InfoHub Logo

Ol qara terge malshyndy. Táni balqyp, jan dúnıesi órt álemniń ózegine tastalǵandaı janyp barady. Ómirinde mundaı rahat sezimdi keshpegenin sezdi. Qysqasy, bir alyp kúsh sezdirdi. Sál tynysy tarylǵandaı, alqyna beredi. Jo-joq, júregin jaryp ótken lázzat sezimniń ýyty sanasyn jaılady. Keńistikte qalyqtaǵandaı, táni men janyn yrqyna kóndire alar emes. Bar dúnıe umyt bolǵandaı. Osy sátti qımady. Rahat sezim denesinen ajyrap bara jatqandaı. Úzdigip barady.

— Jo-joq, ketpeshi...

Oıanyp ketti. Terezeden syǵalaǵan aı sáýlesi aq júzin nurlandyryp tur eken. Uzyn shashy mamyq jastyqtyń ústinde tógilip jatyr. Kórpesi ashylyp qalypty. Tús kórgendeı sezinip, «osy jańa ǵana qandaı tús kórdim» dep oılady. Esine túspedi. Alańsyz kórpesin qaıtadan qymtap alyp, uıqy qushaǵyna berildi.

Sol túni shoshyp oıanǵany umyt bolǵaly qashan. Arada birneshe apta ótken. Bári durys, ómir óz qalpynda. Tek júregi aınyp, qusqysy kelip turady. Basy aınala ma, ózi túsinbeı qaldy. «Mundaıym joq edi ǵoı» dep oılady arý qyz. Amaly taýsylǵasyn, dárigerge kórinýge barǵan. Ony uzaq teksergen dáriger:

— Kúıeýińizden súıinshi suraýǵa bolady, aıaǵyńyz aýyr eken,-dedi.

Esinen tanyp, qulap tústi.

Úıine qaıtyp keledi. Basy shyr aınalyp, ne istep kele jatqanyn ózi bilmeıdi. Dárigerdiń aıtqany aýyq-aýyq esine oralady.

— Kúıeýińiz deıdi, qaıdaǵyny aıtqany nesi. Men áli turmysqa shyqpadym ǵoı. Kerek deseńiz áli kúnge deıin erkek ataýlyǵa jolap kórgenim joq. Sonda qalaı?..

Ol taǵy da qulap bara jatqan, kóshedegi ımandy bireý ıyǵynan demep qaldy. Qaıtadan esin jıdy da, beıtanys kisige rahmet aıtyp júrip ketti.

Ertesine taǵy da dárigerge qaralýǵa keldi. Keshegi bolǵan oqıǵaǵa sengisi kelmegen. Dáriger bárin rastap berdi. Arada birneshe apta ótse de, arý qyz senbeı júrdi. Biraq birte-birte ishi óse tústi. Qorqaıyn dedi. Amaly taýsylyp, óziniń esh qylmyssyz kúnásin jasyrý úshin basqa qalaǵa ketip qaldy.

Arada toǵyz aı, toǵyz kún ótip tolǵaǵy kelgen. Perzenthanadan bir-aq shyqty. Jany qınalyp jatyr. Bir ýaqytta sha r etken daýys estildi. Jańadan jan ıesi dúnıege keldi. Dáriger sábıdi qolyna ustap, kindigin kesip bolǵan kezde, qolyndaǵy sharana:

— Meniń sheshemdi kórsetińizshi? — dedi.

Tilge kelmegen dárigerdiń júregi toqtap qaldy. Qolynan sýsyp túsken sábı, jerge aýnap ketti. Ón-boıyn úreı boılaǵan ol, jerde jatqan sábıine qarady. Basyn ózine burǵan sábıi:

— Meniń ákem qaıda? — dep surady.

Ol bolsa osydan toǵyz aı, toǵyz kún burynǵy túsinde oryn alǵan oqıǵany esine alǵysy kelmedi. Biraq sábıiniń ákesin ózi de kórgisi kelgeni ras.

---