InfoHub Logo

Жүргізушілердің көлік тізгіндеп бара жатып телефонмен сөйлесуіне немесе оны пайдалануына тыйым салатын ережелер ескірді деп санайтын сарапшылар бар. Олар заңнамаға өзгерістер енгізіп, нормаларды нақтылауды талап етуде.

Бұл туралы Infohub.kz ақпарат агенттігі хабарлайды.

Қазақстанда 12 наурыздан бастап жүргізушілердің көлік тізгіндеп бара жатып телефонмен сөйлескені және қауіпсіздік белдігін тақпағаны үшін автоматты түрде айыппұл салына бастады. Ішкі істер министрлігі мұндай айыппұлдар бойынша алғашқы статистиканы қорытындылауға әлі ерте екенін атап өткенімен, автокөлік иелері алаңдаулы. Олар әлеуметтік желілерде айыппұлдан құтылудың түрлі амалдарын іздеп, тіпті телефонды бас киімге жасыруға немесе жол камераларынан жасыру үшін кішкентай қолшатырлар сатып алуға дейін барды. Алайда, автосарапшылардың айтуынша, мұндай кеңестерге ерген жағдайда айыппұлдан құтылу былай тұрсын, бұл жүргізушіге қосымша кедергі келтіруі мүмкін.

Ескі нормалар мен жаңа технологиялар

Заңгер Сайкен Айсин телефонды пайдалануға қатысты айыппұл нормасының ескіргенін айтады. Бұл нормалар кнопока телефондар дәуірінде жасалған, бірақ бүгінгі таңда смартфондардың кең таралуына байланысты қолданысқа жарамсыз болып қалған.

«18 жыл бұрын телефондар кнопокалы болатын, олар тек сөйлесуге және SMS жазуға арналған еді. Ал бүгінгі смартфондар навигация, такси қызметтері мен курьерлердің тапсырыс қабылдауы сияқты көптеген маңызды функцияларды атқарады. Кейде тіпті ауа райы нашарлаған кезде жолда көруді жақсарту үшін де қолданылады», – дейді Сайкен Айсин.

Сарапшының айтуынша, тіпті полиция қызметкерлерінің өзі рацияны пайдаланып, қозғалыс кезінде ереже бұзады. Норманың анық еместігі таңдамалы құқық қолдануға жағдай тудырып, сыбайлас жемқорлық тәуекелдерін тудыруы мүмкін.

Заңды нақтылау қажет

Автоэксперт Алексей Алексеевтің пікірінше, заңнаманы нақтылау қажет.

«Шындығында, бұл норманы нақты түсіндіру керек. Қазір Ішкі істер министрлігі телефонды қандай жағдайда қолдануға болатынын, ал қандай жағдайда айыппұл салынатынын түсіндіріп жатыр. Дегенмен, бұл норманы заңда нақты көрсету қажет. Сонда ешкім өз еркімен шешім қабылдап, адам айыппұлға шағымданғанда судьяның өз қалауымен шешім шығаруына жол берілмейді», – дейді Алексей Алексеев.

Бұған дейін полиция көлік тізгіндеп бара жатып телефонды қалай пайдалану керектігін, айыппұл алмау үшін не істеу керектігін түсіндірген болатын. Басты шарт – телефонды құлаққа жақын ұстамау немесе қолында ұстамау. Оны арнайы тұғырға қойып пайдалануға болады, бірақ онымен жұмыс істеуге болмайды. Алайда, бұл жауаптарда да айқындық аз.