۋاليحان قازاقستانعا ەڭبەگى سىڭگەن ساۋلەتشى، رەسپۋبليكا مەملەكەتتىك سىيلىعىنىڭ يەگەرى، بەلگىلى قوعام قايراتكەرى.
9-وقۋشى: ول كىسى 1932 جىلى كوكشەتاۋ وبلىسىنىڭ ايىرتاۋ اۋدانىنداعى سىرىمبەت اۋىلىندا تۋعان.
10-وقۋشى: ماسكەۋ ارحيتەكتۋرالىق ينستيتۋتىن بىتىرگەن.
1-وقۋشى: “قازاق قالا قۇرلىسىن جوبالاۋ” ينستيتۋتىنىڭ قىزمەتكەرى، الماتى قالاسى باس ساۋلەتشىسىنىڭ ورىنباسارى، قازاقستان ساۋلەتشىلەر وداعى باسقارماسىنىڭ ءتوراعاسى بولدى. رەسپۋبليكالىق تاريحي جانە مادەني ەسكەرتكىشتەرىن قورعاۋ قوعامىنىڭ ءتوراعاسى.
2-وقۋشى: مەملەكەتتىك ەلتاڭبادا پايدالانىلعان نەگىزگى بوياۋ — التىن ءتۇستى رەڭ.
3-وقۋشى: التىن — بايلىقتىڭ، ادىلدىك پەن كەڭدىكتىڭ بەلگىسى.
4-وقۋشى: ەلتاڭبادا كوگىلدىر ءتۇس تە بار.
5-وقۋشى: ول التىن ءتۇستى رەڭمەن ادەمى جاراسىم تاپقان.
(ساحناداعى بالالاردى تاعى دا ءبىر توپ وقۋشى الماستىرادى. “مەنىڭ — قازاقستانىم” ءانۇرانىنىڭ اۋەنى باياۋ بەرىلە باستايدى).
1-وقۋشى: قۇرمەتتەيمىن جەرىمدى،
وزەن-كولىن، نۋىن دا.
قاستەرلەيمىن ەلىمدى،
ءانۇرانىن، تۋىن دا.
2-وقۋشى: ەلىممەن بىرگە تىلەگىم،
تۋعان جەر — التىن تۇراعىم.
جاتقا دا ايتا بىلەمىن،
ەلىمنىڭ ءانۇرانىن.
3-وقۋشى: مەملەكەتتىك ءانۇران — ەلدىڭ ادەبي-سازدى ءتولقۇجاتى. ونىڭ اۋەنى مەن ءماتىنى شىعارماشىلىق قوس قاناتى ءتارىزدى.
4-وقۋشى: ۇلى كومپوزيتور مۇقان تولەبايەۆتىڭ ەۆگەنيي برۋسيلوۆسكيي جانە لاتيف حاميديمەن بىرىگىپ شىعارعان ايگىلى اۋەنى قازاق ەلىنىڭ ءانتۇمارى مىندەتىن 1944 جىلدان 2005 جىلعا دەيىن — 60 جىلعا جۋىق اتقارىپ كەلدى.
5-وقۋشى: باسقا حالىقتارداعىداي، قازاقتاردىڭ دا رامىزدەرگە، ۇلتتىق گيمنگە اينالىپ كەتكەن اۋەندەرى بار.
6-وقۋشى: سولاردىڭ ءبىرى — “ەلىم-اي” ءانى.
7-وقۋشى: “ەلىم-اي” ءانى 1986 جىلعى جەلتوقسان كوتەرىلىسى كەزىندە ءشامشى قالداياقوۆتىڭ “مەنىڭ قازاقستانىم” انىمەن قاتار شىرقالدى.
(ساحناعا ءشامشى قالداياقوۆتىڭ پورترەتىن كوتەرگەن بالا شىعادى).
8-وقۋشى: ءشامشى قالداياقوۆ — قازاقستان رەسپۋبليكاسى مەملەكەتتىك ءانۇرانىنىڭ اۆتورى، كورنەكتى سازگەر.
9-وقۋشى: قالداياقوۆ — قازاقستان رەسپۋبليكاسى حالىق ءارتىسى، قازاقستان جاستار وداعى سىيلىعىنىڭ يەگەرى.
10-وقۋشى: ول كىسى 1930 جىلى وڭتۇستىك قازاقستان وبلىسىنىڭ وتىرار اۋدانىنداعى ءشاۋىلدىر اۋىلىندا دۇنيەگە كەلگەن.
1-وقۋشى: قاپىلانبەك مالدارىگەرلىك تەحنيكۋمىندا…
2-وقۋشى: حامزا نيازي اتىنداعى تاشكەنت مۋزىكالىق ۋچيلششەسىندە…
3-وقۋشى: جانە قۇرمانعازى اتىنداعى الماتى كونسەرۆاتورياسىنىڭ كومپوزيسيا فاكۋلتەتىندە وقىعان.
(ساحناعا جۇمەكەن ناجىمەدەنوۆتىڭ پورترەتىن كوتەرگەن بالا شىعادى).
4-وقۋشى: “مەنىڭ قازاقستانىم” ءانىنىڭ ءسوزىن اقىن جۇمەكەن ناجىمەدەنوۆ جازعان.
