InfoHub Logo

Абай облысының мамандандырылған ауданаралық сотында жасөспірімге қатысты үкім шықты. Ол ұлтаралық араздықты қоздырды деп айыпталған.

Бұл туралы Infohub.kz ақпарат агенттігі хабарлайды.

Оқиғаның мән-жайы

Іс материалдарына сәйкес, 2025 жылдың ақпан айында жасөспірім Б., өзін скинхедтердің нәсілшіл қозғалысының ізбасарымын деп санай отырып, Telegram мессенджерінде «Skinheads industries-Semey» атты чат ашқан.

«Топтың администраторы болған ол, адамдарды ұлтына қарай қорлайтын, әсіресе Үндістаннан келген студенттер мен олардың мәдениетіне қатысты пікірлер айтылған мәтіндік және дыбыстық хабарламалар жариялаған», - делінген хабарламада.

Бұған қоса, жасөспірім чат қатысушыларын өз көзқарастарын қолдауға және Семей аумағында экстремистік идеяларды тарату үшін басқаларды, соның ішінде кәмелетке толмағандарды тартуға шақырған.

Сот шешімі

Прокурор жасөспірімге 1 жыл 4 ай бас бостандығын шектеуді сұраған. Жасөспірім кінәсін толық мойындап, өкінген.

«Сотта жауапкершілікті жеңілдететін мән-жайлар – кәмелетке толмаған жасы мен кінәсін мойындауы, сондай-ақ Б.-ның бұрын қылмыстық жауапкершілікке тартылмағаны ескерілді. Кәмелетке толмағандар үшін жазаның неғұрлым жеңіл шектерін көздейтін Қылмыстық кодекстің 55-бабы, 2-тармағының 2-тармағы талаптарын ескере отырып, сот Б.-ға 1 жыл 4 ай мерзімге бас бостандығын шектеу түріндегі жаза тағайындады», - делінген сот хабарламасында.

Сот Қылмыстық кодекстің 81-бабының талаптарын ескерді, оған сәйкес бас бостандығын шектеу кәмелетке толмағандарға 2 жылға дейінгі мерзімге тағайындалады.

Үкім заңды күшіне енді.

Сот сондай-ақ, экстремистік идеяларды тарату, адамдарды ұлтына қарай қорлау және арандатуға шақыру қылмыстық жауаптылыққа жататынын, оның ішінде интернетте жасалған жағдайларда да екенін еске салды.