ماڭعىستاۋداعى ءتورت تۇلىك چيپ ارقىلى قورعالماق
مالدى «چيپتەۋ» ولاردى جوعالۋ قاۋپىنەن جانە جول-كولىك وقيعاسىنان ساقتايتىن بولادى. بۇعان قوسا، شارۋالار اراسىندا مالدىڭ يەسىن انىقتاۋ بويىنشا بولاتىن تۇسىنىسپەۋشىلىكتەردى الدىنالۋعا بولادى.
«وتكەن جىلى ماڭعىستاۋدا 23 ءتورت تۇلىك جوعالعان. ال، بيىل ولاردىڭ سانى – 31ء-دى قۇراپ وتىر. بىرەۋدىڭ مۇلكىن ۇرلاۋ تۋرالى ۆەدومستۆولىق باعدارلاماعا سايكەس، شارۋا قوجالىقتارى مەن ولاردىڭ يەلەرىنە مالدىڭ بارلىق تۇرىنە چيپ ەنگىزۋدى ۇسىنامىز. بۇل ءوز كەزەگىندە جانۋارلاردى تىركەۋ ءۇشىن عانا ەمەس، مال ۇرلاۋ ماسەلەسىمەن ءتيىمدى كۇرەسۋگە دە مۇمكىندىك بەرەدى»، – دەيدى ماڭعىستاۋ وبلىسى ءىىد باسشىسى پوليسيا پولكوۆنيگى قانات تايمەردەنوۆ.
وڭىردەگى ەڭ ءىرى مال باسى ءتۇپقاراعان، مۇنايلى، ماڭعىستاۋ جانە قاراقيا سىندى اۋدانداردا شوعىرلانعان. الايدا، چيپتەر ايماقتاعى مالدىڭ 8 پايىزىنا ەنگىزىلگەن.
ستاتيستيكالىق مالىمەتتەرگە سايكەس، وبلىستا سوڭعى 3 جىلدا 14 جول-كولىك اپاتى ورىن العان. ونداعى سەبەپ – اۋىلشارۋاشىلىعى جانۋارلارىنىڭ باقىلاۋسىز قالعاندىعى. اپاتتىڭ سالدارىنان 42 ادام زارداپ شەگىپ، 12 ادام قايتىس بولعان. ال، جاقىن كۇندەرى تاعى جول اپاتى بولىپ، ارتىنشا 3 ادام قازا تاپتى. اتالعان قايعىلى وقيعا جاڭاوزەن-كەندىرلى تاس جولىندا بولعان ەدى. وعان سەبەپ – اۆتوكولىكتىڭ جىلقىنى قاعىپ كەتۋى.
پوليسيا پولكوۆنيگى قانات تايمەردەنوۆتىڭ ايتۋىنشا، مالداردى چيپتەۋ جول-كولىك اپاتى بولعان جاعدايدا ءتورت تۇلىكتىڭ يەسىن تابۋعا كومەكتەسەدى. وسى ارقىلى مالدىڭ يەسىنە ماتەريالدىق ايىپپۇل تولەتەدى. سونداي-اق، ءچيپتىڭ بولۋىنىڭ ارقاسىندا مالىنا قارامايتىن ادامدارعا تالاپ قويىلادى.
ايتا كەتۋ كەرەك، چيپ ەنگىزۋ قىمبات ەمەس. ونى ءبىر رەت ەنگىزگەننەن سوڭ الماستىرۋدىڭ قاجەتى جوق، ەكونوميكالىق تۇرعىدان ءتيىمدى. كاپسۋلا تەرى استىنا ەنىپ، چيپتەلگەن جانۋاردىڭ ءوز ءنومىرى بولادى. وسى ارقىلى مال تۋرالى اقپاراتتىڭ ءبارىن بىلۋگە مۇمكىندىك بار.
چيپتەۋ دەگەنىمىز نە دەگەن سۇراققا كەلەر بولساق، بۇل جانۋاردىڭ ەلەكتروندىق پاسپورتى سانالادى. ەگەر دە جان-جانۋارلار جوعالاتىن بولسا نەمەسە بەلگىلى ءبىر جاعدايعا دۋشار بولعان كەزدە وسى چيپ ارقىلى تاۋىپ الۋعا بولادى. وسىنداي جۇيە ەلىمىزدىڭ تۇكپىرىندە قولدانىلىپ جاتىر. ماسەلەن، چيپتەر تەك قانا ءىرى قاراعا ەمەس، ءۇي جانۋارلارىنا دا ەنگىزىلۋدە. ول بويىنشا جانۋار تۋرالى اقپارات، ونىڭ اتى، مەكەنجايى، تۇقىمى مەن جاسى كورسەتىلەدى. سونىمەن قاتار، جانۋار يەسىنىڭ جسن-دە جازىلىپ تۇرادى ەكەن. جان-جانۋارلاردى چيپتەۋ پروسەدۋراسىمەن بۇگىندە ۆەتەرينارلار اينالىسىپ جاتىر. مال دارىگەرلەرىنىڭ ايتۋىنشا، چيپتەۋ پروسەسى ءىرى قارانىڭ سانىن بىلۋگە، ەكپەدەن وتكەن-وتپەگەنىن بىلۋگە جاردەمدەسىپ قانا قويماي، اۋرۋمەن كۇرەستە ءوز سەپتىگىن تيگىزەدى ەكەن.
You Might Also Like
-
لۋيزيانا شتاتى ۋنيۆەرسيتەتىنىڭ ماماندارى زەرتتەۋ جۇرگىزىپ، جاڭعاقتىڭ اس قورىتۋ جۇيەسىن جاقسارتاتىنىن، جاڭعاق تۇتىنۋ اسقازانداعى پروبيوتيكتەردى ارتتىرىپ اس قورىتۋ جۇيەسىنە پايدالى كەلەتىندىگىن ءمالىم...
-
وبلىستا بۇگىنگە دەيىن شامامەن 6 مىڭعا جۋىق كىتاپ سيفرلاندىرىلعان، ول دەگەنىمىز شوقان ۋاليحانوۆ اتىنداعى وبلىستىق كىتاپحانا باسىلىمىنىڭ جارتىسىنان استامى.
