InfoHub Logo

اقىن سەرىك ساتانوۆتىڭ «حالىق تاعدىرى، ۇلت ابىرويى» اتتى ماقالاسىن وقىپ شىقتىم. ەستىر قۇلاقتى ەنجار قالدىرا المايتىنداي جان شىرىلى، جۇرەك ءدىرىلى. توڭىرەگىمىزدە بولىپ جاتقان قۇبىلىستاردىڭ، اسىرەسە، ەكونوميكالىق تىرشىلىكتىڭ قۋانتارىنان قىنجىلتارى كوپ ەكەنى راس. الايدا، ەجەلگى دۇنيە دانىشپاندارىنىڭ: «جىلاما دا، كۇلمە دە، بايىبىنا بارا ءبىل» دەگەن وسيەتىن وسىندايدا ەسكەرمەگەندە، قاشان ەسكەرەمىز؟!

بايىبىنا بارا بىلسەك، ءبىزدىڭ كەزەڭىمىزدىڭ ەڭ باستى جەتىستىگى — حالقىمىزدىڭ عاسىرلاپ كۇتكەن تاۋەلسىزدىككە ەندى قولى جەتىپ وتىرعاندىعى. بۇعان دەيىن دىمىمىزدى ىشىمىزدە قىپ، تىرپ ەتكىزبەي كەلگەن الەمدىك يمپەريانى كۇللى ادامزات بوپ زامانا ىرقىنا كوندىرۋدىڭ ورايى ەندى كەلگەندىگى.

ءبىر كەزدە دۇنيەنى دىرىلدەتكەن يمپەريالاردىڭ قايسىسى قۇلاسا دا، ورنىندا قۇلدىراعان ەكونوميكا، كۇيرەگەن الەۋمەتتىك قاتىناستار، سولاردان ءوربيتىن ساياسي الاۋىزدىق پەن جانجالدار قالادى. ونداي جاعدايدا دۇنيەگە كەلگەن ازاتتىق پەن تاۋەلسىزدىكتىڭ بۋىنى بەكىپ، بۇعاناسى قاتا قويۋى دا وڭايعا تۇسپەيدى.

قازىرگى تۇرمىستىڭ اۋىرلىعى، ماقالادا ايتىلعان ەكونوميكالىق كەلەڭسىزدىكتەردىڭ بارلىعى دەرلىك الەۋمەتتىك ادىلەت قاعيدالارىن ساۋدا-ساتتىققا سالىپ، ادامدار بوستاندىعى مەن حالىقتار تەڭدىگىن اياق استى قىلىپ كەلگەن الەمدىك يمپەريانىڭ قۇلاۋىنا اكەلىپ تىرەگەن قايشىلىقتاردان ءوربيدى.

بۇگىن كەپ، مۇنداي كۇي كەشۋىمىزدىڭ باستى سەبەبى، ادامزات جاراتىلعالى بار ءاربىر ايماقتىڭ يگىلىگى اۋەلى سول ايماقتىڭ حالقىنا، اركىمنىڭ تالانتى مەن قابىلەتى اۋەلى سونىڭ ءوزىنىڭ يگىلىگىنە، سول ارقىلى بارىپ مەملەكەت پەن قوعامنىڭ يگىلىگىنە قىزمەت ەتۋى كەرەك ەكەندىگىمەن ەسەپتەسپەگەندىگىمىزدەن ەكەندىگىنە كوزىمىز جەتەتىندەي ۋاقىت بولدى.

