InfoHub Logo

Астанадағы мерекелік концертте броньдалған көліктің өрт сөндіру жүйесінің кенеттен іске қосылуы жұртшылықтың назарын аударды. Әлеуметтік желіде тараған видеода көліктің астынан түтін шығып, кейін өрт сөндіргіш көбік атылғаны байқалады. Бұл жағдай көпшіліктің алаңдаушылығын тудырып, көлікке не болғаны туралы сұрақтар туындатты.

Бұл туралы Infohub.kz ақпарат агенттігі хабарлайды.

Оқиғаның мән-жайы

7 мамырда Астанада Отан қорғаушылар күніне арналған салтанатты шара өтті. Қазақ елі алаңында мемлекеттік органдардың үздік сарбаздары мен әскери оркестрлер өнер көрсетті. Сондай-ақ, қонақтар үшін заманауи әскери техникалар мен қару-жарақтар көрмесі ұйымдастырылды. Осы шара барысында броньдалған көліктің істен шыққаны туралы ақпарат тарады.

Мемлекеттік күзет қызметінің жауабы

Қазақстан Республикасының Мемлекеттік күзет қызметі Instagram парақшасында бұл жағдайға қатысты ресми мәлімдеме жасады. Ведомствоның хабарлауынша, видеода көрінген жағдай техниканың өртке қарсы қауіпсіздік жүйесінің іске қосылуынан болған.

««Алан» броньдалған машинасының бортында болған балалардың бірі кездейсоқ авариялық өрт сөндіру жүйесінің іске қосқышын басып қалды», - деп түсіндірді қызмет өкілдері.

Мемлекеттік күзет қызметінің мәліметінше, бұл оқиға көліктің қозғалтқышы мен электр сымдарын өрттен қорғайтын жүйенің қалыпты жұмыс істеуіне әкелген. Бұл жүйе автоматты түрде жұмыс істейді және техниканың энергиямен жабдықтау жүйесі өшірулі болса да, іске қосылуы мүмкін.

«Өрт сөндіргіш заттың шығарылуы техниканың істен шыққанын білдірмейді», - деп атап өтті ведомство.

Естеріңізге сала кетейік, 9 мамырда Қазақстан Жеңіс күнін атап өтеді. Ел бойынша мерекелік шаралар өтіп жатыр.