InfoHub Logo

6 200 aqtóbelik oqýshy Qazaqstannyń kıeli jerlerine saıahat jasaıdy. Bul týraly búgin Ortalyq komýnıkasıalar qyzmetindegi baspasóz máslıhatynda Aqtóbe oblysynyń ákimi Berdibek Saparbaev aıtty.

Onyń aıtýynsha, Aqtóbe oblysynda QR Prezıdenti Nursultan Nazarbaevtyń «Rýhanı jańǵyrý» baǵdarlamalyq maqalasynda usynylǵan «Qazaqstannyń kıeli jerleriniń geografıasy» jobasyn ilgeriletýdiń jumystary belsendi júrgizilýde. Joba aıasynda negizgi kórikti jerlerdi, tarıhı nysandar men oblystyń mádenıetin sıpattaıtyn kartalar, kitapshalar, jolnusqasy jasaldy. Sonyń negizinde jańa týrısik marshrýttar quryldy, olardyń ishinde Qazaqstannyń júz jalpyulttyq kıeli jerleri men keshenderi tizimine kirgen nysandarymen júretin «Týǵan jer» marshrýty bar.

«Basty nazar balalardy ult tarıhy men mádenıetine tartýǵa aýdarylýda. Ótken jyly 5 myń aqtóbelik oqýshylar Astana, Almaty, Jambyl, Ońtústik Qazaqstan, Qyzylorda oblystary men týǵan ólkelerindegi qasıetti jáne kıeli jerlerge ekskýrsıalyq saıahat jasap qaıtty. Bıylǵy jyldyń basynan beri osyndaı ekskýrsıalardyń arqasynda 2 300 balaǵa tarıhı-mádenı muralar tanystyryldy, jyl sońyna deıin taǵy 3 900 oqýshyǵa joldamalar beriledi», - dedi óńir basshysy.

Ol tegin joldamalardyń az qamtylǵan otbasylardyń jáne oqýda, túrli ıntellektýaldyq, sporttyq jáne shyǵarmashylyq baıqaýlarda jetistikke jetken balalarǵa beriletindigin naqtylady. Sonymen qatar «Qazaqstannyń kıeli jerleriniń geografıasy» jobasynyń jergilikti jáne halyqaralyq deńgeıdegi alańdarda oblystyń týrısik áleýetin ilgeriletýdiń, sonymen qatar tarıhı jáne mádenı mura nysandaryn saqtaý men damytýdyń myqty quralyna aınalǵanyn atap ótti.

«Bıyl ejelgi qorǵandardy odan ári zertteý úshin Shalqar jáne Baıǵanın aýdandaryndaǵy arheologıalyq qazbalar jalǵasady. Sondaı-aq, «Rýhanı jańǵyrý» baǵdarlamasy aıasynda jastardyń «Han qoryǵy» týrısik festıvali ótedi», - dedi oblys ákimi.

QazAqparat

---