InfoHub Logo

1920 jylǵy 4-qazanda tegistik negizine qurylǵan keńeste Qazaqstan úkimeti jarıalandy.

Rossıa patshalyǵynyń sheńgeline kirgeli eńbek shilderiniń el qataryna, halyq qataryna óz ókimetin túzep kirgeni sol 1920-jylǵy 4-qazannan beri ǵana. Bul kún ómirinde óz baılarynyń, handarynyń, sultandarynyń ám orys patshalarynyń, tóreleriniń quldyǵynda janshylyp kelgen Qazaqstannyń qalyń eńbekshilderine uly meıram, tarıhı zor qatty qýanyshty kún. Qazaqstannyń basynan keshken, ótken dáýirlerine kóz salsań, qazaqtyń nadan, jyrtqysh, qan ishkish haıýan tárizdi handarynyń, sultandarynyń, tóreleriniń qalyń eńbekshi halyqqa qylǵandaryn oılasań, «shańyraq túıege mingizgen kúnderdi» esińe alsań, «murnyn tesken, qulaǵyn kesken mundar quldardy» esińe alsań, handardyń, sultandardyń, myrzalardyń buqara halyqqa salǵan dúrelerin esine alsań ám onyń bergi jaǵynda baılardyń eńbekshil nashar halyqty qulyndaı jumsap, tizesin batyrǵandaryn jadyńa alsań jáne orys patshasynyń atarman-shabarman, jasaýyl, tóre ulyqtarynyń qylǵan qorlyqtaryn, zorlyqtaryn, eńbekshil nashar qazaqty maldan, ıtten tómen ustaǵandaryn esińe alsań, bul Qazaqstan eńbekshileriniń óz aldyna el bolǵanynyń, óz aldyna tegistik negizine qurylǵan keńestiń úkimetin jasaǵan kúniniń qandaı zor meıram, uly tarıhı qýanysh kún ekenin bilesin. Qazaqstannyń qart tarıhy basynan talaı adam balasynyń jan túrshigerlik, talaı adam balasynyń júregi eljirep jan aıarlyq kúnderdi keshirgen. Talaı meńireý qara pále, qara tumandardy basynan keshirgen, handardyń, sultandardyń patshalardyń talaı aram tilekteriniń kesapatynan Qazaqstannyń eńbekshil halqynyń azamattarynyń talaı «terliginen ter ótken, tebingisinen qan ótken».

Mine, osynyń bárin bastan keshken.

Endi ol kúnder ótti.

Rossıada eńbekshil-jumyskerler taby tegistik negizine quryp, keńesti, eńbekshil tabyna keńshilikti úkimet ornatty. Qazaqstan eńbekshileri endi avtonomıaly, óziniń úkimeti bar el boldy.

Bul avtonomıa degen sózdi Qazaqstannyń baılary, oqyǵandardan shyqqan ulyqtyqqa qumar baıaǵy handardyń, sultandardyń zamandaryn joqtaǵan qýlar, myrzalar ózderinshe oılap, ózderiniń, baılardyń, ulyqtyqqa qumar, ótirik halyqshyl qýlardyń avtonomıasy qylmaq boldy. Sol nıetpen belgili sandyraq, belgili sandalǵandardyń, sumdardyń, esalańdardyń alashordasy shyqty.

Bul sandalǵan múıizsiz qoshqarlardyń kesapattarynan eńbekshil qazaq eli taǵy da sergeldeń zamanǵa túsip, talaı jerde eńbekshil taptyń, talaı azamattyń taǵy da «terliginen ter ótti, tebingisinen qan ótti», talaıy qýǵyn-súrginge ushyrady. Rossıanyń eńbekshil tabynyń azamattaryndaı bolmasa da talaıy revolúsıa úshin «alashordanyń» pálesinen qurban da boldy. Ol kúnder de ótti.

Qazaqstannyń eńbekshil taby, qýanyshty kúniń — óz úkimetińniń jarıalanǵan kúni — 4 qazan qaıyrly bolsyn!

Jasasyn, sonyń tegistik negizine qurylǵan úkimetiń!

Qazaqstannyń eńbekshil taby, ómiriń uzaq bolyp, jer-dúnıeniń eńbekshileriniń tegistik negizine qurylatyn keńestik respýblıkalarynyń odaǵyna kiretin bol!

Jasasyn, jer-dúnıedegi jalpy eńbekshil tabynyń tegistik negizine qurylmaq keńestik respýblıkalarynyń odaǵy!

Jasasyn, jalpy eńbekshilerdiń týysqandyǵy!

1923 jyl

---