InfoHub Logo

Қазақстанда «Ұлттық қор – балаларға» бағдарламасына қатысушы 12 мыңға жуық бала азаматтығын ауыстырғандықтан, бағдарламадан шығарылды. Бұл туралы Бірыңғай жинақтаушы зейнетақы қоры (БЖЗҚ) мәлімдеді.

Бұл туралы Infohub.kz ақпарат агенттігі хабарлайды.

Не себеп болды?

Бағдарлама ережелеріне сәйкес, Қазақстан азаматтығынан айырылған немесе басқа елдің азаматтығын алған балалар қатысушылар тізімінен шығарылады. Бұл ақпаратты ҚР азаматтары туралы мемлекеттік деректер базасынан алады.

2024 жылы 3148, ал 2025 жылы 8757 бала азаматтығын ауыстырған.

Қанша қаражат қайта бөлінді?

Азаматтығын өзгерткен балалардың шоттарынан жалпы сомасы 2,4 миллион доллар жинақталған қаражат алынып, қалған қатысушыларға бөлінді. Бұл қаражат 2024 және 2025 жылдарға арналған жалпы есептеуге қосылған.

БЖЗҚ түсіндіргендей, бір қатысушыға шаққандағы мақсатты талаптарды есептеу әдісі бойынша, есепті жылдағы жалпы соманы сол жылдың соңындағы қатысушылар санына бөлу арқылы жүзеге асырылады. Осылайша, алынып тасталған қаражаттар әрбір қатысушыға есептелетін соманы анықтауда толық ескеріледі.

2024 жылғы түзетулерді ескере отырып, бір қатысушыға тиесілі мақсатты талаптар сомасы 129,38 доллар болса, 2025 жылға бұл көрсеткіш 130,71 долларға жетті.

Бағдарламадан қандай жағдайларда шығаруы мүмкін?

БЖЗҚ мәліметінше, бағдарламадан туған күні қате көрсетілген (мысалы, 2007 жылдың орнына 2005 жыл) немесе қайтыс болған (күні қате көрсетілген) балалар да шығарылады.

Егер бағдарлама қатысушысы қайтыс болса, оның жинақтары азаматтық заңнамаға сәйкес мұрагерлікке өтеді. Мұрагерлер БЖЗҚ-ға жүгініп, тиісті қаражатты алуына болады. Алайда, бұл қаражаттар тек қайтыс болған тұлғалардың мақсатты жинақтау шотына аударылғаннан кейін ғана қолжетімді болады.