كەيىنگى جەتپىس جىل ىشىندە اركىم ءوز كۇنىن ءوزى كورەتىن ەجەلگى ءۇردىستى ۇمىتىپ، ەنجار جاعىمىز ءوز مۇددەڭ جولىندا وزگەنىڭ مۇددەسىنە قول سالماي، بار مۇمكىندىگىڭ مەن قابىلەتىڭدى تۇگەل جۇمساپ، ەڭبەك ەتۋدىڭ ورنىنا كوپپەن كورگەن ۇلى توي دەپ، بەرگەنگە ءماز، تيگەنگە قاناعات قىلىپ، ەپتى جاعىمىز ورتاق داۋلەتتى يەسىز مالداي كورىپ، قىمقىرىپ كەتۋگە، جىمقىرىپ كەتۋگە بوي الدىردىق. بويكۇيەزدىك، قىمقىرما-جىمقىرما بار جەردە قوعام تىنىش، مەملەكەت باي بولا الاتىن با ەدى؟! الاقولدىق — الاكوزدىكتى، الاكوزدىك — الاۋىزدىقتى، الاۋىزدىق — الەۋمەتتىك دۇربەلەڭدەردى وربىتەدى. قولدارى ءبىر-بىرىنىڭ جاعاسىندا جۇرگەن جۇرتتىڭ قاي شارۋاسى وڭعارىلىپ، قاي ءىسى ورگە باساتىن ەدى؟! ونداي جاعدايدا ونسىز دا تۇرالاپ تۇرعان ەكونوميكا ودان سايىن تۇرالاي تۇسەدى. ەشتەڭە وندىرمەيتىن ەلدە نە جەتىسۋشى ەدى؟ ءبارى دە جەتىسپەيدى. ال، ءبىر جىل ەمەس، ەكى جىل ەمەس، قاتارىنان جەتى جىل ساياسي سەرگەلدەڭگە تۇسكەن قوعامدا دۇكەندەگى بۇيىم تۇگىلى، باسىنداعى ميىڭ سارقىلىپ قالۋى ابدەن مۇمكىن. ەڭ قاتەرلىسى — ادامداردىڭ سابىرلارىنىڭ تاۋسىلىپ، اقىلدارىنىڭ شايقالۋى.

سوندىقتان دا، قازىرگىدەي كەزدە قوعامعا بىلايعى ىرىڭ-جىرىڭدى ۇمىتىپ، كوپتىڭ كوڭىلىن جۇمىلدىرا الاتىن ورتاق ماقسات، ورتاق مۇددە كەرەك.

قۇدايعا شۇكىر، ونداي ماقسات، ونداي مۇددە بىزدە بار. ول — ءبىزدىڭ تاۋەلسىز مەملەكەتىمىز. ونىڭ ساياسي، ەكونوميكالىق مۇددەلەرى. ول جولدا كۇرەسۋ — بارشا قاۋىمنىڭ، ءاربىر ازاماتتىڭ باستى پارىزى.

تاۋەلسىز ەلدىڭ قۋاتتى ەكونوميكاسى بولعانى ءجون. قۋاتتى ەكونوميكا ەلدىڭ تابيعي، مورالدىق كۇشتەرى مەن سىرتقى ورتامەن ىقپالداستىق ارقىلى جۇزەگە اسادى. قۇدايعا شۇكىر، تابيعي بايلىققا كەندە ەمەسپىز. سول ارقىلى سىرتقى ورتامەن ىقپالداستىقتى نىعايتۋعا ابدەن بولادى. ەندى تەك ءارقايسىمىزدىڭ جەكە ىسكەرلىگىمىزبەن جەكە باستاماشىلدىعىمىزدى تاۋەلسىز مەملەكەتىمىزدىڭ ەكونوميكالىق قۋاتىن نىعايتۋ جولىنا جۇمىلدىرا الساق، سونى قامتاماسىز ەتەتىندەي مورالدىق، پراۆولىق نەگىز جاساقتاي الساق بولعانى.

مورالدىق نەگىز جاساۋ ءۇشىن ءارقايسىمىز ءوز مۇمكىندىگىمىزدى ءوزىمىز پايىمداپ، ءوز تاعدىرىمىزدىڭ جاۋاپكەرشىلىگىن ءوز قولىمىزعا الۋعا تاۋەكەل ەتە ءبىلۋىمىز كەرەك.

پراۆولىق نەگىز جاساۋ ءۇشىن جاڭا ەكونوميكالىق قارىم-قاتىناستاردى ءاربىر ازاماتتىڭ ىسكەرلىك قابىلەتىن تۇگەل اشۋىنا جاعداي تۋعىزاتىنداي مۇمكىندىكتەر ورناتۋ قاجەت.