5-وقۋشى: ەلدىڭ سۇيىكتى اۋەنىنە اينالعان بۇل شىعارما دۇنيەگە كەلگەن 1959 جىلى كومپوزيتور دا، اقىن دا كونسەرۆاتوريانىڭ ستۋدەنتتەرى ەدى.
6-وقۋشى: ءاندى العاش رەت راديودا جامال وماروۆا ورىنداعان، كەيىن ريشات ابدۋللين مەن سارا تىنىشتىقۇلوۆا ايتتى.
7-وقۋشى: جۇمەكەن ناجىمەدەنوۆ — كورنەكتى اقىن، قازاقستان جاستار وداعى سىيلىعىنىڭ يەگەرى.
8-وقۋشى: ول كىسى 1935 جىلى اتىراۋ وبلىسىنىڭ قۇرمانعازى اۋدانىنداعى قوشالاق اۋىلىندا دۇنيەگە كەلگەن.
9-وقۋشى: قۇرمانعازى اتىنداعى الماتى مەملەكەتتىك كونسەرۆاتورياسىنىڭ حالىق اسپاپتارى فاكۋلتەتىندە…
10-وقۋشى: جانە ماسكەۋدەگى گوركيي اتىنداعى ادەبيەت ينستيتۋتى جانىنداعى جوعارى ادەبي كۋرستاردا وقىعان.
1-وقۋشى: 2006 جىلدىڭ 6 قاڭتارىندا ۇكىمەتتىڭ ۇسىنىسى بويىنشا مەملەكەتتىك ءانۇراننىڭ اۋەنى مەن ءماتىنىن جاڭارتۋ كوزدەلدى.
2-وقۋشى: جاڭا ءانۇران باسپاسوزدە جاريالانعان كۇننەن — 10 قاڭتاردان باستاپ كۇشىنە ەندى.
3-وقۋشى: جاڭا ءانۇران ەلگە بۇرىننان تانىس “مەنىڭ قازاقستانىم” ءانىنىڭ نەگىزىندە دۇنيەگە كەلدى.
4-وقۋشى: مەملەكەتتىك رامىزگە اينالعان ءاننىڭ ماتىنىنە ءبىرقاتار وزگەرىستەر ەنگىزىلدى.
5-وقۋشى: تاڭداپ الىنعان جيىرما جولداعى ەلۋ توعىز ءسوزدىڭ جيىرما بەسى وزگەرىسكە ۇشىرادى.
(ساحناعا ن. ءا. نازاربايەۆتىڭ پورترەتىن كوتەرگەن بالا شىعادى).
6-وقۋشى: وسىدان كەيىن، جوبانى تالقىلاۋ كەزىندە ءانۇران اۆتورلارى قاتارىنا قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازاربايەۆتى قوسىپ، ونىڭ اۆتورلىق قۇقىن رەسمي بەكىتۋ جونىندە ماسەلە كوتەرىلدى.
7-وقۋشى: پارلامەنت ءانۇران ءماتىنىنىڭ اۆتورلارى جۇمەكەن ناجىمەدەنوۆ پەن نۇرسۇلتان نازاربايەۆ ەكەنىن ايعاقتايتىن شەشىم قابىلدادى.
8-وقۋشى: نۇرسۇلتان ءابىش ۇلى نازاربايەۆ — 1940 جىلى الماتى وبلىسىنىڭ قاراساي اۋدانىنداعى شامالعان اۋىلىندا دۇنيەگە كەلگەن.
9-وقۋشى: ماماندىعى — ينجينەر-مەتالۋرگ.
10-وقۋشى: ەڭبەك جولىن تەمىرتاۋدا بولات بالقىتۋشى بولىپ باستاپ…
1-وقۋشى: كاسىپورىن، قالا جانە وبلىس دەڭگەيىندە باسشىلىق جۇمىستار ىستەدى.
2-وقۋشى: قازاق كسر-نىڭ ۇكىمەت باسشىسى جانە ەلباسى لاۋازىمدى قىزمەتتەرىن اتقاردى.
3-وقۋشى: 1991 جىلدىڭ جەلتوقسان ايىنان قازاقستان رەسپۋبليكاسىنىڭ پرەزيدەنتى.
4-وقۋشى: “مەنىڭ قازاقستانىم” ءانى جارتى عاسىر بويى ەلمەن بىرگە جاساپ، ەلمەن بىرگە مۇڭايىپ، ەلمەن بىرگە قۋانىپ كەلەدى.
5-وقۋشى: “مەنىڭ قازاقستانىم” ءانىن ونىڭ اۆتورلارى ءانۇرانعا ارناپ جازباعان.
6-وقۋشى: ولار بۇل شىعارمانى ءانۇران بايقاۋىنا ءوز قولدارىمەن ۇسىنعان دا ەمەس.
7-وقۋشى: دۇنيەدەن ەرتە وزعان ساڭلاقتاردىڭ ارتىنداعى جوقشىسى دا، باعالايتىن دا — حالىقتىڭ ءوزى.
8-وقۋشى: بۇكىل ەلدىڭ، حالىقتىڭ قالاۋىمەن ءانۇرانعا اينالعان “مەنىڭ قازاقستانىم” ءار شاڭىراقتىڭ، ەل شاتتىعىنىڭ جالاۋىنا اينالدى.
