InfoHub Logo

انگليادا دەنساۋلىققا قاتىستى ناۋقاندا تەمەكى شەگۋ وكپەمەن قوسا مي سەكىلدى نەگىزگى مۇشەلەرگە كەلتىرەتىن زيانى اۋقىمدى تۇردە ناسيحاتتالدى. تەمەكى ءتۇتىنىنىڭ قۇرامىنداعى زياندى زاتتار قاندى قالاي لاستايتىنىن، كەيىن وسى لاس قاننىڭ دەنەدە قالاي اينالاتىنىن جانە سال اۋرۋىنا قالاي سەبەپ بولاتىنى كوگىلدىر ەكرانداردا كورسەتىلىپ، تەمەكىنى تاستاتۋ كوزدەلگەن وسى ناۋقاندا «زياندارىن شىنىمەن ۇعىنا الساڭىز تەمەكىنى تاستار ەدىڭىز» دەگەن جولداما بەرىلدى. تەمەكى شەگەتىندەردىڭ مي تامىرلارىنىڭ بىتەلۋى نەمەسە ميعا قان كەتۋى سالدارىنداعى ءولىم سانى، تەمەكى شەكپەيتىندەرگە قاراعاندا ەكى ەسە كوپ. تەمەكى شەگۋگە ادەتتەنگەندەردىڭ ەستە ساقتاۋ قابىلەتىنىڭ ناشارلاۋى، سكلەروز دەرتىنە شالدىعۋ ءقاۋىپى جوعارى. انگلياداعى مەديسينا مامانى پروفەسسور ساللي ديەۆيس: «تەمەكىنىڭ جۇرەك پەن وكپەگە بەرەتىن زياندارىن كوپشىلىگىمىز بىلەمىز. ءبىراق تەمەكى شەگەتىندەر تەمەكى ءتۇتىنى ارقىلى قانعا ارالاساتىن زياندى زاتتاردىڭ مي جانە باسقا دا ماڭىزدى مۇشەلەردە جول اشاتىن اقاۋلاردى سانالى تۇردە ۇعىنا ءبىلۋى قاجەت. تەمەكى مەزگىلسىز ولىمدەردىڭ باستى سەبەبى. تەمەكى شەگەتىن ءار ەكى ادامنىڭ ءبىرى تەمەكىگە قاتىستى تۋىندايتىن اۋرۋ كەسىرىنەن ەرتە كوز جۇمادى. ادامداردىڭ ءالى كۇنگە دەيىن تەمەكىنىڭ بەرەتىن زياندارىن ەلەمەيتىندىگى وتە وكىنىشتى» دەيدى. پروفەسسور ديەۆيس سونىمەن قاتار تەمەكىنى تاستاعاندار سال اۋرۋىنا شالدىعۋ ىقتيمالدىعى ءومىر بويى تەمەكى شەكپەگەن ادامداي دەڭگەيگە بەس جىلدان كەيىن عانا جەتەتىنىن مالىمدەدى. «كاتران، مىشياك، سۋتەگى ءسيانيدى ت.ب. بۇلاردىڭ بارلىعى قاتەرلى ىسىككە جول اشاتىن اسەرلەر قالىپتاستىرا الادى نەمەسە قان تامىرلارىندا اقاۋلارعا سەبەپ بولادى» دەيدى ماماندار. ەڭ دۇرىسى تەمەكىنى تاستاۋعا شەشىم قابىلداپ، ءوزىن وسى نيەتتە جىگەرلەندىرىپ، تەمەكىنى ۇزىلدى-كەسىلدى تاستاۋعا كەڭەس بەرەمىز.

---