InfoHub Logo

Алматы қаласында қоғамдық көліктерде төлем жасаудың жаңа жүйесі іске қосылды. Енді жолаушылар "Onay" жүйесімен қатар, "Avtobys" атты екінші оператор арқылы да жолақы төлей алады. Бұл тек төлем әдісін кеңейту емес, сонымен қатар қаланың көлік саласындағы субсидияларды бақылауға және жолаушылар ағынын нақтылауға бағытталған маңызды қадам.

Бұл туралы Infohub.kz ақпарат агенттігі хабарлайды.

Жаңа оператордың мақсаты

Қалалық ұтқырлық басқармасының мәліметінше, "Avtobys" жүйесінің енгізілуі "Onay" жүйесін алмастыруға бағытталмаған. Керісінше, бұл қаланың көлік жүйесін дамытуға, жолаушылар ағынын, маршруттардың сұранысын және ең көп жүктелген уақыттарды анықтауға мүмкіндік береді. Бұл деректер көлік желісін жоспарлау мен дамыту үшін өте маңызды.

Субсидияларды бақылау

Жыл сайын Алматы қаласы автопарктерді субсидиялауға миллиардтаған теңге жұмсайды. 2023 жылы бұл мақсатқа 68,7 млрд теңге, ал 2024 жылы 97,3 млрд теңгеге жуық қаражат бөлінген. "Avtobys" жүйесі арқылы жасалған әрбір транзакцияны бақылау, тасымалдаушылардың нақты шығындарын анықтауға және бюджеттен төленетін қаражаттың негізділігін арттыруға көмектеседі. Қазіргі 120 теңгелік тарифтің өзі өзіндік құнынан төмен екені ескерілсе, бұл бақылаудың маңызы арта түседі.

Басқа қалалардағы тәжірибе

Оператордың (Innoforce) мәліметінше, "Avtobys" жүйесі Семей, Павлодар және Шымкент қалаларында да табысты енгізілген. Бұл қалаларда жүйені қолдану нәтижесінде автопарктердің табысы орта есеппен 25%-ға артқан, ал салық түсімдері 33%-ға өскен. Алматыдағы субсидия көлемінің жоғары екенін ескерсек, бұл жүйе қала мен жеке тасымалдаушылар арасындағы қаржылық қарым-қатынастарды жақсартуға ықпал етеді.

Технологиялық айырмашылықтар

Технологиялық тұрғыдан "Avtobys" жүйесі "Onay" жүйесінен ерекшеленеді. Егер "Onay" негізінен физикалық карталар мен стационарлық валидаторларға сүйенсе, "Avtobys" смартфондар, Bluetooth-сенсорлар және QR-кодтар арқылы төлем жасауға бағытталған. Акимат бұл жаңалықтың бәсекелестікті дамытатынына және төлем жасаудың ыңғайлылығы, жабдықтың тұрақтылығы сияқты көрсеткіштер бойынша бағаланатынына сенімді.