InfoHub Logo

Jol ústinde edim. Tamaq isheıin dep vagon-restoranǵa bardym. Eki daıashy júr. Biri qalyń erin, dýdar bas, jıren shash uzyn áıel. Baryldap sóılep, jer-kókti kóshirip júr.

Bet baqtyrmaıdy. «Zakaz alyńyz» degenge «kelgeniń jańa ǵoı. Áketip bara ma?» dep, «tamaǵyńyzdy tezirek ákelińiz» degenge «otyra tur. Qyzmetińnen qalyp bara jatpaǵan shyǵarsyń», — dep únemi nyǵyrtyp kerimal sóıleıdi.

Al, ekinshi bir bólmede taldyrmash bir qara tory qyz júr. Aıaǵyn ushynan basady. Jurttyń bárine de ezý tartyp kúledi. «Qazir» dep qalqı jóneledi. Endi bireýlerge «Aıyp etpeńiz, sál kútińkirep qaldyńyz ǵoı deımin» dep, qolyn keýdesine basyp ıiledi. Al jolaýshy bolsa: «Oqasy joq, sizdiń qolyńyzdan tamaq jegenniń ózi bir ǵanıbet emes pe», - dep qoıady. Áne bir ortadaǵy tereze aldynda otyrǵan eki jigit kitapshasyn surap aldy. Sodan keıin birdemeler jazdy da, kúlip, qyzdyń qolyn qysty.

Baıqap otyrmyn. Sol qyz qyzmet etip júrgen jaqta kelýshiler de kóp. Al biz otyrǵan bólmede tórt — bes-aq adam barmyz.

Men eki daıashy qyzdyń qylyǵy men isine qaıran qalyp baqylaýmen boldym.

Bir zamanda dýdar basty shaqyrdym.

— Áketip bara ma? — dep gúj etip qasymnan ótip ketti ol. Úndemedim. Shydap otyra berdim. Aqyry dýdar bas daıashynyń ózi keldi. Men esebin berdim de:

— Sizden bir suraıtynym bar edi, — dedim.

— Ol ne suraq? — daıashynyń qabaǵy jazylar emes.

— Joq, ashýlanbasańyz ǵana suraımyn.

— Kelgen-ketkenmen tálkekteser ýaqyt joq — dep ol júrip ketti.

Kelesi kúni taǵy da restoranǵa bardym. Bergi bette kisi tym kóp eken. Qara tory taldyrmash qyz keshegi bir qalpynda podnosyn kóterip, jurt arasynda qalqyp júr. Al arǵy bette bir ǵana jolaýshy bar. Dýdar bas áıel aıaǵyn qası salyp býfettiń aldynda otyr.

Men sol jaqqa óttim. Daıashyǵa tis jaryp eshteńe demedim. Tamaǵymdy iship esebimdi aıyrdym da, tura berdim. Sol kezde dýdar bas áıel sál ezý tartty:

— Keshe ne suramaq bolyp ediń menen?

Men qaıta otyrdym.

— Joq, ashýlanbasańyz ǵana aıtamyn.

— Al ashýlanbaıyn, surashy, — dedi áýesqumarlyq jeńgen áıel.

— Ras ashýlanbaısyz ǵoı?

— Ras ashýlanbaıyn.

Men ony qasyma otyrǵyzdym.

— Siz nege dórekisiz?

— Sol ma? — Áıeldiń qabaǵy qyrtystana qaldy.

— Sol, — dep kúldim men.

Daıashy jaýlyǵy da, tatýlyǵy da joq bir keıipke keldi.

— Bilesiń be? Ana qyzdy kórgende jynym ustaıdy meniń. Ylǵı qylmyńdap, jylmyńdap júrgeni. Ádeıi isteıdi. Janyma tıetini de sol, - dedi dýdar bas áıel.

Meniń ańǵarǵanym da osy edi.

Qara tory qyz myna dýdar bas áıeldiń dórekiligin kórip jibekteı shıratyla túsedi. Sóıtip kelýshilerdi ózine úıirip alady eken. Al onyń osy minezine myna dýdar bastyń jyny kelip, dórekilene túsetin kórinedi.

---