InfoHub Logo

سوڭعى كەزدەرى مۇعالىمدەردىڭ جالاقىسىن كوبەيتۋ تۋرالى ءجيى ايتىلىپ ءجۇر. ءتىپتى پارلامەنتتىڭ دەپۋتاتتارى دا ۇستازدارعا اي سايىن 350 مىڭ تەڭگەدەن تولەسەك ارتىقتىق ەتپەيدى دەگەن پىكىر بىلدىرگەن بولاتىن.

شىمكەنت قالاسىنداعى پوليتەحنيكالىق كوللەدجدىڭ ۇستازى قايرات وماروۆ دەپۋتاتتارعا ارناعان حاتىن جولدادى. ول  ەكى بەتتىك حاتتا ءوز ويىن بىلدىرگەن دەپ جازادى زامانا باسىلىمى.

«دۇنيەدە مىڭداعان ماماندىق ءتۇرى بار. سول ماماندىقتار ىشىندە ادامدى تاربيەلەۋمەن قاتار ءبىلىم نارىمەن سۋسىنداندىرۋ – ەڭ جاۋاپتى ءىس بولىپ سانالادى. بارشا جۇمىستىڭ ىشىندە قيىن دا قۇرمەتتىسى – ۇرپاق تاربيەسى. جاس ۇرپاقتىڭ بويىنا ادامزاتتىڭ ۇلى قاسيەتتەرىن دارىتۋدان ارتىق قىزمەت بولماسا كەرەك. ۋاقىت وتە كەلە ەلىمىزدە جاعداي جاقسارىپ، بۇگىندە ءبىلىم مەكەمەلەرىندەگىلەر ءوز جالاقىسىن ۋاقتىلى الىپ ءجۇر. ءبىراق سول ەڭبەكاقىلارى تىم از.

ءمۇعالىم­دەردىڭ ءارقايسىسىنىڭ جەكە ۋايىمدارى بار. بۇل – نەسيە. قازىرگى مۇعالىمدەردىڭ جالاقىسى 60 – 70 مىڭ تەڭگە شاماسىندا.

ال ەلىمىزدەگى فۋتبولشىلاردىڭ جالاقىسى وتە جوعارى. جاعدايلارى دا جاسالعان. ولاردىڭ الدىنا قويعان ماقساتى – تەك جەڭىمپاز بولۋ. شەت مەملەكەتتەردە ستاديوننان ينە شانشار ورىن تابا المايسىڭ. ال بىزدە شە؟ 5-6 مىڭ عانا جانكۇيەرلەر بولماسا، ستاديوندارىمىز بوس، قاڭىراپ تۇرادى. وتكەن عاسىردىڭ 50ء-شى جىلدارى ەلىمىزدە پايدا بولعان فۋتبول وسى ۋاقىتقا دەيىن سول دەڭگەيدە قالىپ كەلەدى. ەڭ سوراقىسى، بۇل سالاعا ميللياردتاعان قارجى كەتىپ جاتىر"، - دەپ جازادى اشىنعان اۆتور.

جانكۇيەر رەتىندە ەلىمىزدە سپورتتىڭ دامىعانىن قالايتىن ۇستاز بۇل سالاعا تىم كوپ اقشا شاشپاۋدى ۇسىندى.

"ەلىمىزدەگى «اقتوبە» فۋتبول كلۋبى 2015-جىلى شەتتەن كەلگەن 4 لەگيونەر ويىنشىسىنىڭ ءارقايسىسىنا اي سايىن 60 مىڭ اقش دوللارىن تولەپ وتىرسا، «شاحتەر» كومانداسىنىڭ جاتتىقتىرۋشىسى دا ءوزىنىڭ ەڭبەگىن سونداي باعاعا لايىقتى دەپ ەسەپتەيدى ەكەن. بۇعان ۇتىس بولعان جاعدايداعى ۇلكەن كولەمدەگى سىياقىنى قوسساڭىز، فۋتبولشىلاردىڭ تابىسىنان باسىڭىز اينالارى انىق.

ال شىمكەنتتىڭ «ورداباسى» كومانداسىنا قازىنادان ءبىر جىلعا 3 ميلليارد تەڭگە بولىنگەن. ەندى سالىستىرمالى تۇردە قاراساق، 120 ءمۇعالىمى بار مەكتەپكە بيۋدجەتتەن 92 ميلليون تەڭگە اۋدارىلادى.

دەمەك، «ورداباسى» ءۇشىن ءبىر جىلعا قاراستىرىلعان قارجىعا 33 مەكتەپتىڭ مۇعالىمدەرىن تولىق جالاقىمەن قامتاماسىز ەتۋگە بولادى.

بيىلعى مالىمەتكە سۇيەنسەك، «اقتوبە» فۋتبول كلۋبى الەكسەي ششەتكينگە اي سايىن 9 ميلليون تەڭگە، سامات سماقوۆقا ءبىر ايدا 6 ميلليون تەڭگە جالاقى تولەپ وتىرعان.

بۇل دەگەنىمىز – مەكتەپتەگى 120 ءمۇعالىمنىڭ ءبىر ايلىق جالاقىسى. ەگەر بۇل كوماندالار ەل چەمپيونى اتانىپ، حالىقارالىق جارىستاردا توپ جارسا وعان ەش وكىنبەس ەدىك. ەشقانداي ناتيجە جوق قوي. چەمپيون بولۋ بىلاي تۇرسىن، العاشقى ۇشتىككە ىلىنە الماي جۇرگەن كوماندالارعا وسىنشاما قارجى جۇمساۋ كىمگە جانە نە ءۇشىن كەرەك؟

ويلانىپ قاراڭىزشى، ءمۇعالىم مەن دوپ تەبۋشىنىڭ جالاقىسىنداعى ايىرماشىلىق جەر مەن كوكتەي ەمەس پە؟ بۇگىنگى جاس ۇرپاقتىڭ بولاشاعىنا ەلەڭدەپ، سول ۇرپاقتى دۇرىس جولدان اداس­تىرماۋ ءۇشىن بۇكىل ءومىرىن وسى قىزمەتكە ارناعان ۇستازدىڭ مارتەبەسى نەگە فۋتبولشىدان تومەن بولۋى كەرەك؟، - دەگەن كوللەدج ءمۇعالىمى ءوز جانايقايىنا دەپۋتاتتار قۇلاق تۇرسە دەپ ارماندايدى.

---