InfoHub Logo

Erte, erte, ertede etek jeńin súıretken Esenbaı degen shal bolypty. Esenbaı, jańadan alǵan toqaly, asqan sulý qyzy-úsheý ǵana turady eken. Shaldyń sulý qyzyna jigitter qyzyǵyp, kóz salyp júrse kerek.

Bir kúni aılaly Asan degen jigit shaldyń úıine keledi. Shal ony úıine kirgizbeı dalada júrip alady. Sol kezde, ólgen bireýdi jerleýge áketip bara jatqan adamdarǵa qarap Asan:

— Anaý adam ólgen kisi me? Álde tiri kisi me? – dep suraıdy Esenbaıdan.

— Tiri adamdy kórge aparýshy ma edi, – dep ursady shal.

         Asan taǵy da:

— Myna eginniń ıesi bar ma, álde ıesiz egin be? – deıdi.

         Esenbaı odan ári ashýlanyp:

— Sen óziń aqymaqpysyń, ıesiz egin shyǵýshy ma edi, – deıdi.

         Jigit taǵy da shaldan:

         — Úlken kisi tósegińizge neshe kisi jatasyzdar? – dep suraıdy.

         — Nesheýiń ne, toqalym ekeýimiz – dep aqyrady da júrip ketedi. Asan artynan qalmaı taǵy da:

         — Qyzyńyz sheshesi ólgen jetim eken. Únemi jylap otyra ma? – deıdi.

         Shal:

         — Jylamaıdy, kúrsinip otyrady, – dep kete beredi. Yzalanǵan shal, úıine kelip toqaly men qyzyna:

         — Aqymaq jigitke keziktim, – dep onyń suraǵany men qaıtarǵan jaýabyn aıtady. Sonda qyzy:

         — Áke, bárine teris jaýap beripsiz. Ana kisi tiri kisi me, óli kisi me degeni artynda balasy bar ma, joq pa degeni eken. Anaý eginniń ıesi bar ma, joq pa degeni-kútimi joq eginniń jarymy ósip, jarymy óspegenin suraǵany. Tósegińizge neshe kisi jatasyzdar degenine-kúndiz ekeý, túnde tórteý demepsiz. Óıtkeni, túnde buryńǵy kúıeýin, siz kempirińizdi oılaısyzdar ǵoı. Qyzym kúrsinip otyrady degenshe-silkinip otyrady dep aıtpaǵan ekensiz, – deıdi. Esenbaı oılanyp baryp, ol aqymaq emes, aqyldy jigit eken, baryp jaýabyn bereıin, – dep jigitke keledi.

         Asan qyzdyń qaıtarǵan jaýabynan, silkinip otyramyn degeni boı túzep otyramyn degenin túsinedi de shalǵa:

— Úıińizge baryp qonaq bolýǵa bola ma? –deıdi.

         Sonda shal:

         — Saǵan dámdi tamaq istep beretin óz kempirim ólgen. Toqalym dámdi tamaq isteı almaıdy, al qyzym qazan oshaqqa aralaspaıdy, – deıdi. Sonda jigit:

         — Men qyzyńyzdyń silkingenine toıamyn, – deıdi. Qyzdyń silkingenine toıamyn degenin Esekeń jetim qyzdy músirkegen eken ǵoı dep oılaıdy da jigitti úıine ertip barady.

         Birin-biri osylaı kórgen jigit pen qyz budan keıin ózara unatysyp armanyna jetip, qosylypty-mys.

---