(قازاقستان رەسپۋبليكاسىنىڭ مەملەكەتتىك ءانۇرانىنىڭ فونوگرامماسى قويىلىپ، وقۋشىلار زالداعى كورەرمەندەرمەن قوسىلىپ، وڭ قولدارىن، كەۋدەلەرىنە ۇستاپ ءانۇراندى ورىندايدى).
اكەسىنە — ۇل ايبىن، شەشەسىنە — قىز ايدىن
(وتباسىلىق كوڭىلدى جارىستىڭ سەنارلىق جوسپارى)
زال ءىشى اسەم بەزەندىرىلگەن. ونىڭ ۇزىنا بويىنىڭ ءبىر قاپتالىندا جانكۇيەرلەر تريبۋناسى، وعان قاراما-قارسى ءادىل قازىلار القاسىنىڭ ستولى ورنالاسقان. “اكەسىنە — ۇل ايبىن، شەشەسىنە — قىز ايدىن”، “كوڭىلدى جارىسقا قاتىسۋشىلارعا جالىندى سالەم!” دەگەن سياقتى جازۋلارى بار پلاكاتتار ىلىنگەن. ءبىر شەتتە ەلەكترلى تابلو.
(زالداعى جانكۇيەرلەر گۋىلىن فانفار ءۇنى بولەدى)
ديكتور: بارىڭە! بارىڭە! بارىڭە! قۇلاق قويىپ تىڭداڭىزدار!
(كوڭىلدى مۋزىكا شارىقتايدى. وسى كەزدە زالدىڭ ەكى جاعىنان ەكى جۇرگىزۋشى شىعادى)
ءى جۇرگىزۋشى: توقتاڭىزدار! توقتاي تۇرىڭىزدار!
ءىى جۇرگىزۋشى: ءسال سابىر ەتىپ، مۋزىكانى باياۋلاتىڭىزدار!
ءى جۇرگىزۋشى: ەڭ الدىمەن بۇل جەرگە نە ءۇشىن جينالعانىمىزدى ءبىلىپ الۋىمىز كەرەك ەمەس پە؟
ءىى جۇرگىزۋشى: ارينە، كوماندا اراسىندا وتەتىن كوڭىلدى جارىستى تاماشالاۋعا جينالىپ وتىرمىز. ونى بالالاردىڭ بارلىعى دا بىلەدى.
ءى جۇرگىزۋشى: ال، ول جارىس قالاي اتالادى؟
ءىى جۇرگىزۋشى (جانكۇيەرلەرگە قارايدى): قانە، بالالار…
جانكۇيەرلەر (حورمەن): “اكەسىنە — ۇل ايبىن، شەشەسىنە — قىز ايدىن”!
ءى جۇرگىزۋشى: ولاي بولسا، زالعا جارىسقا قاتىسۋشى كوماندالاردى شاقىرايىق.
زالعا سپورتتىق كيىم كيگەن ءبىرىنشى كوماندا مۇشەلەرى جۇگىرىپ شىعىپ، بەلگىلەنگەن ورىنعا ساپ تۇزەپ تۇرادى.
ءىى جۇرگىزۋشى: ءبىرىنشى توپ كومانداسى…
جانكۇيەرلەر: “اقبوتا”!
زالعا سپورتتىق كيىم كيىنگەن ەكىنشى كوماندا مۇشەلەرى جۇگىرىپ شىعىپ، بەلگىلەنگەن ورىنعا ساپ تۇزەپ تۇرادى.
ءى جۇرگىزۋشى: ەكىنشى توپ كومانداسى…
جانكۇيەرلەر: “ەرتوستىك”!
ءىى جۇرگىزۋشى: ەندى بۇگىنگى كوڭىلدى جارىسقا قاتىسۋشى كوماندالار نامىسىن قورعايتىن وتباسى مۇشەلەرىمەن جەكە-جەكە تانىسىپ وتەيىك.
ءى جۇرگىزۋشى: “اقبوتا” كومانداسىندا…
ءىى جۇرگىزۋشى: …….. تار وتباسى. شەشەسى…….(مەكەمەنىڭ اتى) (قىزمەتى) بولىپ ەڭبەك ەتەدى. اكەسى….. (مەكەمەنىڭ اتى) — (قىزمەتى) بولىپ جۇمىس ىستەيدى. ولاردىڭ بالالارى…..
وسىلايشا كومانداداعى 4 وتباسى مۇشەلەرىن جەكە-جەكە تانىسىتىرىپ، اتى اتالعان وتباسى مۇشەلەرى ءبىر كىسىدەي العا ادىمدايدى. كوماندا مۇشەلەرى تولىق تانىستىرىلىپ بولعاندا ساپتا تۇرعانداردىڭ بارلىعى ءبىر ادىم كەرى اتتاپ، باستاپقى ورىندارىنا تۇرادى.
ءى جۇرگىزۋشى: “ەرتوستىك” كومانداسىندا…
ءىى جۇرگىزۋشى: ….. تار وتباسى.
(وتباسى مۇشەلەرى ءبىر ادىم العا اتتايدى) تانىستىرۋ باستاپقى ۇلگى بويىنشا.
(مۋزىكا).
ءى جۇرگىزۋشى: مىنە، ءبىز جارىسقا قاتىسۋشى ەكى كوماندا مۇشەلەرىمەن دە تولىق تانىسىپ وتتىك. ەندى وسى سايىسقا دايارلىق بارىسىن، مەرەكەگە قاتىسۋشىلاردىڭ كوڭىل-كۇيلەرىنىڭ قانداي ەكەنىن بىلسەك.
