InfoHub Logo

Menedjment sekildi salanyń el ómirindegi mańyzyna dálel keltirýdiń ózi artyq. «Rýhanı jańǵyrý» baǵdarlamasynyń «Qazaq tilindegi 100 jańa oqýlyq» jobasy negizinde aýdarylǵan alǵashqy 18 kitaptyń qataryna áıgili Rıkkı Grıffınniń «Menedjment» oqýlyǵy engizilgeni de sondyqtan. Bul kitap jastarǵa nesimen qundy? Bul týraly Halyq sharýashylyǵy ýnıversıtetiniń Ekonomıka jáne menedjment fakúltetiniń dekany, ekonomıka ǵylymdarynyń doktory, profesor Samajan Ómirzaqovten aıtyp berdi.

«Bizdiń aýdarǵan kitabymyz esimi álemge áıgili Rıkkı Grıffınniń «Menedjment» atty kitaby. «Menedjment» kitabynyń 12-shi basylymyn aýdardyq. Men aýdarma barysynda ǵylymı redaktor boldym», - deıdi Samajan Ómirzaqov.

Profesordyń aıtýynsha, jalpy, bul kitaptyń birinshi basylymy 1984 jyly jaryq kórgen. Kúni búginge deıin 12 ret basylyp shyqqan. Kitaptyń orys tiline nemese basqa tilderge aýdarylǵan balamalary aýdarmashylardyń qolynda bolmaǵan. Iaǵnı, týyndy túpnusqasynan, ıaǵnı aǵylshyn tilinen birden qazaq tiline tárjimalanǵan. Bes adamnan turatyn aýdarmashylar - Halyq sharýashylyǵy ýnıversıtetiniń medenjment kafedrasynyń profesorlar quramy. Onyń úsheýi - menedjment kafedrasynda osy pánnen dáris berip júrgen muǵalimder bolsa, bireýi ekonomıka ǵylymdarynyń profesory ári aǵylshyn tiliniń mamany. Úshinshisi - «Bolashaq» baǵdarlamasy boıynsha oqyp kelgen jas ǵalym.

«Menedjmenttiń» buǵan deıin shyǵarylyp júrgen oqýlyqtardan aıyrmashylyǵy kóp. Máselen, jalpy basqarý ǵylymyn tájirıbede paıdalaný, onyń ishinde iri kásiporyndarda basqarýdy, ıaǵnı menedjmentti durys paıdalana otyryp, aıtýly jetistikterge qalaı jetýge bolatyny týraly keıster molynan berilgen. Sonymen qatar, álemdik iri kásiporyndardyń sátsizdikke ushyraǵan jaǵdaılary da jazylǵan. Jalpy, kásiporyn nelikten sátsizdikke ushyrady? Qandaı qıyndyqtarǵa kezdesti? Sonyń ishindegi basqarý júıesinde bolǵan kemshilikterdi, tolyq málimetti týyndy jiliktep turyp aldyńyzǵa jaıyp beredi», - deıdi profesor.

Samajan Ómirzaqovtyń aıtýyna qaraǵanda, «Menedjment» stýdentter qaýymyna ǵana emes, Elbasynyń ózi aıtqandaı memlekettik organdarda qyzmet atqaratyn, bızneste júrgenderge, magıstranttar men doktoranttardyń bárine taptyrmas bilim kózi. Profesor basqarýdyń qyr-syryn, ónerin qoǵamymyzdyń kez kelgen múshesi meńgerýi kerek dep esepteıdi.

«Bıyl qazaq tiline aýdarylǵan 18 kitaptyń ishinde ekonomıserdiń qanjyǵasyna 3 kitap túsip otyr. Onyń biri - «Menedjment». Ekinshisi - «Kásipkerlik». Úshinshisi - «Ekonomıks» kitaby. Osy kitaptardy aýdarmas buryn eń aldymen, óz aramyzda shaǵyn konferensıa uıymdastyryp, barlyq ekonomıkalyq termınderdiń birizdiligin talqylaǵan edik. Jalpy barlyq termınderdi qazaq tiline aýdarý múmkin emes. Sondyqtan, taqyryptardyń mazmundaryna qaraı, berilgen túsinikterdi, uǵymdardyń oqyrmanǵa durys jetkizilýin kózdedik. Dástúrli túsiniktermen qatar, jańa uǵymdar men tujyrymdardy da kórsete bilgen sekildimiz. Ony oqyrman ózi baǵalaı jatar», - deıdi profesor. 

Bir ǵana sózdiń birneshe balamasy bolýy múmkin. Sol sózdiń balamasyn aýdarmashylar taqyryptyń mazmunyna baılanysty qoldanýǵa tyrysqan.

«Elbasy shet tilderden engen sózderdi qabyldaýǵa beıimdelý kerektigin aıtty. Osy ustanymdy ustandyq. Integrasıa, dıversıfıkasıa, prınsıp, fýnksıa degen sózderdi óziniń maǵynasyna qaraı árbir taqyrypta túrli deńgeıde paıdalanýǵa tyrystyq. Kitaptyń aýdarma jumysy shilde aıynda bastalyp, qyrkúıekte (2017 jyl) aıaqtaldy. Aýdarma barysynda ǵylymı redaktorlarmen qatar, ádebı redaktorlar da jumyldyryldy. Olar da aýdarma barysynda oılarymen bólisti. Qandaı dástúrli tujyrymdardy qaldyramyz, qandaı túsinikterdi aýdaramyz degen sekildi másele birlese sheshildi», - deıdi ol.

Profesordyń aıtýyna qaraǵanda, burynǵy oqýlyqtarda menedjmenttiń teorıalary ǵana beriletin bolsa, bul kitapta teorıa men tájirıbe ushtastyrylǵan. 

«Aýdarylǵan 18 kitaptan bólek, kelesi kezekte tárjimalanatyn 30 kitap bekitildi. Onyń ishinde «Strategıalyq menedjment» degen kitapty aýdarýda ǵylymı redaktor bolyp bekitildim. Osy otyz kitaptyń ishinde 6 kitap ekonomıkalyq salaǵa qatysty. Bul bizdi qýantady», - dep túıdi Samajan Ómirzaqov.

Aıta ketý kerek, Elbasynyń «Rýhanı jańǵyrý» baǵdarlamasy aıasyndaǵy «Jańa gýmanıtarlyq bilim. Qazaq tilindegi 100 jańa oqýlyq» jobasy boıynsha qazaq tiline 18 kitap aýdarylǵan bolatyn.

QazAqparat

---