InfoHub Logo

Қазақстанның екінші атом электр станциясы (АЭС) Балқаш маңында салынатыны белгілі болды. Бұл туралы Атом энергиясы агенттігінің төрағасы Алмасадам Сәтқалиев мәлімдеді. Оның айтуынша, жобаның жұмыс атауы – АЭС «Мойынқұм».

Бұл туралы Infohub.kz ақпарат агенттігі хабарлайды.

Жобаның егжей-тегжейі

Алмасадам Сәтқалиевтің сөзінше, қазіргі таңда Балқаш өңірінде үш перспективалы алаң қарастырылуда. «Екінші станция бойынша шешім қабылданды. Ол да Балқаш маңында орналасады. Қазір үш алаң зерттеліп жатыр. Қарастыру нәтижесінде нақты орналасатын жері туралы хабарлаймыз», - деді агенттік басшысы.

Жобаның жұмыс атауы – АЭС «Мойынқұм». Жаңа АЭС әрқайсысының қуаттылығы 1200 мегаватт болатын екі энергоблоктан тұрады деп күтілуде.

Технология жеткізушісі анықталуда

Агенттік басшысының айтуынша, технология жеткізушіні таңдау бойынша әлеуетті серіктестермен келіссөздер жүргізілуде. Ол Қытайдың China National Nuclear Corporation компаниясы басым серіктес ретінде қарастырылатынын еске салды.

Естеріңізге сала кетейік, өткен жылдың күзінде Қазақстанда бірінші АЭС-тің атауы анықталған болатын. Азаматтардан түскен ұсыныстардың басым көпшілігін алған «Балқаш» атом электр станциясы» атауы байқау комиссиясының қорытынды отырысынан кейін жеңімпаз деп танылды.

Бұған дейін 2050 жылға дейін Қазақстанда кемінде үш АЭС пайдалануға беру жоспарланғаны хабарланған болатын. Сонымен қатар, төртінші станцияның құрылысы бойынша жобаны іске асыру көзделген.

Мемлекет басшысының бастамасы

2025 жылдың наурыз айында Мемлекет басшысы Қасым-Жомарт Тоқаев Ұлттық құрылтай отырысында Қазақстанға бір емес, үш АЭС салу стратегиялық маңызды екенін мәлімдеген еді. Президент алдағы ондаған жылдар бойы экономикалық дамудың берік негізін қамтамасыз ететін жаңа энергетика саласын құру Қазақстан үшін стратегиялық маңызды екенін атап өтті.

2025 жылдың шілдесінде бірінші вице-премьер Роман Скляр Қазақстандағы екінші және үшінші АЭС-ті қытайлық тарап салатынын хабарлаған болатын.