InfoHub Logo

1 сәуірден бастап Қазақстанда касса аппараттарының ескірген деректерді беру хаттамасы (2.0.2) қолданыстан шығып, жаңа (2.0.3) хаттамасы іске қосылды. Бұл өзгерістер бизнеске жаңа міндеттер жүктеп, салық органдарына бизнестің заңсыз әрекеттерін анықтауға мүмкіндік береді.

Бұл туралы Infohub.kz ақпарат агенттігі хабарлайды.

Жаңа хаттамадағы өзгерістер

Жаңа хаттама бойынша, әрбір сатылатын тауар Ұлттық тауар каталогінде тіркелуі және оның коды фискалдық чекте көрсетілуі керек. Сонымен қатар, касса аппаратының геолокациясы анықталады. Бұл әсіресе, бір сауда орнында бірнеше ЖСН бойынша тіркелген кассаларды пайдаланып, бизнесті бөлу (дробление) сияқты заңсыз әрекеттерді анықтауға бағытталған.

Екі түрлі касса, екі түрлі жағдай

Бизнес иелері екі түрлі кассаны қолданады: физикалық аппараттар (мысалы, «Меркурий») және онлайн-кассалар (Nurkassa, ReKassa сияқты бағдарламалық жасақтамалар). Бағдарламалық кассалардың хаттамалары автоматты түрде жаңартылады. Ал физикалық кассаларды жаңарту үшін кәсіпкерлердің өздері сервис орталықтарына жүгініп, шығындалуына тура келеді.

Штрафтар бар ма?

Жаңа хаттаманы қолданбағаны немесе кассаны жаңартпағаны үшін тікелей айыппұл жоқ. Алайда, касса жұмыс істемей, фискалдық чек берілмесе немесе чек дұрыс ресімделмесе, әкімшілік құқық бұзушылық туралы кодекске сәйкес айыппұл салынады. Яғни, ескірген бағдарлама салдарынан туындаған бұзушылықтар үшін жауапкершілікке тартылуы мүмкін.

Мәселені қалай анықтауға болады?

Ескірген хаттамасы бар касса жұмысын жалғастыра береді, бірақ деректер салық органдарына бармайды. Бұл жағдайды анықтау бірден болмайды. Кәсіпкерлер декларация тапсырған кезде немесе банк деректерімен салыстыру кезінде мәселені байқауы мүмкін. Сондай-ақ, тұтынушылардың шағымдары арқылы да анықталуы ықтимал. Мемлекет азаматтарды чек бермеген сауда орындары туралы хабарлағаны үшін ынталандырады.

Қазір не істеу керек?

Мамандар бағдарламалық кассаларға көшуді ұсынады, себебі олардың жаңартулары автоматты түрде жүреді. Физикалық касса қолданатын кәсіпкерлерге аппаратты сервис орталығына апарып, бағдарламаның өзектілігін тексерту қажет. 1 сәуірден кейін жаңартуды кешіктіру – деректердің салық органдарына жетпей, кейіннен түсініктеме беруге мәжбүр болу қаупін тудырады.