InfoHub Logo

Қазақстан Президенті Қасым-Жомарт Тоқаев «Алатау қаласы туралы арнайы құқықтық режим туралы» Конституциялық заңға қол қойды. Бұл жаңалық елдің дамуына тың серпін беретін маңызды қадам болып саналады.

Бұл туралы Infohub.kz ақпарат агенттігі хабарлайды.

Алатау қаласының ерекше мәртебесі

Жаңа Конституциялық заңның негізгі мақсаты – Алатау қаласының қарқынды және тұрақты дамуына жағдай жасау. Қалаға берілген ерекше құқықтық статус – бұл инновация, инвестиция және экономикалық өсім үшін қолайлы орта қалыптастыруға бағытталған дербес экожүйені құруға деген жаңаша тәсіл.

Жаңа басқару моделі

Ақорданың баспасөз қызметі хабарлағандай, Конституциялық заңмен Алатау қаласын басқарудың жаңа моделі енгізілді. Кәсіпкерлікті, кеден ісін, цифрлық активтерді, ойын бизнесін, әлеуметтік саланы, қаржы нарығын, сәулет пен қала құрылысын, экологияны және қоршаған ортаны қорғауды, мәдениет пен спортты реттеудің негізгі қағидаттары белгіленді.

Қала әкімшілігі арнайы режимді қолданудың рұқсат етілген көлеміне, тиісті құқықтар мен міндеттерге байланысты жеке және заңды тұлғаларға «Алатау резиденті» мәртебесін беретін болады.

Инвестициялық тартымдылық пен қауіпсіздік

Қаланың ұзақ мерзімді инвестициялық және технологиялық дамуы стратегиялық құжаттар – қаланың даму жоспары, мастер-жоспары және даму стратегиясы негізінде қамтамасыз етіледі. Қауіпсіздікті және «ақылды қала» ретіндегі тиімді жұмысын қамтамасыз ету үшін инфрақұрылым нысандары мен қоғамдық қауіпсіздік жүйелеріне қатысты барлық деректер қалалық басқарудың бірыңғай цифрлық платформасына біріктіріледі.

Конституциялық заң сондай-ақ инвесторлар үшін инвестициялық ахуал мен кепілдіктерді, салық-бюджет саясатын, қала дизайнын және жер қатынастарын реттейді.

Конституциялық заңның толық мәтіні басылымда жарияланады.