InfoHub Logo

Aspan asty elinde 24 qazaqstandyq stýdent tegin bilim alady. Sonymen qatar, olarǵa jyl saıyn 12 myń ıýán shákirtaqy tólenedi. Oqý merzimi 3 jyl. Onyń ishinde bir jyly qytaı tilin úırenýge arnalady. Osyndaı tamasha múmkindikke ıe bolǵan jastardy ata-analary men uıymdastyrýshylar Qytaıǵa saltanatty túrde  shyǵaryp saldy.

Qazaqstandyq jastar úshin oqý jyly qazan aıynyń sońynan bastalady. Áleýmettik bilim berý jobasy Almaty oblysynyń Kásipkerler palatasy (Palata) jáne Gansý provınsıasynyń oqý oryndary arasynda iske asty. Ótken jyly oblystyq Kásipkerler palatasynyń bastamasymen QHR provınsıasynda ekijaqty kezdesý ótip, onyń nátıjesi boıynsha Almaty oblysy stýdentterimen bilim berý baǵyty boıynsha ózara almasý jobasyn iske asyrý jónindegi kelisimge qol jetkizgen bolatyn. Osy jyldyń mamyr aıynda Taldyqorǵanda Kásipkerler palatasy jáne Szúsúan kásiptik-tehnıkalyq koleji, Lanchjoý munaı-hımıa koleji men Lanchjoý resýrstar jáne qorshaǵan orta kásiptik-tehnıkalyq koleji arasynda memorandýmǵa qol qoıyldy. Kelisim aıasynda «Jumysshy mamandyqtardy Qytaıda meńgereıik» atty áleýmettik bilim berý jobasy iske asyryldy.

«Jobanyń basty ereksheligi - jastar kásiporyndarǵa qajetti mamandyqtardy tegin túrde oqıdy. Atalmysh mamandyqtarǵa elimizde suranys joǵary. Osyǵan deıin qytaılyq kolejdermen tanysý barysynda olardyń kadr daıyndaý deńgeıine tánti boldyq. Jalpy, Qytaı úshin bul negizgi damý baǵyttarynyń biri bolyp tabylady. Osylaısha olar álem ekonomıkasyndaǵy jetekshi elge aınaldy. Qazaqstandyq stýdentter eń sapaly halyqaralyq bilim alatynyn bolady», - dep atap ótti Almaty oblysy Kásipkerler palatasynyń adamı kapıtaldy damytý bóliminiń basshysy Almagúl Ońǵaraeva.

Kásipkerler palatasyna Qazaqstannyń barlyq óńirinen oqýǵa qatysý úshin 50-den astam ótinim kelip túsken. Qazirgi tańda komısıanyń irikteýi men suhbattasý kezeńinen Almaty, Qostanaı oblystarynan, sondaı-aq, Almaty jáne Astana qalalarynan 24 jas tańdaldy. Olar týrızm, İT, taý isi, munaı-hımıa, veterınarıa, dánekerleý isi, munaı jáne gazdy paıdalaný, geologıa, qarjy jáne ekonomıka, metalýrgıa, elektrotehnıka, ınjenerlik ólshemder tehnıkasy mamandyqtary boıynsha bilim alady.

QazAqparat

---