InfoHub Logo

Израиль премьер-министрінің кеңсесі әлеуметтік желіде тараған Биньямин Нетаньяхудың қаза тапқаны туралы ақпаратты жоққа шығарды. Бұл туралы Түркияның Anadolu агенттігіне берген түсініктемеде аталған мәліметтердің "жалған жаңалық" екені айтылып, премьер-министрдің жағдайы жақсы екені хабарланған.

Бұл туралы Infohub.kz ақпарат агенттігі хабарлайды.

Deccan Chronicle басылымының жазуынша, Нетаньяхудың қаза тапқаны туралы қауесет Таяу Шығыстағы шиеленістің күшеюі аясында тарай бастаған. Әсіресе АҚШ пен Израильдің Иран аумағына жасаған соққыларынан кейін әлеуметтік желіде түрлі расталмаған мәліметтер көбейген. Кейбір жазбаларда Израиль премьер-министрі өлді немесе жоғалып кетті деген болжамдар айтылған.

Видеодағы сәтсіз кадр немесе визуалдық бұрмалану

Бұл әңгімелер 13 наурыз күні Нетаньяхудың X әлеуметтік желісіндегі ресми парақшасында жарияланған видеоүндеуінен кейін одан әрі күшейе түсті. Кейбір қолданушылар видеодан алынған бір кадрда премьер-министрдің оң қолында алты саусақ бар сияқты көрінетінін айтып, бұл бейне жасанды интеллект көмегімен жасалған болуы мүмкін деген болжам таратқан.

Алайда сарапшылар мұндай көрініс видеодағы сәтсіз таңдалған кадр немесе визуалдық бұрмалану салдарынан пайда болуы мүмкін екенін айтады. Яғни бұл жағдай бейненің жасанды интеллект арқылы өңделгенін дәлелдемейді.

Иран тарапының мәлімдемесі

Бұған дейін Иранның Ислам революциясы сақшылары корпусы (КСИР) Нетаньяхудың тағдыры белгісіз екенін мәлімдеп, оның "қаза тапқан болуы немесе отбасымен бірге оккупацияланған аумақтардан қашып кеткен болуы мүмкін" деген болжам айтқан еді. Израиль билігі бұл ақпаратты шындыққа жанаспайды деп мәлімдеді.