InfoHub Logo

قازاق باسپاسوزىندە ورنەگى بولەك ۇلى تۇلعا، ۇلت ادەبيەتىن قالىپتاستىرۋدا ولشەۋسىز ەڭبەك ەتكەن الاش زيالىلارىنىڭ ءبىرى—جۇسىپبەك ايماۋىتوۆ بولاتىن. ول ادەبيەت سىنشىسى رەتىندە حح عاسىردىڭ باسىندا ايقىن تانىلعان قالامگەرلەردىڭ كورنەكتى وكىلىبولا ءبىلدى جانە سول  عاسىردىڭ وتىزىنشى جىلدارىندا كەڭەستىك ءداۋىر ادەبيەتى وكىلدەرىمەن ءسوز ونەرىنىڭ كەڭىستىگىنە قاتار كەلگەن سونداي سوم تۇلعالاردىڭ ورتاسىنان ويىپ تۇرىپ ورىن الدى. 

ال ەندىگى قوزعايتىن اڭگىمەمىز قالامگەردىڭ مۇرالارى، سونىڭ ىشىندە «سارىارقا» گازەتىندەگى جۇسىپبەك ايماۋىتوۆتىڭ قولتاڭباسى جايلى بولماق. ەندەشە سارىارقا گازەتىندەگى ماقالالارعا كوز جۇگىرتەيىك. ماعان وسى گازەتتى زەرتتەۋ، ىزدەنۋ بارىسىندا ەرەكشە كوزىمە تۇسكەن ماقالا، ول «مەملەكەت قۇرىلىسى» بولدى. ءبىر ەرەكشەلىگى قالامگەر بۇل ماقالاسىندا ساياسي قۇبىلىستار تۋرالى كوپتەگەن مالىمەتتەردى تىلگە تيەك ەتەدى. ماقالانىڭ ۇزىندىسىنە كەرەك بەرەيىن:« پاتشانىڭ پارمەنىنەن حالىق قۇتىلدى. قانداي قولايلى تۇرمىس جاساسا دا، ەرىك وزىندە. ءبىراق، ۇلان-بايتاق جەردە شاشىلىپ جاتقان ءجۇز ميلليون حالىق قالاي جيىلىپ، قالاي كەڭەسپەك؟ مىنە، سونىڭ ءۇشىن مىناداي ءتارتىپ بولۋى كەرەك: ءھار گۇبىرنيا، ءھار وبلوستان حالىق ەكى-ۇش كىسى وكىل سايلاۋى كەرەك. بۇل وكىلدەرى كوپكە سەنىمدى، پىكىرى، ويى جۇرتپەن ۇيلەسەتىن ءھام باسقا جۇرتتىڭ وكىلدەرىمەن تىزەلەسىپ، حالىققا جايلى، ۇنامدى مەملەكەت نەگىزىن جاسايتىن كىسىلەر بولۋ كەرەك. سونداي وكىلدەردىڭ باس قوسىپ كەڭەسەتىن جيىلىسىن “ۋچەرەديتەلنوە سوبرانيە” دەيدى». قازاقتىڭ ءوز الدىنا دەربەس جۇرت بولىپ مويىندالار كەزى تۋعاندىعىنا ءۇمىت ارتىپ، ەل كەلەشەگىنە قاتىستى وزەكتى ويلاردى باسپا ءسوز بەتىندە باتىل كوتەرە بىلگەن جۇسىپبەكتى بۇل جولى ساياسي سارابدال سىنشى تۇرعىسىنان تانيمىز. «ۇلان-بايتاق جەردە شاشىلىپ جاتقان ءجۇز ميلليون حالىقتىڭ» قامى ءۇشىن سايلاۋ ءىسىنىڭ قاجەتتىلىگى جونىندە، قۇرىلتاي جيىلىسى، ساياسي پارتيالاردىڭ الار ماڭىزى تۋراسىندا قازاقتىڭ دا ءبىلۋى تيىستىگىن «مەملەكەت قۇرىلىسىنا» ارقاۋ ەتەدى.

مىنەكەي، وسىنداي ۇلى تۇلعالار عىلىمي-تانىمدىق، ادەبي جۋرنالدى جۇرت يگىلىگىنە جاراتۋ ارقىلى قازاق رۋحانياتىنىڭ جاڭا دەڭگەيگە كوتەرىلۋىنە تىكەلەي ىقپال ەتتى. توق ەتەرىنە كوشسەك، ج.ايماۋىت ۇلى رۋحانياتىمىز بەن مادەنيەتىمىزدىڭ ىلگەرى قادام باسۋىنا تۇرتكى بولارلىق تاقىرىپتاردى قوزعاعان بىردەن-بىر قالامگەر بولىپ قالا بەرمەك. 

باينازاروۆا ارۋجان

---