InfoHub Logo

Qaladan qydyryp kelgen Meırambekti qasyna ertken Baqyt tús aýa aýyldyń syrtyndaǵy ózenge qaraı bet aldy. Bıyl birinshi synypty bitirgen onyń ıyǵynda balyq aýlaıtyn uzyn qarmaq, al qonaq balanyń qolynda shaǵyn shelek.

— Men saǵan qazir balyqtyń nebir túrin kórsetemin! Sazan, shortan, laqa degenderiń bizdiń Qarasýda órip júredi! — dep Baqyt aldyn ala maqtanyp qoıdy.

Aýyldan uzap shyǵa bere jaıqala ósip turǵan kók, qyzyl, sary gúlderge ushyp-qonyp júrgen alýan túrli kóbelekterdi kórgen Meırambek:

— Oı, qandaı kóp kóbelek?! — dep tura umtyldy.

— Meırambek, toqta! Sen ne istemeksiń?!

— Men qazir olardy ustap alamyn! — Meırambek kóbelekterdi qýa jóneldi.

Jerde jatqan úlken aǵash taıaqty qolyna alyp alǵan ol ádemi aq kóbelektiń sońyna túsip berdi. Taıaǵyn ońdy-soldy siltep, jazyqsyz kóbelektiń apshysyn qýyryp barady. Joǵary-tómen qalbalaqtaı qashqan beısharaǵa aýyr soqqy dál tıse, jerge jalp etkizbek.

— Meırambek, toqta, tıispeshi! — dedi Baqyt onyń jolyn kes-kesteı bógep.

— Sen ne, kóbelekti qyzǵanyp tursyń ba?! — Meırambek oǵan ojyraıa qarady.

— Joq, kip-kishkentaı jándikke janym ashyp tur! — dedi Baqyt shyr-pyry shyǵyp. — Eger jazataıym taıaǵyń tıse, ólip qalady ǵoı...

— Ólse she... Maǵan qaıta onyń ólgeni kerek, úıge aparyp gerbarıı jasaımyn!..

Taıaǵyn ońtaılap, taǵy da umtyla bergen Meırambektiń qolynan Baqyt ustaı aldy.

— Joq, men seni ondaıǵa jibermeımin!

Eki bala teketirese ketti. Birin-biri ıterip, júlqylasyp álek. Ekeýiniń de op-ońaı taıaqtan aıyrylǵysy joq. Kenet Merambektiń aıaǵy shalynysyp baryp tizerleı qulap tústi. Qara taıaq Baqyttyń qolynda qalyp qoıdy.

— Oı, aıaǵym-aı!.. Aıaǵy-y-m!.. — Meırambek qatty aıqaılap jiberdi. Baqyt taıaqty laqtyryp jiberip, onyń qasyna jetip bardy. Meırambektiń tizesinen qyp-qyzyl qan sorǵalap tur eken. Ol ústindegi kóılegin tez sheshti de, etegin jyrtyp alyp, jarasyn tańýǵa kiristi.

— Sál shyda, qazir qanaǵany toqtaıdy... — dep aragidik Meırambekti jubatyp qoıady.

— Baqyt, anany qarashy! — Jarasyn aýyrsyna yńyrsyp otyrǵan Meırambek kúlip jiberdi.

— Ol ne-e? — Baqyt basyn kótermegen kúıi jumysyn jalǵastyra berdi.

— Sen aldymen qarasańshy!.. — Meırambek jáne kúldi.

Eriksiz basyn kóterip, Meırambek qolyn shoshaıtqan jaqqa moınyn burǵan Baqyt óziniń ıyǵynda qonyp otyrǵan aq kóbelekke kózi tústi.

— Álginde men qýalaǵan kóbelek qoı!.. — dedi Meırambek uıala qyzaraqtap.

— Já, endi qýalamaıtyn shyǵarsyń?!

— Árıne, qýalamaımyn!

«Áne, estidiń ǵoı» degendeı Baqyt aq kóbelekke meıirlene qarap edi, ol ushyp baryp Meırambektiń ıyǵyna qondy.

Buǵan ekeýi de máz. Meırambek tipti aıaǵynyń aýyratynyn umytyp, ornynan atyp turdy.

— Oı, qandaı ádemi kóbelek?! — dedi ol ıyǵyna qonaqtaǵan aq kóbelekti súısine qyzyqtap.

Birazdan soń eki bala ózenge qaraı bet túzedi. Al aq kóbelek olardan qalyspaı, qatarlasa ushyp bara jatty. 

---