InfoHub Logo

Almatyda ata-analar tarapynan  aqsha jınaý týraly shaǵymnan soń 2 mektep dırektory jumystan qýyldy.

Búgin óńirlik komýnıkasıalar qyzmetinde ótken baspasóz máslıhaty barysynda  Memlekettik qyzmet isteri jáne sybaılas jemqorlyqqa qarsy kúres departamentiniń basshysy Aıgúl Baıhanova mektepterdegi «demeýshilik kómek» deregi týraly aıtyp ótti.

«Almatyda jalpy bilim beretin mektepter men balabaqshalarda aqsha jınaý derekteri qatań baqylaýda. 2017 jyly ata-analardyń shaǵymynan soń 2 mektep dırektory jumysynan qýyldy», - dedi Aıgúl Baıhanova.

Departament basshysynyń aıtýynsha, kóp jaǵdaıda ata-analardyń ózderi de osyǵan muryndyq bolyp otyrady.

«Mektepterdegi aqsha jınaý - ásire belsendi ata-analardyń usynysy. Olar muǵalimderge syılyq jasap, barynsha yntalandyrǵysy kep turady. Ótken jyly Bilim basqarmasymen birigip taldaý jasadyq. Nátıjesinde mektep ishindegi qorlardy tarattyq. Bul zańdastyrylǵan para berý organy. Almatyda mektepterge jaqsy qomaqty qarjy bólinedi. Bıyl 95 mlrd teńge bilim berý salasyna berilgen. Qarjy jetpegen birde bir mektep joq», - dedi ol.

Transparency Kazakhstan keńesiniń ókili Marat Shıbutov mektep búdjetin saıttan kórýge bolatynyn aıtty.

«Tek qana Almatyda qazir mektep pen kolej búdjeti Bilim basqarmasynyń saıtynda tur.  Onda kórsetilgendeı, jóndeýge qansha, keńselik taýarlarǵa qansha, ınternetke qansha qarjy tólenetini kórsetilgen», - dedi  M. Shıbutov.

QazAqparat

---