ال بۇعان دەيىنگى جۇرگىزىلىپ كەلگەن ەكونوميكالىق رەفورمادا قالىپتاسىپ وتىرعان جاعدايدىڭ ىڭعايىمەن كەتۋ باسىم تۇسەدى. وزدەرى قارىق بولعانمەن، وزگەلەردى ءعارىپ قىلعان كووپەراتيۆتەر، بەرىلگەن ەركىندىكتى قولما-قول ايىرباسقا جۇمساعان ءوزىمشىل كاسىپورىندار «وتاندىق ىسكەرلىك باستاماشىلدىقتىڭ» قۇلقىنىنىڭ قانداي ەكەنىن ابدەن تانىتىپ بەردى. اۋەلدە بارماقباستى، كوزقىستىلىقتان باس العان «استىرتىن ىسكەرلىك» جاريا جاعدايدا بۇرىنعىدان بەتەر ماسايراپ، تۇيەنى تۇگىمەن جۇتاتىن جابىرلىگىنە باستى. ءوندىرىس ۇلعايمادى. تاۋار كوبەيمەدى. باعا اسپانداي ءتۇستى. حالىقتىڭ جيعان-تەرگەنى كۇندەلىكتى كۇنكورىسكە ازەر جەتۋدە. مۇنداي جاعدايدا ىسكەر قاۋىم قاتارىنا جاڭا كۇشتەر قوسىلا المادى. كەشەگى «كولەڭكەلى ەكونوميكانىڭ» تۇتقىنىندا قالعان «نارىقتىق ەكونوميكانىڭ» ارانى اشىلىپ، بارعان سايىن «تاعىلانا» تۇسەدى. مەملەكەتتىك مونوپوليزم توپشىلدىق مونوپوليزممەن الماسادى. ويتكەنى، ىسكەرلەر قاتارى جاڭا كۇشتەرمەن تولىقتىرىلمايىنشا بىزدە تازا ىسكەرلىك احۋال ورنامايدى. بولىپ جاتقان ەكونوميكالىق رەفورمانىڭ بار قىزىعىن تەك سول باياعى ءىشىپ قالعان، جەپ قالعان كۇشتەر كورەدى. ول كەشەگى «بولىسپەلى ەكونوميكا» تۇسىندا-اق ءوز ۇپايىن تۇگەندەپ العاندار. كەشەگى كووپەراتيۆتىڭ، بۇگىنگى شاعىن جەكەشەلەندىرۋدىڭ، ەرتەڭگى ورتا جانە ۇلكەن جەكەشەلەندىرۋدىڭ قايماعىن قالقىپ ىشەتىن تەك سولار بوپ قالسا، مولشىلىق تا، ارزانشىلىق تا الىستاي بەرەدى. مۇنداي جاعداي ەكونوميكالىق قاتىناستاردىڭ دا، قوعامدىق قاتىناستاردىڭ دا دەموكراتيالانۋىن قيىنداتادى. كورەر كوزگە ادىلەتسىزدىك نارازىلىقتى وربىتەدى. ءدۇردارازدىق تاۋەلسىزدىككە ءقاۋىپ تۋعىزادى. سوندىقتان، ەكونوميكالىق قاتىناستارىمىزدى، سول ارقىلى ساياسي قاتىناستارىمىزدى اقىلعا سىيىمدى جولمەن رەتتەپ الماي تۇرىپ، بۇعاناسى بەكىپ بولماعان تاۋەلسىزدىگىمىزدى زوبالاڭداردان قۇتقارا المايمىز.

ول ءۇشىن نارىقتى ەكونوميكادان باس تارتپاۋىمىز كەرەك. ءبىراق، نارىققا دا پارىق كەرەك ەكەنىن ۇمىتپاعانىمىز ءجون. بۇل ارادا مەن بۇرىنعى ايتقاندارىمدى قايتالاپ ايتۋعا ءماجبۇرمىن. توقسانىنشى جىلعى كۇزگى سەسسيادا ۇكىمەتتىك باعدارلاما تالقىلانعاندا جاڭا ەكونوميكالىق قاتىناستار جۇرتشىلىقتىڭ نەعۇرلىم كوپ بولىگىنىڭ ىسكەرلىك باستاماشىلدىعىن وياتا العان جاعلايدا عانا ءوز ماقساتىنا جەتە الاتىندىعىن ايتقانمىن. ول پىكىرىمدى توقسان ءبىرىنشى جىلعى قىسقى، كوكتەمگى سەسسيالاردا دا ناقتىلاعانمىن.

