InfoHub Logo

Almaty qalasy №151 JBBM-tiń
qazaq tili páni muǵalimi Aıtmuqan Aınýr Ermýhambetqyzy

Biz kimbiz?! Biz – birligi jarasqan elmiz. Kógimizde kók týymyz jelbiregen elmiz. Ushqan qustyń qanaty, jortqan ańnyń tuıaǵy tozatyn,  qarasań kóziń talatyn ushy-qıyry joq  ulan-ǵaıyr jeri bar baqytty elmiz. Tasqa qashalyp jazylǵan tarıhy bar elmiz. Tósinde 130-dan astam ult ókilderi tatý-tátti, baıashatty ǵumyr keship jatqan elmiz. Biz – baqytty eldiń baqytty urpaqtarymyz.

Talaı ǵasyrdan beri osynaý qazaq jerin qanshama ult ókilderi mekendep kele jatyr. Qaımaǵy buzylmaǵan tatý-tátti berekesimen bir shańyraq astynda yntymaqtasa kún keship jatyr. Solardyń bir dáleli retinde №151 jalpy bilim beretin mektepti aıtýǵa bolady. Qazirgi tańda bilim oshaǵynda 1872 oqýshy bilim alýda. Solardyń ishinde qazaq, dúngen, uıǵyr, orys, káris, ózbek, qyrǵyz syndy 16 ult pen ulystardyń  balalary bilim nárimen sýsyndaýda. Mektep ujymynda da ártúrli ult ókilderi myzǵymas tatýlyqpen birge qyzmet isteýde. Aıta keterligi, bári bir jaǵadan bas, bir jeńnen qol shyǵaryp «Bárimiz – birimiz úshin, birimiz – bárimiz úshin» dep bilek sybana jumys atqarýda. Bul da bolsa, birligimizdiń belgisi.

Qazir oqýshylarymyz elimizde bolyp jatqan tótenshe jaǵdaıǵa baılanysty qashyqtyqtan oqyp jatyr. Bul árıne oqýshylarymyzdyń baǵdarlamany ıgerýine esh kedergi keltirip jatqan joq. Bilimdi de, bilikti ustazdarymyz balalardy qashyqtyqtan oqytýda. «1-mamyr – Qazaqstan halyqtarynyń birligi kúni» aıasynda onlaın túrde «Birlik túbi tirlik» sýret baıqaýy, «Birligimiz jarasqan!» án baıqaýy, «Biz birgemiz!»syndy óleń baıqaýy ótti.

Ótken jyly ǵana mektebimizde balalar assambleıasynyń ashylýy bolyp, sonyń aıasynda «Bir shańyraq astynda» atty is-shara ótken bolatyn. Osy is-shara negizinde qatysýshylar Qazaqstan elinde turatyn halyqtarǵa degen ystyq yqylasy men sheksiz mahabbatyn kórsete bildi. Mektep dırektory Gúlshat Jaqsylyqovna óz sózinde: «2019 jyly sáýir aıynyń 26-sy Qazaqstan halyqtarynyń balalar assambleıasy quryldy.  Bul aasambleıanyń negizgi maqsaty: balalardyń patrıottyq sezimin oıatý, ulttardyń jan-jaqty mádenı damýyn, sonymen qatar basqa ulttardyń Qazaqstan mádenıettanýy men ár ult ókilderiniń birligi» ekenin basa aıtty. İs-sharany qoldaý maqsatynda kóptegen ulttyq mádenı ortalyq tóraǵalary keldi. Atap óter bolsaq, «Qalalyq ádistemelik kabıneti» laboratorıasynyń ádiskeri – S.R. Kapalbekova, «Aýǵan ortalyǵy «Arıananyń» tóraǵasy V.Ahmadýlla, «Dúngen mádenı ortalyǵy «Shınsyn»tóraǵanyń orynbasary R.Z.Sýltanova, «Qyrym tatarlarynyń mádenı ortalyǵynyń» ardagerler kenesiniń tóraǵasy I.A.Lohmanov, «Dúngen mádenı ortalyǵynyń analar kenesiniń tóraǵasy F.M.Abdýllına  jáne de taǵy da basqa  qonaqtar keldi. İs-shara joǵary deńgeıde ótti.

«Bereke bastaýy birlik,el ishi tatý tirlik» qaǵıdasyn ustanǵan el úshin,biz úshin bul meıramnyń orny bólek. Elimizdegi eń jarqyn jáne mereıli meıramdardyń biri. Birligimiz jarasyp, elimiz  tynysh bolyp,ult demeı,tek qana tatýlyqta,beıbit zamanda kún kesheıik.                        

---