ءىى جۇرگىزۋشى: ونى ءبىلۋ سونشالىقتى قيىن ەمەس. وسى زالداعىلاردىڭ وزدەرىنەن سۇرايىق. كوماندا مۇشەلەرى، سىزدەردىڭ كوڭىل-كۇيلەرىڭىز قانداي؟
كوماندا: تا-ما-شا!
ءى جۇرگىزۋشى: ال جانكۇيەرلەر بۇعان نە دەر ەكەن؟
جانكۇيەرلەر: تا-ما-شا!
ءىى جۇرگىزۋشى: ال ەندى، اسا قۇرمەتتى قازىلار القاسى، ارينە… (القا مۇشەلەرىنە قارايدى)
قازىلار: (بارلىعى باس بارماقتارىن شوشايتىپ): تا-ما-شا!
ءى جۇرگىزۋشى: وتە جاقسى! تاماشا!
ءىى جۇرگىزۋشى: ءيا، ءيا، بۇگىنگى ءبىزدىڭ جارىسىمىزعا قاتىسۋشىلار وتە جاقسى سپورتتىق فورمادا، كوتەرىڭكى كوڭىل كۇيمەن كەلگەن ەكەن.
ءى جۇرگىزۋشى: ولاي بولسا، وسىنداي كوڭىل-كۇيمەن كوڭىلدى جارىستى باستاپ كەپ جىبەرەيىك…
ءىى جۇرگىزۋشى: ايتپاقشى، ءبىز وسى ءادىل قازىلار القاسىنىڭ مۇشەلەرىن تانىستىرۋدى ەستەن شىعارىپ الدىق-اۋ دەيمىن؟
ءى جۇرگىزۋشى: جاڭا عانا ول كىسىلەردىڭ بارلىعى ءبىر اۋىزدان “كوڭىل-كۇيىمىز وتە تاماشا” دەدى ەمەس پە؟
ءىى جۇرگىزۋشى: ەندى جەكە-جەكە سۇراپ كورەيىك.
ءى جۇرگىزۋشى: سۇراساق، سۇرايىق…
(جۇرگىزۋشىلەر قازىلار القاسى ورنالاسقان ستولعا جاقىنداپ، ميكروفون ۇسىنادى)
ءى جۇرگىزۋشى: بۇگىنگى كوڭىلدى تەلەجارىستان نە كۇتەسىز؟
جاۋاپ:
ءى جۇرگىزۋشى: القا مۇشەسى… (ءاتى-جونى، قىزمەتىن ايتىپ تانىستىرادى).
ءىى جۇرگىزۋشى: كوماندا مۇشەلەرىنىڭ بويىنان قانداي قاسيەتتەردى كورگىڭىز كەلەدى؟
جاۋاپ:
ءىى جۇرگىزۋشى: (تانىستىرادى).
ءى جۇرگىزۋشى: جانكۇيەرلەر تاراپىنان نەنى تالاپ ەتەسىز؟
جاۋاپ:
ءى جۇرگىزۋشى: القا مۇشەسى (تانىستىرادى).
ءىى جۇرگىزۋشى: زالدا وتىرعان كورەرمەندەرگە نە ايتار ەدىڭىز؟
جاۋاپ:
ءىى جۇرگىزۋشى: القا ءمۇشەسى (تانىستىرادى).
ءى جۇرگىزۋشى: ءادىل قازىلار القاسى، ياعني ءسىزدىڭ ارىپتەستەرىڭىز جارىسقا تورەشىلىك جاساۋدا قانداي قاعيدانى باسشىلىققا الادى؟
جاۋاپ:
ءى جۇرگىزۋشى: مىنە، ءدال ءقازىر باستالعالى وتىرعان “اكەسىنە — ۇل ايبىن، شەشەسىنە — قىز ايدىن” دەپ اتالاتىن كوڭىلدى جارىسقا تورەشىلىك ەتەتىن ءادىل قازىلار القاسىنىڭ ءتور اعاسى — (تانىستىرادى).
ءىى جۇرگىزۋشى: سونىمەن بارلىعى ويداعىداي شىققان سياقتى. ەندى جارىستى باستاساق تا بولادى.
ءى جۇرگىزۋشى: قالاي، بارلىقتارىڭىز دا دايىنسىزدار عوي؟ بالالار، كوڭىلدى جارىستى باستايمىز با؟
زالداعىلار (حورمەن): باستايمىز.
ءىى جۇرگىزۋشى: ولاي بولسا، العاشقى ەستافەتا “باستاۋ” دەپ اتالادى.
(گونگ ۇنىمەن ويىن باستالىپ كەتەدى).
ويىن بارىسىنان رەپورتاجدى كومەنتاتور داۋىس كۇشەيتكىش ارقىلى جۇرگىزىپ وتىرادى. جانكۇيەرلەر قولىندا “العا، اقبوتا!” “ەرلەدىڭ، ەرتوستىك! ”، “جەڭىس، جەڭىس، جەڭىس كەرەك!” دەگەن سياقتى ۇراندار، ءتۇرلى ۇلكەن ويىنشىقتار.
