InfoHub Logo

Енді мемлекеттік қызметкерлердің жалақысы тек лауазымына ғана емес, кәсіби деңгейіне қарай өсетін болады. Сенат мақұлдаған жаңа заң жобасы бойынша, қызметтерін атқарудағы жетістіктері мен біліктілігі жоғары мамандарға жоғары жалақы төленеді.

Бұл туралы Infohub.kz ақпарат агенттігі хабарлайды.

Жаңа карьералық өсу моделі

Жаңа жүйе бойынша, мемлекеттік қызметшілер бір лауазымның ішінде төрт түрлі деңгейде өсу мүмкіндігіне ие болады. Бұл «горизонтальды карьера» деп аталады. Қызметкердің келесі деңгейге көтерілуі оның жұмыс нәтижелерін бағалау, қосымша білім алуы және тағылымдамадан өтуі сияқты факторларға байланысты болады.

«Бұл мемлекеттік қызметтің тартымдылығын арттырып, кәсіби мамандарды сақтап қалуға бағытталған шаралар кешенін қамтиды. Енді қызметкерлер тек жоғары лауазымға ғана емес, өз саласында да дами алады», - дейді сенатор Евгений Больгерт.

Жалақыны индекстеу және қосымша жеңілдіктер

Заң жобасында мемлекеттік қызметшілердің жалақысын үш жылда бір рет міндетті түрде индекстеу қарастырылған. Бұл инфляцияның әсерін азайтып, қызметкерлердің табысын тұрақты ұстауға көмектеседі.

Сонымен қатар, басқа қалаға ауысқан қызметкерлерге көтерме жәрдемақы мен көлік шығындарын өтеу қарастырылған. 25 жылдан астам еңбек өтілі бар және мемлекеттік немесе ведомстволық марапаттары бар қызметкерлерге зейнетке шыққанда төрт жалақы мөлшерінде бір реттік сыйақы беріледі.

Еңбек өтіліне байланысты қосымша ақылы демалыс күндері де белгіленді: 10 жылдан асса – 3 күн, 15 жылдан асса – 5 күн, 20 жылдан асса – 10 күн. Отбасылық жағдайларға байланысты 10 күндік ақылы демалыс та қарастырылған.

Жаңа тәртіптер мен кепілдіктер

Жаңа заң бойынша, қызметінен заңсыз босатылған немесе лауазымы төмендетілген қызметкерлерге ең көбі алты айға дейінгі кезеңге жалақысы немесе жалақы айырмашылығы өтеледі.

Тәртіптік жауапкершілік жүйесі де жетілдіріліп, жеңілдететін және ауырлататын мән-жайларды ескере отырып, икемді тәсілдер енгізілді. Сонымен қатар, мемлекеттік қызметшілердің кәсіби қызметіне заңсыз араласудан қорғау кепілдіктері күшейтілді.