قازاق جولعا شىعار الدىندا باتا الماي اتتانباعان. «باتامەن ەل كوگەرەدى» دەگەن ءسوز تەكتەن-تەككە ايتىلماعان — جول باتاسى جۇرگىنشىگە رۋحاني سۇيەنىش بولعان.

بۇل بولىمدە جولاۋشىعا، كوش كوشكەندە، اسكەرگە اتتاناتىن جاسقا جانە مال-جانعا ارنالعان باتالار جيناقتالعان.

كوشكە بەرىلگەن باتا

كوشتەرىڭ كولىكتى بولسىن،
جولدارىڭ كورىكتى بولسىن،
قونىستارىڭ قۇتتى بولسىن،
بوساعاسى مىقتى بولسىن.
اۋرۋ — سىرقاۋدان امان بولىڭدار.
باستارىڭا ايىرىلماس ب ا ق قونسىن،
مەيىرباندى اللا سەندەرگە جاق بولسىن!
ءاۋمين!

جولاۋشىعا باتا

ءيا، قۇدايىم وڭداسىن،
وڭ جولىنا باستاسىن.
جورتقاندا جولىڭ بولسىن،
جولداسىڭ پەرىشتەلەر بولسىن.
جەر جۇزىندەگى قاتەردەن
جاپپار يەمە تاپسىردىم!
سۋدان كەلەر قاتەردەن،
ساپارداعى قاتەردەن.
جاراتۋشى جان يەم،
ساقتاي گور، — دەپ تاپسىردىم!
ءبىر اللاھ وزىڭە تاپسىردىم!
قايىرلى داۋلەت بەرسىن
حالىققا تاتۋلى ءومىر بەرسىن!
وتكەنگە يمان بەرسىن،
تىرىگە – بەرەكە بەرسىن.
جاستارعا عۇمىر بەرسىن،
حالقىمىزعا بىرلىك بەرسىن!
ءاۋمين، اللاۋاكبار!

اسكەرگە اتتاناتىن جاستارعا ارنالعان باتا

اسكەرگە اتتاناتىن جاستارعا
وڭ بولسىن، بالام، ساپارىڭ،
مول بولسىن ءدام — تۇز تاتارىڭ.
تۋعان ەلىڭ تاپسىرعان.
امانات ساعان وتانىڭ.
بارىپ كەلىپ جاتىر عوي.
وزىڭدەي جاستار — قاتارىڭ.
سوم تەمىردەي بىلىكتى،
باتىرداي جۇرەكتى.
ازامات بولسىن ورەنىم،
بەرە گور اللام، تىلىكتى!
ءاۋمين!

مال-جانعا بەرىلەتىن باتا

مال — جانعا بەرىلەتىن باتالار
ە، قۇدايىم، وڭداسىن،
مىڭ ساۋلىعىڭ قوزداسىن.
سەگىز تۇيەڭ بوتالاپ،
سەگىز كەلىن قومداسىن.
جۇزگە جەتسىن تۇيەڭىز،
ءۇش ءجۇز بولسىن بيەڭىز!
الدەرىڭنىڭ كەلگەنىنشە
جىعىلعاندى كوتەرىپ،
سۇيەنگەندى سۇيەڭىز!
تارىعىپ كەلگەن ادامعا،
بەرمەسەك، وتقا كۇيەمىز،
بەرگەندى تىم — اق سۇيەمىز.
جومارتتىق قىلىپ قولداساڭ!
ءاربىر جەردە جار بولسىن
ءبىر جاساعان — يەمىز!
الادان الپىس بيە ق ۇلىنداپ،
القالاپ ۇلىڭ بايلاسىن.
جەلىدەن جەتپىس ىنگەن بوتالاپ،
قىز — كەلىنشەك قىزىعىمەن قومداسىن.
... ورازدىنى كوشىرىپ،
شيەلىدە قونىسىپ،
وتىڭنىڭ باسى
پەرزەنتكە تولىسىپ.
... ءار ەلگە ءار پەرزەنتىڭ
پاتشا بولسىن!
باتامىز ءبىزدىڭ بەرگەن
قابىل بولسىن!
ءاۋمين!
... اعايىنمەن تاتۋ بول،
جاز كيگەنىڭ قۇلپى بول!
قىس كيگەنىڭ تۇلكى بول!
باعانالى تاۋداي بول!
شاعالالى كولدەي بول!
... ەسىگىڭنىڭ الدىندا،
ەلۋ ىنگەن بوزداسىن
قوراڭدا بەس ءجۇز ساۋلىق قوزداسىن!
... جىلقىڭ سەنىڭ مىڭ بولسىن!
جىلقى دەگەن جاقسى مال.
بەس ولكەگە باقتىرىپ،
بەس ايدىننان سۋارىپ،
بەتەگەلى تاۋعا جابىسىپ،
سيىرىڭ سەنىڭ مىڭ بولسىن!
قىسىڭ قاتتى بولعاندا،
قامىستى جەرگە ايداپ سال،
ءبىسمىللا، اللاۋاكبار!
«ءاۋمين!» دەپ قولىڭدى جاي،
قاباتتۋسىن كۇن مەن اي.
العانىڭ بولسىن سايما — ساي
قاپالىق بولماي كەزىندە
ىلعي بولسىن مامىراجاي.
قوس — قوستان تاۋىپ ءۇل مەن قىز،
مىنگەنى بولسىن جورعا تاي.
ءاۋمين!
ە، قۇدايىم، جارىلقا!
جارىلقاساڭ مالدى قىل!
بىتكەن جۇرتتىڭ الدى قىل!..
ە، قۇدايىم، بالا بەرسىن!
مال مەن باستى جانە بەرسىن!
ساعان قاس قىلعان دۇشپاندى.
تابانىڭنىڭ استىنا سالا بەرسىن!
اللاۋاكبار!
قوزىعا تولسىن كوگەنىڭ،
ۋىز بولسىن جەگەنىڭ.
قۇتتى بولسىن قۇرىعىڭ،
تارتىلماسىن قۇدىعىڭ.
قياقتى بولسىن سۇڭقارىڭ،
تۇياقتى بولسىن تۇلپارىڭ.
ءورىستى بولسىن جايلاۋىڭ،
ىرىستى بولسىن قىستاۋىڭ.
ارىستانداي بولسىن ايباتىڭ،
جولبارىستاي بولسىن قايراتىڭ.
گۇلگە تولسىن ءوڭىرىڭ،
كوڭىلدى ءوتسىن ءومىرىڭ.
اسقا تولسىن تاباعىڭ،
اشىق بولسىن قاباعىڭ!
ءاۋمين!

ءجيى قويىلاتىن سۇراقتار

جولعا شىعار الدىندا قانداي باتا بەرىلەدى؟

جول باتاسىندا جۇرگىنشىنىڭ امان ورالۋى، جولىنىڭ بولۋى جانە كوزدەگەن ماقساتىنا جەتۋى تىلەنەدى.

اسكەرگە اتتانعاندا باتا كىم بەرەدى؟

اسكەرگە اتتانار الدىندا باتا اتا-اناسى، اتاسى نەمەسە اۋىلدىڭ اقساقالى بەرەدى.

مال-جانعا باتا نە ءۇشىن بەرىلەدى؟

مال — قازاقتىڭ نەگىزگى بايلىعى بولعان. مال-جانعا بەرىلەتىن باتادا ءتولدىڭ كوبەيۋى، اۋرۋ-سىرقاۋدان امان بولۋى تىلەنەدى.

ۇقساس بولىمدەر