“باستاۋ ەستافەتاسى”. (كوماندالار تولىق قۇرامدا قاتىسادى). ءار كەزەڭدە ءبىر وتباسى مۇشەلەرى وينايدى.
1-كەزەڭ: شەشەسى مەن اكەسى قولدارىن ايقاستىرا ۇستاپ، وعان بالالارىن وتىرعىزادى. بالا كەلەسى بەتكە جەتكەنشە جول بويىنا تىگىلگەن جالاۋشىلاردىڭ ءبارىن جيناپ وتىرۋى كەرەك.
2-كەزەڭ: شەشەسى مەن اكەسى ەكى اياعىن ۇستاعان بالا كەلەسى بەتكە جەتكەنشە ارالىقتى قولىمەن ءجۇرىپ ءوتۋى كەرەك.
3-كەزەڭ: شەشەسى مەن اكەسى بالالارىن ورتاعا الىپ، ءبارى قول ۇستاسىپ، تەرىس قاراي (ارقالارىن جۇگىرۋ باعىتىنا بەرىپ جۇگىرەدى).
4-كەزەڭ: كوزدەرى بايلانعان شەشەسى مەن اكەسى جۇگىرۋ باعىتىنا تەرىس قاراپ تۇرادى. ال ورتادا ەكەۋىنىڭ قولىنان ۇستاعان كوزى بايلانباعان بالا جۇگىرۋ ساتىندە ولارعا باعىت بەرۋشى بولادى.
(مۋزىكا).
“باستاۋ” ەستافەتاسى اياقتالىسىمەن زالداعى بالالارعا “نۋ، پوگودي!” سەريالىنان سپورتقا قاتىسى بار مۋلتفيلم كورسەتىلەدى. وسى ساتتە ءادىل قازىلار جەڭىمپازدى انىقتاپ، مۋلتفيلمنەن سوڭ ول حابارلانادى دا، تابلودا ۇپاي ساندارى جازىلادى. گونگ ۇنىمەن كەلەسى ويىن باستالادى.
“تەسكەنتاۋ” ويىنى (ءار كوماندادادان ەكى وتباسى قاتىسادى. ولاردىڭ قولدارىندا 4 مەترلىك، ەكى جاق باسى اشىق ۇلكەن قانارلار).
ءار سەميانىڭ اتا-اناسى قاناردىڭ ەكى باسىنان توننەلگە ۇقساتىپ ۇستايدى. بەلگى بەرىلگەندە بالالار ءبىرىنىڭ سوڭىنان ءبىرى قاناردىڭ ءبىر باسىنان ەڭبەكتەپ كىرىپ، ەكىنشى جاعىنان شىعىپ وتىرادى. بالالار ءوتىپ بولعان قاناردى ۇستاپ تۇرعان اتا-انالار ونى ارى قاراي جالعاستىرۋعا اسىعادى. ويىن زالدىڭ مارەدەن سورەگە دەيىن، نەمەسە سورەدەگى بەلگىنى اينالىپ باستاپقى ورىندارىنا كەلگەنگە دەيىن جالعاسادى.
ورتاعا وقۋشىلار سارايى بالەت ۇيرىمەسىنىڭ بيشىلەرى شىعادى. وسى ساتتە ويىنعا قاتىسۋشىعا ميكروفون ۇسىنىلىپ سۇحبات جۇرگىزىلەدى.
سۇحبات سۇراقتارى:
— “ باستاۋ” ەستافەتاسى بويىنشا سەندەردىڭ كوماندالارىڭ جەڭىسكە جەتتى. سەن وعان قۋانىشتىسىڭ عوي، يا؟ ەگەر قۋانىش دەگەن ءتاتتى تورت سياقتى بولۋگە بولاتىن بولسا، ەڭ ۇلكەن بولىگىن كىمگە ۇسىنار ەدىڭ؟
— “باستاۋ” مەن “تەسكەنتانۋدىڭ” قايسى قىزىقتىراق بولدى؟ نەگە؟
— ەكىنىشى ويىندا سەندەردىڭ كوماندالارىڭ قانداي قاتەلىكتەر جىبەردى دەپ ويلايسىڭ؟
— جارىستىڭ ەڭ سوڭىندا قاي كوماندا جەڭىپ شىعادى دەپ ويلايسىڭ؟ نەگە؟
سۇحاباتتان سوڭ ۇپاي سانى شىعارىلىپ، تابلودا كورسەتىلەدى.
ديكتور: كەلەسى ويىن “دوپ ەستافەتاسى” دەپ اتالادى.
گونگ ۇنىمەن ويىن باستالىپ كەتەدى.
“دوپ” ەستافەتاسى — ويىنعا ءار كوماندادان ەكى وتباسى قاتىسادى. وعان ۇرمەلى ۇلكەن دوپتار الىنادى.
1-كەزەڭ (اكەلەر): دوپ ويىنشىلاردىڭ ءبىرىنىڭ كەۋدەسى مەن ەكىنشىسىنىڭ جاۋىرىنىنىڭ اراسىندا بولادى. ولار وسى قالىپپەن دوپتى تۇسىرمەي، زالدىڭ ەكىنشى باسىندا قويىلعان بەلگىنى اينالىپ ءوتىپ، دوپتى مامالارعا بەرەدى.
2-كەزەڭ (شەشەلەر): ەكى ويىنشى دوپتى باستارىنىڭ اراسىنا قىسىپ الىپ جۇگىرۋگە ءتيىس. مارە سىزىعىنا قايتا اينالىپ كەلىپ دوپتى ۇلدارعا بەرەدى.
