InfoHub Logo

Түркістан қаласындағы ЮНЕСКО-ның әлемдік мұра нысаны, киелі Қожа Ахмет Яссауи кесенесінің сыртқы қаптамасының сыртқа шығып кеткені туралы фотосуреттер әлеуметтік желіде тарап, жұртшылықты алаңдатты. Алайда, бұл жағдай жоспарлы түрде жүзеге асырылған ғылыми-реставрациялық жұмыстардың нәтижесі болып шықты.

Бұл туралы Infohub.kz ақпарат агенттігі хабарлайды.

Қазақстан Республикасы Мәдениет және ақпарат министрлігінің мәліметінше, бұл әрекет «ғылыми-реставрациялық жұмыстарға дайындық мақсатында глазурленген плиткаларды жергілікті ауқымда жаппай бөлшектеу» рәсімі болған. Қазіргі уақытта кесене күмбезінің басқа да қаптама бөліктерінің жай-күйі зерттеліп, оларды толық алып тастау жұмыстары жүргізілуде.

Күмбездің жағдайы мен реставрация жұмыстары

Министрлік өкілдерінің айтуынша, соңғы жылдары Қожа Ахмет Яссауи кесенесінің күмбезіндегі глазурленген жабынның кейбір учаскелерінде деформациялық өзгерістер байқалған. Бұл өзгерістер 2019-2020 жылдары жүргізілген реставрация кезінде салынған жабынға қатысты болған.

Осыған байланысты, «Қазқалпына келтіру» РМК мамандары күмбездің техникалық жай-күйін үнемі бақылап, ғылыми-реставрациялық жұмыстарға дайындық жасап отырған. Мамыр айында глазурленген қаптаманың әлсіреген учаскелерін кезең-кезеңімен алып тастау жұмыстары басталды. Сарапшылар апаттық жағдайдағы бөліктерді толық бөліп алу қажеттігін анықтаған. Нәтижесінде, 27 мамырда «Қазқалпына келтіру» мамандары глазурленген плиткаларды жаппай бөлшектеуді жүзеге асырды.

Жұмыстар жоғары деңгейде бақылауда

Бұл жұмыстарды Премьер-министрдің орынбасары – Мәдениет және ақпарат министрі Аида Балаеваның жеке бақылауында өтіп жатқаны айтылды.

«Жағдайды үнемі бақылау қамтамасыз етілген. Барлық шешімдер сарапшылық қорытындылар, ғылыми тәсілдер және мәдени мұра нысандарын сақтаудың халықаралық стандарттары негізінде қабылданады. Алаңдауға негіз жоқ. Жүргізіліп жатқан жұмыстар – жоспарлы, ғылыми негізделген және кесене сақталмағын, одан әрі зақымдануын болдырмауды және бірегей ескерткішті болашақ ұрпақ үшін ұқыпты сақтауды қамтамасыз етуге бағытталған», – деп хабарлады министрлік.