InfoHub Logo

Kelesi kúni ertemen tysqa shyqtym. Aýdan ortalyǵynan qalaǵa qaraı ótetin dańǵyl joldyń ústinde, uzyn aqqan Nuranyń jaǵasyna qonystanǵan aýyl. Bul buryn óz aldyna «Qyzyl shilik» dep atalatyn sharqy shaǵyn, qaýqary joq kishkentaı ǵana kolhoz bolatyn. Endi «Parıj komýnasy» degen úlken kolhozǵa qosylyp, sonyń bir brıgadasy ǵana bolyp qalǵan eken.

Brıgada demekshi, «mundaǵy brıgadır kim edi?» dep oıladym. «Ie, Ahmet dep edi-aý túnde».

Sol kezde qara murtty, dóńgelek kúreń júzdi myǵym bireý astyndaǵy sypsyń toryny oıqastatyp aldymnan óte berdi. «Ie, ıe, mynaý Ahmettiń naq ózi ǵoı. Baıaǵy qalpy, ózgermegen tipti».

— Amansyń ba, shyraq? — dedi ol anadaıdan, — kelgenińdi estidim. Qol tımeı jatyr amandasýǵa. Raıkom men raııspolkomdy qonaqqa shaqyryp edim. Asyǵyp baramyn. Kezdesemiz áli.

Ahmet atyn tebinip qalyp, jelip ketti.

Ie, men onymen taǵy da kezdestim. Buryn bul kolhozdyń alystaǵy jaılaýda maly bolatyn edi. Sol mal jaıyn, jaılaý jaıyn suradym.

— Jaılaýda qazir sovhozdar ornaı bastady ǵoı. Álgi jýyrda bizdikine raıkom men raııspolkom keldi ǵoı. Sonda olar keler jyly jaılaýdan maldy aıdatyp aldyrarmyz dep aıtty, - dep jaýap berdi.

Endi birde tistiń tazalyǵy, beriktigi jaıynda sóz bolyp edi. Ahmet otyryp:

— Tisiń taza bolsyn deseń, shesnok je, — dep qoıdy.

Jurt úndemeı qaldy.

— Nanbaısyńdar ma? Ras aıtam. Álgi bizdikine kelgende raıkom men raııspolkom tisterin pıazben tazalady ǵoı. «Shesnokpen tazalasa, tipti jaqsy. Tic berik bolady», — dep aıtqan.

Shirkin-aı, ózindik túk oıy joq osyndaı jaramsaqtar qurysa, keýdesine nan pisirgish, shenqumar búrokrattar da azaıar edi-aý.

---