3-كەزەڭ (ۇلدار): ەكى ويىنشى دوپتى جامباستارىنىڭ اراسىندا الىپ جۇگىرەدى.
4-كەزەڭ (قىزدار): ەكى ويىنشى دوپتى يىقتارىنىڭ اراسىنا قىستىرىپ الىپ جۇگىرەدى. ولار بەلگىنى اينالىپ،مارەگە قايتىپ كەلگەندە ويىن اياقتالادى.
جارىس وتكىزىلىپ جاتقان ساتتە “دوپ” ەستافەتاسىنا قاتىسقاندارعا ميكروفون ۇسىنىلىپ، سۇحبات جۇرگىزىلەدى.
سۇحبات سۇراقتارى:
(شەشەلەرگە): — وسى كوڭىلدى جارىستىڭ وتكىزىلۋى تۋرالى نە ايتاسىز؟
— بالالارىڭىزدىڭ ناعىز سپورتشى ماماندىعىن مەڭگەرۋىن قالايسىز با؟
(اكەلەرگە): — ءوز بالاڭىزدىڭ وسى جاسىندا ءوزىڭىز قانداي ويىندار ويناندارىڭىز ەسىڭىزدە مە؟
— الدىندا وتكەن ەكى ويىنمەن مىنا “دوپ” ەستافەتاسى تۋرالى نە ايتار ەدىڭىز؟
ويىن اياقتالعان كەزدە زال تورىندەگى ەكراندا “ەرتوستىك” كومانداسىنىڭ مەكتەپتەردەگى سپورت ساباعىنىڭ وتكىزىلۋى تۋرالى سيۋجەت كورسەتىلەدى. وسى ساتتە جانكۇيەرلەرگە ميكروفون ۇسىنىلىپ سۇحبات جۇرگىزىلەدى.
سۇحبات سۇراقتارى:
— (جەڭىلگەن كوماندا جانكۇيەرلەرىنە): جارىسقا قاتىسۋشىلار اراسىنان قاي كوماندانىڭ ويىنى ۇناپ وتىر؟
— جاڭاعى “دوپ ەستافەتاسىنىڭ” ەڭ قيىن كەزەڭى قايسى بولدى؟
— شەشەلەر مەن اكەلەر ويناي الا ما؟
— ءوز اتا-اناڭمەن ۇيدە قانداي ويىن وينايسىڭدار؟
ويىن اياقتالدى. ۇپاي سانى انىقتالىپ، تابلودا كورسەتىلەدى.
ديكتور: “اقبوتا” جانە “ەرتوستىك” كوماندالارىنىڭ مۇشەلەرى، “ءسوز قۇراۋ” وينىنا دايىندالىڭدار.
گونگ ۇنىمەن ويىن باستالىپ كەتەدى.
“ءسوز قۇراۋ” ويىنىنا ءار كوماندادان ءۇش وتباسى قاتىسادى. ولار ءبىر شەتتە رەتسىز ءۇيىلىپ جاتقان (ەكى كوماندانىڭ كۋبيكتەرى ءبىر جەردە) ارىپ-كۋبيكتەردەن سوزدەر قۇراستىرۋلارى كەرەك.
“اقبوتا” كومانداسىنا — قىزعالداق.
“ەرتوستىك” كومانداسىنا — سارعالداق.
قاجەتتى كۋبيكتەر ق=ز، ى=ق، ز=ق، ع=2، ا=5، ل=2، د=2، س=1.
بارلىعى: 18 كۋبيك.
ويىن اياقتالعان سوڭ ەكراندا ءار كوماندادان ءبىر-بىر وتباسىنىڭ بوس ۋاقىتتارىن بالالارىمەن وتكىزۋى جونىنىندە سيۋجەتتەر كورسەتىلەدى. سودان كەيىن ۇپاي سانى انىقتالىپ، تابلودا كورسەتىلەدى.
ديكتور: كەلەسى ويىندا وتباسى مۇشەلەرىنىڭ ۇيىمشىلدىقتارى مەن تاپقىرلىقتارى ەرەكشە كوزگە تۇسەدى. سوندىقتان ءبىز ونى “ماما، پاپا جانە مەن” دەپ اتادىق.
گونگ ۇنىمەن ويىن باستالىپ كەتەدى.
“شەشەم، اكەم جانە مەن” ويىنىنىدا ءار كوماندادان ءبىر-بىر وتباسى مۇشەلەرى قاتىسادى. مارەدەن سورەگە دەيىن اتا-اناسى بالالارىنىڭ اياقتارىن وزدەرىنىڭ ءبىر-بىر اياقتارىنىڭ ۇستىنە قويعىزىپ الىپ جۇگىرەدى. سورەدە تۇرعان 2 ساموكاتقا بالا ەكى اياعىن قويىپ، ونىڭ بىرەۋىنىڭ ءرۋلىن ماماسى، ەكىنشىسىنىكىن پاپاسى ۇستاپ مارەگە قايتا ورالادى.
بۇل ويىن اياقتالىسىمەن ورتاعا جاس گيمناستار شىعىپ، ونەر كورسەتىپ جاتقاندا، ويىنعا قاتىسقان وتباسى مۇشەلەرىنەن سۇحبات الىنادى.
