InfoHub Logo

Биылғы наурыз айындағы Ұлттық бірыңғай тестілеуге (ҰБТ) қатысқан 179 мыңнан астам талапкердің нәтижесі жарияланды. Алайда, бұл жолы жүздеген талапкер емтихан ережелерін бұзғаны үшін тестілеуден шеттетілді. Бұл туралы ҚР Ғылым және жоғары білім министрлігі мәлімдеді.

Бұл туралы Infohub.kz ақпарат агенттігі хабарлайды.

Тестілеу нәтижелері

Министрлік деректеріне сүйенсек, талапкерлердің 75 пайызы емтиханды қазақ тілінде, 25 пайызы орыс тілінде тапсырған. Ал 157 адам ағылшын тілін таңдапты.

Жалпы, бес пән бойынша орташа балл – 66 болса, ең жоғары көрсеткіш 140 баллға жеткен. Талапкерлердің 70 пайызы белгіленген шекті баллды еңсере алды.

Атырау облысының Жазира Кеңесова ерекше көзге түсті. Ол төрт пәннен 90 балл жинап, қазақ тілінен КАЗТЕСТ сертификатын пайдаланып, қорытынды балын 140-қа жеткізген.

Апелляция және комиссия шешімі

Тестілеу аяқталған соң 30 минут ішінде талапкерлер тапсырма мазмұнына қатысты апелляция бере алды. Ал техникалық себептер бойынша шағымдар емтихан кезінде қабылданды.

Барлығы 31 мыңнан астам өтініш келіп түскен. Оның ішінде 17 тапсырма бойынша өтініштер қанағаттандырылды. Республикалық комиссия жұмысын аяқтап, сертификаттар қатысушылардың жеке кабинеттеріне қойылды.

Сұранысқа ие пәндер

Талапкерлер арасында «Математика-Физика» комбинациясы ең көп таңдалған – 18,7 пайыз. Одан кейін «Биология-Химия» комбинациясы – 16,5 пайыз.

Үшінші орында «Шығармашылық емтихан» тұр, оны 10,3 пайыз талапкер тапсырған.

Ереже бұзушылықтар

Ерекше білім беру қажеттілігі бар 408 талапкер тестілеуге қатысты. Олар үшін арнайы жағдайлар жасалған.

ҰБТ кезінде 264 ереже бұзушылық тіркелді. Оның 130-ы тыйым салынған заттарды (смартфон, «шпаргалка») алып өтпек болғандықтан, емтиханнан шығарылды.

Тағы 134 талапкер емтихан ережесін бұзғаны үшін аудиториядан шығарылып, нәтижелері жойылды. Өзге адамдардың атынан кірген жағдайлар анықталмады.

Қосымша тексеру

ҰБТ-2026 аяқталғаннан кейін 31 қазанға дейін бейнежазбалар талданады. Егер бұзушылықтар анықталса, тестілеу нәтижелері жойылуы мүмкін.