قىسقاسى، ۇلتتىق قۇرامى الا-قۇلا، ەكونوميكاسىنىڭ ءار سالاسى ءار قيلى دامىعان ءبىزدىڭ رەسپۋبليكامىزداي مەملەكەتتەردە ازاماتتاردىڭ تۇرمىس احۋالىنىڭ ءار قيلى بولۋىنا ولاردىڭ وزدەرى ەمەس، بۇكىل يگىلىكتى دەربەس يەلەنىپ كەلگەن مەملەكەت ايىپتى. ەندى سول مەملەكەت قاراماعىنداعى ورتاق داۋلەتتى اقشاسىنا قاراپ جەكەلەندىرسەك، كىمنىڭ قايدا نە ىستەپ جۇرگەنىنە قاراپ، ءۇۇجىم-ۇجىمعا ءبولىپ بەرسەك، بۇرىنعى بارلار بايي تۇسەدى. كوپ ادام مۇنداي «حانتالاپايدان» اتىمەن قۇر قالادى. ويتكەنى، ونداي الاقۇلالىق بىرەۋلەردىڭ اسىرە ەڭبەكقورلىعىنان، ەكىنشىلەردىڭ اسىرە جالقاۋلىعىنان تۋماعان، ەڭبەك بولىسۋدەگى، قارجى بولىسۋدەگى، رەسۋرس بولىسۋدەگى الاقولدىقتان تۋعان. جارقىراعان باي زاۋىتتىڭ قاسىنا جارلى اۋىلدىڭ وتىرۋى، ءوز جەرىنەن تابىلعان، قازىناعا ءوزى ورتاقتاسا الماۋى دا سودان وربىگەن. جاڭا رەفورما كەشەگى ەكونوميكالىق ادىلەتسىزدىكتى ءبىرجولاتا زاڭداستىرىپ بەرۋگە ەمەس، تۇبىرىمەن قايتا قاراپ تۇزەتۋگە كۇش سالۋعا مىندەتتى. ونىڭ جولى — قازىرگى قازاقستاندىقتاردى قاي سالادا جۇمىس جاساپ جۇرگەندىگىنە قاراماستان، جاڭا ەكونوميكالىق قاتىناستارعا كوشۋگە بىردەي مۇمكىندىك جاساپ بەرۋ. رەسپۋبليكانىڭ ۇلتتىق يگىلىگى ءبىر كۇندە جاسالماعان. وعان كوپتەگەن ۇرپاقتاردىڭ ەڭبەگى سىڭگەن. بىرەۋلەر عاسىرلار بويى وسىناۋ باي ولكەنى يەمدەنىپ، قورعاپ كەلدى، بىرەۋلەر سول بايلىقتى يگەرۋگە اتسالىستى. ەڭبەك بولىسۋدە كەتكەن الاقولدىققا ادامدار ەمەس، قوعام كىنالى. ەندەشە، ولاردىڭ قاي-قايسىسى دا بەسىكتەگى بالادان جاسى كارىگە دەيىنگىنىڭ ءبارى دە، ورتاق يگىلىكتەن بىردەي سىباعا دامەتۋگە پراۆولى. تەك سوندا عانا اركىمنىڭ ءوز قابىلەت-مۇمكىندىگىن سارقا پايدالانىپ، ءوز تاعدىرىنا ءوزى جاۋاپ بەرۋىنە مۇمكىندىك تۋادى. بالكىم جۇرتتىڭ ءبارى ول مۇمكىندىكتى بىردەي پايدالانا دا الماس. بىرەۋ ۇتار، بىرەۋ ۇتىلار. ۇتىلعانى، ءبىراق، قوعامنان كورمەيدى، وزىنەن كورەدى. ەڭ باستىسى، جاڭا ەكونوميكالىق قاتىناستاردىڭ يگىلىگىن كەشەگى بولىسپەلى ەكونوميكا تۇسىندا «زاڭسىز ۇپاي» جيناعاندار ەمەس، جاڭا ەركىن باستاماشىلدىق پەن باسەكەگە توتەپ بەرە العان جاڭا كۇشتەر كورەدى. جاڭا ەكونوميكالىق قاتىناستار بۇكىل ۇلتتىق جاسامپازدىق احۋالدى نىعايتىپ، مولشىلىق پەن ورنىقتىلىققا قىزمەت ەتەدى. ەڭ باستىسى — اركىم ءوز قامىن ءوزى جەۋگە مۇمكىندىك الادى. ۇلتتىق ەكونوميكامىزعا جاڭا ىسكەر كۇشتەر مەن تىڭ دارىندار قوسىلادى. تەك سوندا عانا جاڭا رەفورما جۇرتشىلىق تاراپىنان جاپپاي قولداۋ تاۋىپ، بىردەي ىنتالىلىق جاعدايىندا جۇزەگە اسادى.

