InfoHub Logo

Күллі елді дүр сілкіндіріп, «адам жегіш» атанған Николай Жұмағалиевтің бүгінгі тағдыры жұртшылықты бей-жай қалдырмайтыны анық. Қазіргі таңда ол сотталып, түрмеде отырған жоқ. Қазақстанның ең қатыгез қылмыскерлерінің бірі саналған Жұмағалиев Алматы облысындағы Ақтас ауылында орналасқан психиатриялық ауруханада ем алуда.

Бұл туралы Infohub.kz ақпарат агенттігі хабарлайды.

Журналист Асмира Ермекқызы Instagram парақшасында осы ауруханада 14 жыл бойы маньяктармен жұмыс істеген психолог Ақмарал Шегентайқызымен болған сұхбатын жариялады. Сол сұхбат барысында Жұмағалиевтің бүгінгі жағдайы туралы да айтылған.

Қанды қылмыстардың хроникасы

Николай Жұмағалиевтің алғашқы қылмысы 1978 жылы тіркелген. Ол жұмыстан қайтып бара жатқан жас әйелді өлтіріп, оның қанын ішкені туралы деректер бар. Одан бөлек, мәйітпен жыныстық қатынасқа түсіп, етін алып кетіп, тамақ ретінде пайдаланған деген айыптаулар да бар. Ресми мәліметтерде оның 57 адамды өлтіргені айтылса, мамандар бұл санның шындығында әлдеқайда көп болуы мүмкін екенін алға тартады.

Сотталмаған маньяк

Психологтардың айтуынша, Жұмағалиев сияқты тұлғалар Қазақстан заңнамасы бойынша сотталмайды. Олардың психикалық ауытқулары бар деп есептеліп, тек республикалық психиатриялық ауруханаларға жатқызылады. Аурухана қызметкерлері Жұмағалиевті «ең тәртіпті емделушіміз» деп сипаттайды. Оның психоэмоционалды жағдайы тұрақты және ол көп сөйлемейтін көрінеді.

Мамандар шизофрениямен ауыратын адамдарды анықтаудың қиындығын атап өтеді. Себебі, науқастар өте қалыпты көрінуі мүмкін. Жұмағалиевтің өзі де алғашқыда психикалық ауру ретінде танылмаған. Тергеу кезінде ол сұрақтарға нақты әрі орынды жауап берген.

«Мен әлемді тазартушымын»

Шизофренияның кейбір түрлерінде науқастарда «мен қоғамды зұлымдықтан тазартып жүрмін» деген ой қалыптасады. Жұмағалиев те өзінің қыздарға шабуылдауын осылайша ақтаған. Ресейлік психиатрлар жүргізген сараптама оның шизофрениямен ауыратынын нақтылаған. Алайда, ол жасаған қылмыстарын мойындамаған және өткен оқиғалар туралы ешкімге ештеңе айтпаған. Ол өзін «жалған құжатпен қамалдым» деп санайды.

Күнделік пен қауесет

Қазір 73 жастағы Николай Жұмағалиев Ақтастағы ауруханада күнделік жазумен айналысады. Алайда, оның не жазғаны белгісіз, күнделігі ешкімге оқылмаған. Кейбір қауесеттерге сүйенсек, ол бостандыққа шыққан соң кітабын жарыққа шығарғысы келеді екен.

Мұндай ауыр психикалық ауруы бар, аса қауіпті қылмыскерлерді қоғамнан оқшаулау жеткілікті ме, әлде заңнаманы қайта қарау керек пе деген сұрақ туындайды. Бұл мәселеге нақты жауап беру қиын болғанымен, адамзаттық және құқықтық тұрғыдан мұндай жағдайлар ескерусіз қалмауы тиіс.