سۇحبات سۇراقتارى:
(اتا-اناعا): — بوس ۋاقىتىڭىزدىڭ قانشالىقتى بولىگىن بالالارىڭىزبەن بولۋعا ارنايسىز؟ جالپى وعان مۇمكىنشىلىك بار ما؟
— وتباسىنىڭ بوس ۋاقىتىنداعى ەڭ سۇيىكتى ىستەرىڭىز قانداي؟
(بالالارعا): — مەكتەپتەگى كۇندەر جاقسى ما، جوق ۇيدە كوبىرەك بولعاندى ۇناتاسىڭ با؟ سەبەبى؟
— سەن دەمالىس كۇندەرىندە اتا-اناڭمەن بىرگە بولعاندا نەمەن اينالىسقاندى جاقسى كورەسىڭ؟
ۇپاي سانى حابارلانادى دا، القا مۇشەسى كەلەسى ەستافەتانىڭ “جولىڭ بولسىن، شولاۋشى” دەپ اتالاتىنىن حابارلايدى.
گونگ ۇنىمەن ويىن باستالادى.
“جولىڭ بولسىن، جولاۋشى!” ەستافەتاسىنا ءار كوماندادان ەكى وتباسى قاتىسادى. ءبىرىنشى جۇپتار مارەدە، ەكىنشى جۇپتار سورەدە تۇرادى.
1-كەزەڭ: اتا-انالار شيىرشىقتالىپ ورالعان بىرنەشە كىلەم-دوروجكانىڭ مارەدەن سورەگە دەيىن توسەپ وتىرادى. ءاربىر كىلەم توسەلىپ بولعاندا وعان جالعاستىراتىن كىلەمدى الۋ ءۇشىن ءاربىر جولى سورە سىزىعىنان اكەتۋگە ءتيىس.
2-كەزەڭ: ءار كوماندادان ءبىر قىز بالا توسەلگەن كىلەم ۇستىمەن ساموكاتپەن ءجۇرىپ وتەدى. كىلەم توسەلىپ ۇلگەرمەسە، ارى قاراي كەتپەي، كۇتۋگە ءتيىس.
3-كەزەڭ: سورەدە تۇرعان اتا-انالار كىلەمدەردى شيىرشىقتاپ قايتادان جينايدى. ءار كىلەم شيىرشىقتالعان سايىن ونى سورەگە اكەلىپ تاستاپ وتىرادى.
4-كەزەڭ: ءار كوماندادان ءبىر ۇل بالا كىلەمنىڭ جولىمەن ۆەلوسيپەدپەن ءجۇرىپ وتىرادى. ەگەر جولىنداعى كەلەسى كىلەم ءالى جينالىپ ۇلگەرمەسە، ونى كۇتۋگە ءتيىس.
ويىن ساتىندە مۇعالىمدەرمەن اڭگىمە-سۇحبات جۇرگىزىلەدى.
سۇحبات سۇراقتارى:
— بۇگىنگى وتكىزىلىپ وتىرعان كوڭىلدى جارىستار بالالاردىڭ بويىندا قانداي قاسيەتتەردى قالىپتاستارادى دەپ ويلايسىز؟
— اتا-انالاردىڭ مەكتەپپەن بايلانىستارى قانداي؟ ولار بالا تاربيەسىندە قانداي كومەك كورسەتەدى؟
— وزدەرىڭىزدىڭ مەكتەپتەرىڭىزدە وسىنداي جارىستار ءجيى وتكىزىلە مە؟
— وسىنداي جارىسقا ءوزىڭىز قاتىسقان بولار ما ەدىڭىز؟
ۇزىلىستە ەكى مەكتەپ وقۋشىلارىنىڭ بىر-بىردەن كونسەرتتىك نومەرلەرى كورسەتىلەدى. سودان ۇپاي سانى حابارلانىپ، گونگ ۇنىمەن كەلەسى ەستافەتا باستالىپ كەتەدى.
“شەڭبەرلى ەستافەتا” ويىندارىنا كوماندا مۇشەلەرى تولىق قاتىسادى. ءار كومانداداعى 2 وتباسى سورەدە، 2 وتباسى مارەدە تۇرادى. ويىنعا بىردەي ديامەترلى شەڭبەرلەر الىنادى.
1-كەزەڭ: يمەك تەمىرمەن شەڭبەردى دوڭگەلەتىپ جۇگىرەدى.
1-پاپا: مارە-سورە. 2-اكە: سورە-مارە.
2-كەزەڭ: شەڭبەردى بەلدەرىنە اينالدىرىپ جۇگىرەدى.
1-ماما: مارە-سورە. 2-شەشە: سورە-مارە.
3-كەزەڭ: شەڭبەردى سكاكالكا ەتىپ جۇگىرۋ.
1-قىز: مارە-سورە. 2-قىز: سورە-مارە.
4-كەزەڭ: ەكى ۇل شەڭبەر ىشىنە كىرىپ الىپ جۇگىرەدى. مارە-سورە.
5-كەزەڭ: اياقتارىنا روليكتى كونكي بايلاعان 2 شەشە ءبىر شەڭبەر ىشىنە كىرىپ الىپ جۇگىرەدى. سورە-مارە.
