InfoHub Logo

Наурыз мерекесі кезінде Шығыс Қазақстан облысының домбырашылары Гиннесс рекордтар кітабына енді деген хабар тарады. Алайда, кейбір оқырмандар бұл ақпараттың шындығына күмән келтірді.

Бұл туралы Infohub.kz ақпарат агенттігі хабарлайды.

Рекорд орнату туралы не белгілі болды?

Бұған дейін Шығыс Қазақстан облысы әкімдігінің хабарлауынша, Өскемендегі Республика алаңында 5201 домбырашы бір мезгілде «Ақбұлақ» әнін орындаған. Шара Наурызды тойлауға арналған. Жергілікті билік мәліметі бойынша, осы іс-шара барысында әлемдік рекорд орнатылған.

Облыс әкімі Нұрымбет Сақтағановқа рекордты Гиннесс рекордтар кітабына енгізу туралы сертификат салтанатты түрде табысталған. Бұл жаңалықты қазақстандық БАҚ-тар кеңінен таратты.

Сертификат пен ұйым арасындағы айырмашылық

Алайда, берілген сертификат Guinness World Records халықаралық ұйымының ресми құжаттарынан өзгешеленіп шықты. Оның үстіне, сертификатты «КИНЕС Қазақстан» атты жеке құрылым берген.

Бұл жайтқа журналист Абай Сейфуллаулы да назар аударып, әлеуметтік желіде күмән білдірді. Оның пікірінше, Наурыз мерекесінде өткен ауқымды флешмоб қателікпен Гиннесс рекорды ретінде жарияланған болуы мүмкін.

«Кинес» пен «Гиннес»: айырмашылығы неде?

Ашық дереккөздеріне сүйенсек, «Кинес Қазақстан» жобасы Guinness World Records халықаралық ұйымымен ешқандай байланысы жоқ. Бұл – қазақстандықтардың түрлі жетістіктерін тіркейтін және ұлттық рекордтар кітабы ретінде жұмыс істейтін жеке бастама.

Ал Guinness World Records – әлемдік рекордтарды тіркейтін халықаралық ұйым болып саналады.