InfoHub Logo

Тараз қаласындағы №40 гимназия аумағында 10-сынып оқушысы биіктіктен құлап, ауыр жарақат алды. Оқиғадан кейін жасөспірім облыстық балалар ауруханасының жансақтау бөліміне жеткізілді.

Бұл туралы Infohub.kz ақпарат агенттігі хабарлайды.

Оқиғаның мән-жайы

Алдын ала деректер бойынша, оқиға таңертеңгі уақытта болған. Оқушы мектеп ғимаратының сыртындағы өрт сөндіру сатысына көтеріліп, кейін тепе-теңдігін жоғалтып, төмен құлап кеткен. Бұл сәтті бейнебақылау камералары тіркеп алған.

Сондай-ақ, оқиға алдында оқушының WhatsApp желісінде «қоштасу» мағынасындағы хабарламалар жібергені анықталды.

Дәрігерлер жағдайын ауыр деп бағалап отыр

Қазіргі уақытта жасөспірім аурухананың жансақтау бөлімінде жатыр. Оған мидың шайқалуы, сүйек сынықтары және ішкі ағзалардың жыртылуы диагнозы қойылды. Дәрігерлер оның жағдайын өте ауыр деп сипаттап отыр.

Белгілі болғандай, оқушы сабағын жақсы үлгеріп, үйірмелерге де қатысқан. Бұған дейін онымен профилактикалық жұмыстар жүргізілгенімен, анасы психологиялық-педагогикалық көмектен бас тартқан.

Тергеу басталды

Полиция қызметкерлері оқиғаның мән-жайын анықтап жатыр. ҚР Қылмыстық-процестік кодексінің 201-бабына сәйкес, тергеу мүддесіне байланысты өзге ақпарат жарияланбайды. Полиция департаменті аталған дерек бойынша ҚР Қылмыстық кодексінің 114-бабы 3-бөлігі бойынша іс қозғады.