InfoHub Logo

Желіде видео жариялаған Кәрім Мәсімовтің бұрынғы күйеу баласы Азамат Капенов өзіне тағылған айыптар мен Қазақстан темір жолындағы (ҚТЖ) қызметі туралы айтып берді.

Бұл туралы Infohub.kz ақпарат агенттігі хабарлайды.

Капеновтің айтуынша, ол 2001 жылы Қазақстан азаматтығын алған және 2003 жылдан 2015 жылға дейін ҚТЖ-да басшылық қызметтер атқарған. 2015 жылы Ресейге тұрақты тұруға көшуіне байланысты азаматтығынан айырылғанын айтып, кейінірек елшілік берген Қазақстан азаматтығынан шығу туралы құжатты көрсететінін мәлімдеді.

Қос азаматтық және заң талаптары

Оқырмандардың қос азаматтық мәселесіне қатысты сұрақтарына жауап берген Капенов, бұрын мұның заңға қайшы екенін білмегенін мойындады. Ол соңғы кездері қос азаматтық туралы ақпараттардың цифрландырылып, қатайтылғанын атап өтті.

Дикий Арманмен қарым-қатынас

Сондай-ақ, Капенов ұйымдасқан қылмыстық топ құрғаны үшін сотталған Арман Жұмагелдиевпен (Дикий Арман) арадағы қарым-қатынасы жайлы сұраққа да жауап берді. Ол Жұмагелдиевті бауыр және дос ретінде санайтынын айтты.

Іздеу мен сот ісі

Капенов өзінің ешкімнен қашпағанын алға тартып, қылмыстық істі сотқа жіберу үшін тергеуді бастауды талап етті. Ол әлеуметтік желі арқылы Қырғызстанда екенін жеткізіп, іздеуді тоқтатуға шақырды. Оған «бопсалау және рейдерлік» айыптары тағылуда.

Кәрім Мәсімовтің сенімді өкілі ме?

Желі қолданушылары Капеновті бұрынғы премьер-министр Кәрім Мәсімовтің сенімді өкілі болды деген сұрақ қойғанда, ол мұны жоққа шығарды.

Капенов жақында бұл істің мән-жайын толық жария ететінін айтып, көпшіліктен сабыр сақтауды сұрады. Еске сала кетейік, бұған дейін Капеновке Қазақстанда сырттай қамауға алу шарасы санкцияланған болатын. Оған ҚТЖ вице-президенті қызметінде жүргенде өзіне қатысы бар компанияларға заңсыз артықшылықтар жасап, мемлекетке 5,2 млрд теңгеден астам шығын келтірді деген айып тағылған.