6-كەزەڭ: ەكى اكە ءبىر-بىر اياقتارىن جۇپتاپ بايلاپ الىپ جۇگىرەدى. مارە-سورە.
ويىن اياقتالىسىمەن ورتاعا جۇرگىزۋشىلەر جۇگىرىپ شىعادى.
ءى جۇرگىزۋشى: بىر-ەكى-ۇش... ءبىز ءقازىر كوڭىلدى جارىستى تاماشالاۋعا كەلگەن بالالارعا، اتا-انالارعا تاربيەشى تاتەلەرگە، ءادىل قازىلار القاسىنداعى اعالار مەن اپالارعا قىزىق-قىزىق سۇراقتار قويامىز. قانە، كىم ءبىرىنشى جاۋاپ بەرەدى ەكەن. الدىمەن سۇراقتى مۇقيات دىڭداپ الايىق.
گونگ ۇرىلادى.
ءىى جۇرگىزۋشى: بالا بولعان جاقسى ما، ۇلكەن بولعان جاقسى ما؟ (ميكروفون الدىمەن بالالاردىڭ بىرىنە، سوسىن ۇلكەندەردىڭ بىرىنە ۇسىنىلادى). سەبەبى؟
ءى جۇرگىزۋشى: اكەڭ مەن شەشەڭ سەنىڭ ايتقان ءتىلىڭدى ءارقاشان دا الا ما؟ (ميكروفون بالالارعا ۇسىنىلادى).
ءىى جۇرگىزۋشى: جارىس بارىسى نەسىمەن قۋانتادى؟ (تورەشىلەرگە).
ءى جۇرگىزۋشى: بالالارىڭىز ايتقان وتىنىشكە قالاي قارايسىزدار؟ (اتا-انالارعا).
ءىى جۇرگىزۋشى: بۇگىنگى جارىستاعى ەڭ كوڭىلدى ەستافەتا قايسى بولدى؟ (قولدارىن كوتەرگەندەرگە).
ءى جۇرگىزۋشى: وزدەرىڭ قانداي ويىن ۇسىنعان بولار ەدىڭدەر؟ (قول كوتەرگەندەرگە).
ءىى جۇرگىزۋشى: ويىنعا قاتىسۋشىلار اراسىندا ەڭ جاقسى ونەر كورسەتكەندەر كىمدەر — اكەلەر، شەشەلەر، ۇلدار، الدە قىزدار ما؟ (الدىمەن بالالار، مۇعالىمدەر، القا مۇشەلەرى، تاعى بالالار).
جۇرگىزۋشىلەر وسىلايشا زالداعىلارعا ءار ءتۇرلى سۇراقتار قويۋدى اياقتاعان كەزدە، كومەنتاتور ميكروفون ارقىلى ەڭ سوڭعى ويىن تۋرالى حابارلاما جاسايدى. تابلودا سوڭعى ويىن “شەڭبەرلى ەستافەتا” قورتىندىسى بويىنشا ۇپاي ساندارى اۋىستىرىلادى.
كومەنتاتور: مىنە، بۇگىنگى “اكەسىنە — ۇل ايبىن، شەشەسىنە قىز ايدىن” دەپ اتالعان كوڭىلدى جارىسىمىز اياقتالىپ تا كەلەدى. ويىن ەسەبى... ءدال قازىرگى ساتتە، سوڭعى “شەڭبەرلى ەستافەتا” قورتىندىسى بويىنشا ... مەكتەپتىڭ... كومانداسى... ۇپايمەن الدا كەلەدى. ەندەشە كوڭىلدى جارىستىڭ ەڭ سوڭعى ويىنىن تاماشالايىق. ول “قىرىقاياق” دەپ اتالادى.
گونگ ۇنىمەن “قىرىقاياق” ويىنى باستالدى.
“قىرىقاياق” ويىنىنا ەكى كوماندا دا تولىق قۇرامىندا قاتىسادى. ويىن باستالۋىنا بەلگى بەرىلەر الدىندا ءار كوماندا مۇشەلەرى ءبىر-بىرىنىڭ بەلدەرىنەن ۇستاپ ۇزىن تىزبەك جاساپ، زال ورتاسىنا قويىلعان بورەنەنىڭ ەكى قاپتالىنا ورنالاسادى. بەلگى بويىنشا قوزعالىسقا كەلگەن “قىرىقاياقتىڭ” العاشقى ويىنشىسى قارسىلاس كوماندانىڭ تىزبەك سوڭىنداعى ويىنشىسىن ۇستاپ العاندا ويىن اياقتالادى.
ءبىرىنشى تۇرعان ويىنشى قارسىلاستارىنا جەتىپ العان ساتتە، ءوز كوماندالارىنىڭ تىزبەگى ءۇزىلىپ قالسا، ول ەسەپكە الىنبايدى. كەرىسىنشە ول قارسىلاس كوماندانىڭ ءۇزىلىپ قالعان تىزبەگىنىڭ سوڭىن ۇستاپ السا، ويىن اياقتالعان بولىپ ەسەپتەلەدى.
ويىن وسىمەن اياقتالادى. كوڭىلدءى مۋزىكا. سىيلىقتار تاپسىرۋ، قۇتتىقتاۋلار. كوماندا مۇشەلەرى، جانكۇيەرلەر، ءادىل قازىلار مۇشەلەرى جەكە-جەكە ورتاعا شاقىرىلادى.
You Might Also Like
