InfoHub Logo

Almaty oblysynda «2017 jyldyń úzdik muǵalimi» nomınasıasynyń jeńimpazyna «ladaXRay» avtokóliginiń kilti tabystaldy, dep habarlaıdy Almaty oblysy ákiminiń baspasóz qyzmeti.

Tekeli qalasyndaǵy №1 orta mekteptiń geografıa pániniń muǵalimi Baqytjan Molbaev muǵalimder arasynda úzdik atandy. Ustazdy laıyqty jeńisimen oblys ákimi Amandyq Batalov quttyqtady. Bul týraly búgin Muǵalimder kúnine arnalǵan saltanatty jıynda belgili boldy

Oblys ákimi óz quttyqtaý sózinde muǵalim mamandyǵy árqashan erekshe qurmetke jáne joǵary mártebege ıe ekendigin, sonymen qatar oblystyń bilim salasy qyzmetkerleriniń eseli eńbegin atap ótti.

«Ustazdar qaýymy elimizdiń dástúrli pedagogıkasy men ınovasıasyn úılestire otyryp, kóptegen sapaly nátıjelerge qol jetkizip kelesizder. Qazirgi shaqta da aldaryńyzda kóptegen mańyzdy mindetter bar. Olardyń kósh basynda «Rýhanı jańǵyrý» baǵdarlamasyn júzege asyrý, «Tárbıe jáne bilim» baǵdarlamasy aıasynda aýqymdy jobalardy oryndaý mindetteri turǵanyn atap ótý qajet. Bilimdilik pen belsendilikterińizdiń arqasynda osy baǵytta áli talaı belesterdi baǵyndyryp, aldyńǵy qatardan kórinetinderińizge senemin»,  - dedi A.Batalov.

Saltanatty shara bilim men tárbıe berýde aıryqsha tabystarǵa qol jetkizgen muǵalimderdi marapattaý rásimimen jalǵasyp, marapattardy oblys ákimi Amandyq Batalov tapsyrdy.

Talǵar aýdanynyń №6 orta mektebiniń mýzyka páni muǵalimi Qýandyq Imashev «Qazaqstan Respýblıkasy bilim salasynyń úzdik qyzmetkeri» tósbelgisiniń ıegeri atandy. Taǵy 4 úzdik ustaz Y.Altynsarın atyndaǵy tósbelgilerimen marapattaldy.

Shara barysynda bilim salasyndaǵy oblystyq konkýrs qorytyndylandy. «2017 jyldyń eń úzdik muǵalimi» atty negizgi nomınasıa boıynsha Tekeli qalasy №1 orta mektebi geografıa pániniń muǵalimi Baqytjan Molbaev jeńimpaz atanyp, jańa «ladaXRay» avtokóliginiń kiltine ıe boldy.

«Úzdik balabaqsha» ataǵy Qapshaǵaı qalasynyń «Baldáýren» mektepke deıingi bilim berý mekemesine berilip, 300 myń teńgeniń sertıfıkaty tabystaldy. Sondaı-aq sertıfıkat jáne «Úzdik kásiptik bilim berý mekemesi» ataǵyn Almaty oblystyq qyzmet kórsetý jáne tamaqtaný salasyndaǵy ınovasıalyq tehnologıalar koleji ıelendi.

«Úzdik synyp jetekshisi» atanǵan Balqash aýdany Aqdala orta mektebiniń muǵalimi Jazylbekova Ǵalıaǵa 150 myń teńgeniń sertıfıkaty tabystaldy.

«Úzdik aýyldyq mektep» Kerbulaq aýdanyndaǵy Qarashoqy orta mektebi dep tanylyp, 250 myń teńgeniń sertıfıkaty tabystaldy.

İle aýdanyndaǵy №26 orta mektep «Úzdik orta bilim mekemesi» atanyp, 19,6 mlrd teńgeniń grantyn ıelendi.

Sonymen qatar birqatar muǵalimder men bilim salasynyń ardagerleri oblys ákiminiń Qurmet gramotalarymen jáne Alǵys hattarymen marapattaldy.

Marapattalǵan ustazdar atynan «2017 jyldyń eń úzdik muǵalimi» nomınasıasynyń júldegeri Baqytjan Molbaev sóz aldy.

«Biz el ıgiligine adal qyzmet etemiz, jas urpaqty eljandylyqqa tárbıelep, otanymyzdyń laıyqty azamattary bolýyna bar kúsh-jigerimizdi jumsaımyz. Elbasy saıasatynyń arqasynda bizge barlyq jaǵdaılar jasalǵan, eń bastysy - ózimiz mamandyǵymyzǵa adal, jumysymyzdy jaqsy kóretin, zaman talabyna saı muǵalim bolsaq, kásibıliktiń kilti sol», - dedi ustaz.

Saltanatty shara merekelik konsertpen aıaqtaldy.

Aıta keteıik, Almaty oblysynda 33 myńnan astam muǵalim jumys isteıdi. Olardyń eńbeginiń arqasynda, sońǵy oqý jylynda 242 oqýshy ártúrli ıntellektýaldyq jarystarǵa qatysyp, olardyń 95-i júldeli oryndarǵa ıe boldy. Sondaı-aq, ótken oqý jylynda 1351 jas muǵalim jumysqa ornalassa, bıylǵy jyly 1 400-den astamy jumyspen qamtylǵan.

---