InfoHub Logo

Астанада жеңіл рельсті көлік (LRT) сынақтары жалғасуда. Алғашқы видеолармен бірге әлеуметтік желілерде жаңа көлік құралының шуы туралы пікірталас туындады. Қала тұрғындары жаңа көлік қаншалықты дыбыс шығаратынын белсенді талқылауда.

Бұл туралы Infohub.kz ақпарат агенттігі хабарлайды.

«Күткенімнен шулырақ екен»

Threads және басқа да платформалардағы пайдаланушылар қозғалыстағы пойыздардың бейнежазбаларын жариялайды. Желі қолданушыларының бірі, LRT желісіне жақын жерде тұратынын айтып, былай деп жазды: «Тыныш болады деп ойлағанмын, бірақ жоқ. Терезе жабық болса, қалыпты, ал ашық болса, пойыз өткенде байқалады».

Мұндай жазбалар тез арада ондаған пікір жинайды. Кейбір пікірлерде «мүлдем естілмейді» десе, енді бірі оны ұшақпен салыстырады.

«Көліктен де естіледі» және «Ұшақ ұшып бара жатыр деп ойладым»

Пайдаланушылардың бір бөлігі дыбыстың қашықтықтан да сезілетінін айтады.

«Шынымен шулайды, тіпті көліктен де естіледі»,

«Жақындап өтіп бара жатқанда, ұшақ төмен ұшып бара жатыр ма деп ойладым».

Басқалары мұны пойыздың сағатына 80 км/жылдамдықпен жүруімен және дыбыс оқшаулағышы жоқ ашық эстакадалардың дыбысты күшейтуімен байланыстырады.

«Бұл физика: металлдың металға тиюі – дыбыс пен діріл. Оның үстіне жолдар ашық, дыбыс қалқандары жоқ», – деп жазады пікір білдірушілер.

«Жақында тұрамын – мүлдем естілмейді»

Алайда, қарама-қарсы пікірлер де бар. Желі бойындағы үйлерде тұратын кейбір тұрғындар дыбыс деңгейінің өте төмен екенін айтады.

«LRT деңгейінде тұрамын, терезелер тура желіге қарайды – ашық тереземен әрең естіледі»,

«Тіпті көшеде жақындап өтіп бара жатқанда да, қатты дыбыс жоқ».

Олардың айтуынша, дыбыс бар, бірақ ол қалыпты қала шуынан асып кетпейді.

Оператор не дейді?

Жоба операторы CTS компаниясының мәліметінше, әзірге тұрғындардан ресми шағым түспеген.

«Жобаны жүзеге асыру аясында дыбыс пен дірілді азайтуға бағытталған шешімдер қолданылды. Жүйе халықаралық стандарттарға сәйкес келеді», – деп хабарлады баспасөз қызметі.

Естеріңізге сала кетейік, Астанадағы LRT желісінің сынақ пайдалануы басталғанына алты айдай уақыт болды. Астана әкімдігінің хабарлауынша, жобаны жүзеге асыру кестеге сай жүріп жатыр және жолаушылар тасымалын осы жылдың көктемінде іске қосу жоспарланған.