InfoHub Logo

Aqysyz kásibı-tehnıkalyq bilim mektepten keıin oqý oryndaryna túspegen jastarǵa usynylady. Bul týraly búgin Astanada ótken baspasóz máslıhatynda Eńbek jáne halyqty áleýmettik qorǵaý vıse-mınıstri Birjan Nurymbetov málim etti.

Nurymbetov jańa nátıjeli jumyspen qamtýdy jáne jappaı kásipkerlikti damytýdyń jańa baǵdarlamasynda suranysqa ıe kásipter men kásipkerlik qaǵıdattaryna jappaı oqytý men daǵdylardy úıretý, jappaı kásipkerlikke jaǵdaı jasaý, jumysqa ornalasýǵa árekettesý men eńbekke jumylýdy qoldaý arqyly eńbek naryǵyn damytý qadamdary qamtylǵanyn jetkizdi.

«Baǵdarlamanyń birinshi baǵyty aıasynda 2,5 jylǵa deıingi oqý merzimimen kolejder aýqymynda tegin kásibı-tehnıkalyq bilim alý uıymdastyrylyp, munda bárinen buryn mektepti aıaqtaǵannan keıin, oqý oryndaryna túspegen jastarǵa nazar aýdarylady. Bıyl tehnıkalyq jáne kásibı oqytýda 21 myńnan astam jas qazaqstandyqty qamtý josparlanyp otyr. Osymen birge, kolejder, «Atameken» UKP oqý ortalyqtary jáne kásiporyndardyń oqý ortalyqtary sheńberinde kásibı oqytýǵa arnalǵan qysqamerzimdi kýrstar ótkiziledi (1-6 aı aralyǵy). Bul oqý túrinde 26 myń adamdy qamtý kózdelýde», - dep málimdedi vıse-mınıstr.

Baǵdarlamanyń ekinshi baǵytynda, aýylmen qatar, qalalarda da jappaı kásipkerlikti yntalandyrý men damytýǵa jaǵdaı jasalady.

«Óteý merzimi 7 jyl nesıeniń jyldyq mólsherlemesi 6% deńgeıde saqtala otyryp, 18 mıllıon teńge mólsherinde usynylady. Nesıeniń qoljetimdiligin keńeıtýge arnalǵan kelesi bir tyń shara- nesıeni kepildendirý tetigi engiziledi: bıznesin endi bastaǵandarǵa 85%-ǵa deıin jáne jumysy júrip turǵan kásipkerlerge 50%-ǵa deıin. Aýyl men shaǵyn qalalalardaǵy nesıeleý, shaǵyn qarjy uıymdaryn qosqanda, Aýyl sharýashylyǵyn qarjylaı qoldaý qory arqyly júrgiziledi. Qalalarda shaǵyn nesıeleý, aýyldyq jerlerge arnalǵan sharttardaǵydaı, ekinshi deńgeıli bankter men shaǵyn qarjy uıymdary arqyly júzege asatyn bolady. Ústimizdegi jyly 10 myńnan astam adamǵa shaǵyn nesıe berý josparlanýda», - dep baıyptady Birjan Nurymbetov.

Kásipkerlik negizderine oqytý, arnaıy trenerler men tabysty da tájirıbeli kásipkerlerdi tartqan raıda, Ulttyq kásipkerler palatasyndaǵy «Bastaý-bıznes» jobasy arqyly qolǵa alynady. Aǵymdaǵy jyly oqýmen 15 myń adam qamtylmaq.

---