ءبىر وكىنىشتىسى، مۇنداي كوزقاراس بىردەن قولداۋ تاۋىپ كەتە المادى: «تەگىن نارسەنىڭ ءقادىرى بولمايدى. ونى جۇزەگە اسىرۋعا جۇرتشىلىقتىڭ ءبار-بارىنىڭ ىسكەرلىك دارەجەسى جەتىسە بەرمەيدى. ونىڭ ۇستىنە، جەكەشەلەندىرۋ جۇرتتىڭ قالتاسىنداعى اينالىمعا تۇسپەي جاتقان ارتىق اقشانى قايتارىپ الۋدى كوزدەيدى»،— دەگەن قيسىندار بەل الىپ كەتتى. سودان كەلىپ، جەكەشەلەندىرۋدىڭ اۋكسيوندىق جولىنان كاسىپورىنداردى اۋەلى جالگەرلىككە الىپ، كەيىن ەڭبەك ۇجىمدارىنىڭ يەلىگىنە اينالدىرۋ نەمەسە اكسيونەرلىك قوعامعا اينالدىرۋ تۇرلەرىنە كوبىرەك دەن قويىلدى.

ال ونداي جەكەشەلەندىرۋدىڭ اياق الىسىن كورىپ وتىرمىز. ونەركاسىپ پەن اۋىل شارۋاشىلىعى قىزمەتكەرلەرىنىڭ مارەلىك جاعدايىنىڭ اراسىنداعى ايىرما اسپان مەن جەردەي بولماقشى. اعارتۋ، مادەنيەت، دەنساۋلىق ساقتاۋ، عىلىم، الەۋمەتتىك سالادا ەڭبەك ەتەتىندەر «نارىق يگىلىگىنەن» يماندى اۋىزدارى سىلپ ەتپەي قۇر قالاتىن ءتۇرى بار. ول الەۋمەتتىك كۇيزەلىستەردى كۇشەيتپەسە، السىرەتپەيتىنى بەلگىلى. مۇنداي احۋال نارىقتى دا قارىق قىلمايدى. ىسكەرلىكتىڭ اياعىنداعى تۇساۋى مەن باسىنداعى نوقتانى ودان ءارى قىسا ءتۇسۋدى كوزدەيتىن ساياسي كۇشتەرگە جەل بەرەدى. ەل باسىنداعى راسىندا دا قيىن ەكونوميكالىق احۋالدى كەشەگى ساياسي جۇيەنى قايتا تىرىلتۋگە، وتارشىلدىق يدەولوگيانى قايتا وياتۋعا، ءسويتىپ، جاس تاۋەلسىز مەملەكەتتەردىڭ ءاپ دەگەننەن ەكى اياعىن ءبىر ەتىككە تىعىپ ۇستاۋعا پايدالانعىسى كەلەتىن كوزقاراستار دا بايقالماي جۇرگەن جوق.

ەندەشە، نارىقتىق ەكونوميكاعا كوشۋدىڭ قارقىنىن تەزدەتۋمەن عانا تىنباي، مازمۇنىن تەرەڭدەتە تۇسۋگە دە كوبىرەك كۇش سالعان دۇرىس. جاڭا ەكونوميكالىق قاتىناستاردان تۋىندايتىن الەۋمەتتىك قيىندىقتاردىڭ الدىن الىپ، ولارعا جول بەرمەۋدىن امالدارىن جان-جاقتى قاراستىرعان ءلازىم. ولاردى شەشۋدىڭ تەتىگى — قوسالقى قارجى ءبولۋ عانا ەمەس، مۇمكىندىگىنشە، جاڭا ەكونوميكالىق قاتىناستاردى بەلگىلەگەن كەزدە الەۋمەتتىك سالانىڭ دا ۇلەس سالماعىن ويداعىداي مولشەرلەي ءبىلۋ. ونى ءار ادامنىڭ جەكەشەلەنۋدەن الاتىن بىردەي سىباعاسىن بەلگىلەمەيىنشە، ويداعىداي شەشۋ مۇمكىن ەمەس.

مۇنداي جاعدايدى ەكونوميكالىق رەفورماعا بىزدەن بۇرىن كىرىسكەن شىعىس ەۆروپا ەلدەرى دە بەلدەن باسىپ وتە المادى. ماسەلەن، چەحو-سلوۆاكيادا جۋىق ارادا ءاربىر ازاماتقا مەملەكەتتىك كومپانيالاردان اكسيا ساتىپ الۋعا جاعداي جاسايتىن كۋپون كىتاپشاسى ۇلەستىرىلىپ بەرىلە باستادى. پولشادا دا سول باعىتتا تالپىنىستار جاسالۋدا. رەسەيدەگى كورنەكتى ەكونوميستەردىڭ كوپشىلىگى وسىنداي پىكىردى ءجيى ايتىپ ءجۇر.

