InfoHub Logo

تەلەديداردا نەمەسە باس قوسقان جيىنداردا قوعامداعى كەلەڭسىزدىكتەر تالقىلانىپ جاتادى. «ۇرلىق، الاياقتىق كوبەيىپ كەتتى، ارسىزدىق، ۇياتسىزدىق ءورشىپ كەتتى، قوعام بۇزىلىپ بارا جاتىر» دەگەن سياقتى تاقىرىپتار قوزعالادى. سوندا بىرەۋلەر «ۇرى كىنالى ەمەس، قوعام كىنالى» دەسە، ەكىنشىلەرى «ۇرلاماعاندا ءقايتسىن ەندى، جوقشىلىق باس ساۋعالاتقاندا امال بار ما؟!» دەپ اڭگىمەگە ماي تامىزىپ وتىرادى. نەگىزىندە، ويلاپ قاراساق، ۇرلىق پەن كەدەيلىكتىڭ ەش بايلانىسى جوق. اۋقاتتى وتباسىدان شىققان ۇرىلار مەن الىمجەتتىلىك قىلاتىن باسكەسەرلەر ەلدە جەتىپ ارتىلادى. قانشاما كەدەي وتباسىلار بار ادالدىق شەڭبەرىنەن شىقپاي، ار-ۇيات، ادامگەرشىلىك قاعيدالارى اياسىندا بەرەكەلى عۇمىر كەشۋدە. بىرەۋدىڭ الا ءجىبىن اتتاۋ ويلارىنا دا كىرمەيدى.  

ال قوعامداعى كەلەڭسىزدىكتەردىڭ شەشىمىن حالىق جازۋشىسى ءازىلحان نۇرشايىقوۆ جاقسى تۇسىندىرگەن ەكەن: «مەن ۇيات دەگەن ءسوزدى وتە جوعارى باعالايمىن. ۇيات دەگەندى ۇلى كۇش دەپ ويلايمىن. ادام­شى­لىقتىڭ، ادالدىقتىڭ، ۋادەشىلىكتىڭ، تۇراقتىلىقتىڭ، تازالىقتىڭ ءتۇپ قا­زىعى – ۇيات دەپ بىلەمىن. ۇياتى جوقتان ءۇمىت كۇتپەيمىن. ۇرى-قارى، قاراقشى، قانىپەزەرلەر ۇياتى جوقتان شىعادى. ۇيات – ەڭ قىمبات قاسيەت، ۇياتتىدا يمان بار.» 

ءيا، ادالدىق پەن ار-ۇيات بىر-بىرمەن تىعىز بايلانىستى قاسيەت. ماسەلەنىڭ ءبارى تاربيەگە كەلىپ تىرەلەدى. اتا-بابامىز «ەل بولام دەسەڭ بەسىگىڭدى تۇزە» دەگەن ەمەس پە؟! سوندىقتان بالا تاربيەسىنە مۇقيات كوڭىل ءبولۋ كەرەك. بالا-شاعاعا كىشكەنتايىنان ەشكىمگە قيانات جاساماۋدى، ەشكىمنىڭ اقىسىن جەمەۋدى، ادال بولۋدى، ار-ۇياتتى بولۋدى جاقسىلاپ ۇيرەتۋ كەرەك. ادال بولۋدى، ار-ۇياتتى ساناسىنا ءسىڭىرىپ وسكەن بالا ەشقاشان ۇرلىققا، وپاسىزدىققا بارمايدى. ءوزىمىز دە ار-ۇياتقا ءجىتى ءمان بەرەيىك. ار-ۇيات تۇزەلسە، قوعام دا تۇزەلەدى.

---