InfoHub Logo

Таяу Шығыстағы қақтығыс басталғалы бері Біріккен Араб Әмірліктері (БАӘ) АҚШ пен Израильмен бірлесіп, Иран аумағына ондаған әуе соққысын жасаған. Бұл туралы The Wall Street Journal газеті жазды.

Бұл туралы Infohub.kz ақпарат агенттігі хабарлайды.

Басылымның дереккөздері соққылар соғыстың алғашқы күндерінен басталғанын және тіпті сәуір айындағы бітімгершілік жарияланғаннан кейін де жалғасқанын айтады. Шабуылдардың нысандары Ормуз бұғазындағы Кешм мен Әбу-Муса аралдары, Бендер-Аббас порты, Лаван аралындағы мұнай өңдеу зауыты және Асалуйе мұнай-химия кешені болған.

Иранның энергетикалық инфрақұрылымы нысанаға алынды

Кейбір соққылар Иранның энергетикалық инфрақұрылымына, Тегеранның БАӘ-нің мұнай-газ нысандарына жасаған шабуылдарына жауап ретінде жасалған. Асалуйе кешеніне Израильмен бірлесіп жасалған соққы халықаралық сынға ұшырады. Осыдан кейін Вашингтон Израильден энергетикалық нысандарға шабуыл жасауды тоқтатуды сұраған.

Парсы шығанағы елдері Иранға қарсы шабуылдар үшін өз аумақтарын пайдалануға жол бермейтінін мәлімдегенімен, соғыс басталғаннан кейін кейбір мемлекеттер өз позициясын өзгертті.

Тегеранның жауабы және аймақтағы шиеленіс

Өз кезегінде Тегеран аймақтағы елдердің қалаларына, әуежайларына және энергетикалық инфрақұрылым нысандарына зымырандар мен дрондармен шабуыл жасай бастады. Газет дереккөздерінің айтуынша, бұл шабуылдардан ең көп зардап шеккен – БАӘ. Елге 2800-ден астам зымыран мен дрон жіберілген, бұл Израильді қоса алғанда, басқа кез келген елге қарағанда көбірек.

Әмірліктердің қақтығысқа белсенді қатысуы Парсы шығанағындағы Араб мемлекеттерінің ынтымақтастық кеңесі ішінде келіспеушіліктер тудырды. WSJ мәліметінше, Сауд Арабиясы Абу-Дабидің әрекеттеріне наразылық білдіріп, АҚШ-ты БАӘ-ні Иранға қарсы одан әрі соққы жасаудан бас тартуға көндіруді сұраған. Себебі, аймақтық мұнай инфрақұрылымына жауап шабуылдар мен әлемдік мұнай бағасының өсуінен қауіптенген.

Дереккөздердің хабарлауынша, БАӘ президенті шейх Мұхаммед бин Заид пен Сауд Арабиясының мұрагер ханзадасы Мұхаммед бин Салман арасында да шиеленіс туындаған. Әмірліктер басшысы Эр-Риядтың Иранға қарсы бірлескен әскери іс-қимылдарға қатысудан бас тартуына ашуланған. Бұған дейін Reuters Сауд Арабиясы да Иранға жасырын соққылар жасағанын хабарлаған болатын.

Әскери науқаннан бөлек, БАӘ Иранның қаржылық мүдделеріне қарсы шаралар қабылдады. Елде Иранмен байланысты мектептер мен клубтар жабылып, ирандық азаматтарға виза беру және транзитті шектеді.