InfoHub Logo

Baıaǵy ishý "moda" bolǵan jyldary Jetpis degen qurdasymyz úıine shaqyrdy. Sebebin de suramaı úıine jetip bardyq. "Bizdiń otaǵasy araqty múlde qoıǵaly jatyr. Talaı-talaı bergen ýádeleri taýsyldy. Búgin sol báleden ala jip qıyp, at quıryǵyn kespekshi, soǵan shaqyrǵan edik", - dedi Jetpistiń kelinshegi Márıam. Sener-senbesimizdi bilmeı oń bolsynymyzdy aıtyp, shaıǵa otyrdy0, Aıtqandary shyn eken, lebizin bildirip, tilegin tilge tıek etkender araqtyń zıanyn, ony tastap ketý degenniń ekiniń biriniń qolynan kelmeıtinin, Jákeńniń erlikke bara-bar qadamyn sózderine arqaý etti.

Shaıda on shaqty adam tilek aıtyp hrýstal tostaqtary syńǵyr qaqty. Kezek etke kelip, qyzyp alǵandar Jetpisekeńdi arystandaı aıbatty, jolbarystaı qaıratty, naǵyz sen tur men ataıynnyń ózi ǵyp, aspandatty. Baıqaımyn, dastarqan ıesi qyzara bórtip, "munan bylaı seni jelkemniń shuqyry kórsin" degendeı aqańdy aýyzǵa esesi ketkendeı aqtara salady. Et jelinip, jınalǵandar sorpamen "kóterip qoıdy ".

Kezek negizgi rásimge keldi. Eki jigit bir aq, bir qyzyl jipti kere tartyp turdy. Asaba sóz salyp: "Myna eki jipti kórdińizder ǵoı. Munyń biri aq araq, ekinshisi qyzyl sharap degendi bildiredi. Qazir Jetpis aǵamyz qolyna qaıshy alyp myna jipterdi qıady. Bul ishimdik ataýlymen qoshtastym degeni. Sodan keıin araq ishýdi múldem qoıady. Bul "jyndy sýlardy endi aýyzǵa almaıdy",— dedi.

Qyzara bórtken Jetpistiń tili kúrmele bastaǵan, bizge jaltaq-jaltaq qaraıdy. Qınalyp-aq turǵany bet-ajarynan baıqalady. Beıne bir "qımasynan" aıyrylǵan jandaı kózi jasaýrap, kemseńdep tur. Jipke taıap bardy, jurt dýyldata qol soǵyp jatyr. "Al, qane Jáke, qane, bastańyz" dep qoıady. Kenet Jákeń bizge qarap turyp: "Áı, jigitter, osynyń qyzyl jibin qoıa tursaq qaıtedi", demesi bar ma?!..

"Urlyq qalsa da ádet qalmaıdy" degen ras-aý, Jákeń áli de... azdap júzdetedi.

---