ۇلتتىق قۇرامى ءبىر تەكتى، ەكونوميكالىق جاعدايى بىزدەن گورى جوعارى جاعدايدا ءومىر ءسۇرىپ كەلگەن مەملەكەتتەردىڭ ءوزى قالاي بولسا، سولاي قاراي الماي وتىرعان جاعداي ءبىزدى ءتىپتى ويلانتۋى كەرەك.

ويلاعاندا دا الدىن-الا ويلانۋىمىز كەرەك. تۇمسىعىمىز تاسقا سوققاندا بارىپ ويلاعاننان شىعار ءپاتۋا شامالى.

بىزدىڭشە، وعان ءالى دە مۇمكىندىك بار. جەكەشەلەندىرۋ ەندى-ەندى قولعا الىنىپ جاتىر. ۇلتتىق يگىلىكتىڭ دەنى ءالى دە مەملەكەت يەلىگىندە.

قىسقاسى، قاي-قايسىمىزدىڭ تاعدىرىمىز دا ەگەمەندىگىمىز بەن تاۋەلسىزدىگىمىزدىڭ باياندىلىعى ارتىپ، ساياسي ەكونوميكالىق وزگەرىستەرىمىزدىڭ مۇقيات پايىمدالىپ، ويداعىداي جۇزەگە اسىپ كەتۋىنە بايلانىستى.

ەندەشە، ەڭ الدىمەن، ەلدىكتى ويلايىق. نە قيىندىق كورسەك تە، اۋەلى ءوز قابىرعامىزبەن كەڭەسەيىك. وكپە-بوپساعا بەرىلىپ، وتكەن-كەتكەنگە جارماسقاننان گورى ەرتەڭدى ويلاپ، ءوز جىگەرىمىزدى ءوزىمىز قايراپ، ءوز مۇددەمىزدى ءوزىمىز كوزدەپ، ءوز ۇرپاعىمىزدى ءوزىمىز تۇگەندەۋگە — ەڭبەكپەن، اقىلمەن، ىنتا-ىجداھاتپەن تۇگەندەۋگە بوي ۇرعانىمىز ابزال. اركىمنىڭ ايتقان ءار تاراپ قيسىنىنا باس شۇلعي بەرمەي، ءار تاراپ ۇرانىنا جەلكىلدەپ ەرە بەرمەي، اركىمنىڭ بارىنەن بۇرىن ءوزى مەن ۇرپاعىنىڭ ومىرلىك مۇددەسى جولىندا كۇرەسە بىلگەنى دۇرىس. ءوز مۇددەسىن زاڭ جولىمەن، قۇقىقتىلىق جولىمەن قورعاي بىلگەنى ءجون. ايتپەسە، ىرىڭ-جىرىڭ، داۋدامايدى بيلىككە تالاسقان مانساپقور كۇشتەر مەن جىلىكتىڭ مايلى جەرىنە ۇمتىلعان پايداكۇنەم كۇشتەر پايدالانىپ كەتىپ جۇرگەنىن كورمەي-بىلمەي وتىرمىز با؟!

قازىرگى كەزەڭ جيىن مەن تويدىكى، داۋ مەن دامايدىكى ەمەس، اركىمنىڭ، ءار جۇمىر باس پەندەنىڭ ەرتەڭگى بولاشاعى عانا ەمەس، بۇگىنگى كۇن كورىسىنىڭ قامىن جان-جاقتى ساراپقا سالا تولعانا الاتىنداي سابىر مەن ويدىكى.

ويلانايىق، اعايىن! بۇگىن ۇتىلساق، ءبىرجولاتا ۇتىلامىز. بۇگىن قاپى قالساق، ءبىرجولا قاپى قالامىز. ويتكەنى، بۇدان بىلاي نە كورسەك تە، ءوز تالايىمىزدان كورەمىز. مۇنداي تىزگىندى اشۋ ەمەس، اقىل، ۋايىم ەمەس، پايىم، ءسوزىم ەمەس، ءتوزىم، ارمان-قيال ەمەس، ەڭبەك-قارەكەت ۇستاعان لازىم.

مامىر 1992 جىل.

---